နံနက်ခင်းတစ်ခုအကြောင်း

ခရစ္စမတ်ကဒ်လေးပေါ်မှ အိပ်မက်သည် အရွယ်ရောက်စလိပ်ပြာတစ်ကောင်လို တောင်ပံတစ်ဖျပ်ဖျပ်လှုပ်ခတ်နေသည်။ ဖြည်း ညင်းစွာ မှုတ်ထုတ်လိုက်သော ပင့်သက်တစ်ရှိုက်ထဲတွင် နာကျင်မှုတို့ အခိုင်လိုက် ပြွတ်သီးနေသည်ဟု အောက်မေ့မိ၏။ အမှောင်လာပြီလား၊ သူမ၏ မျက်ဝန်းထောင့်ဆီမှ အပြာနုရောင်အလင်းတန်းတစ်ချက်ကို သတိထားလိုက်မိသည်။ နာကျင်မှုတို့က နာကျင်သထက် နာကျင်လာသလို ခံစားရပြန်လေသည်။

တကယ်ဆိုလျှင် အမှောင်ပဲဖြစ်ဖြစ်၊ အလင်းပဲဖြစ်ဖြစ် လောကတွင် အရာအားလုံးသည် သူ့နေရာနှင့်သူ ရှိနေပြီးသားဖြစ်သည်။ ဟောင်းမြေ့နေသည့် ဓာတ်ပုံထဲတွင် သူမမျက်နှာ၏ အရိပ် ကျသောနေရာများတွင် အမှောင်သည် နေရာကျစွာ သေ၀ပ်နေသည်။ နံရံပေါ်က ပန်းချီကားထဲမှာ အဲဒီအလင်းရောင်တွေ ဘယ်သူထည့်ဆွဲသွားတာလဲ။ သူကတော့ အမှောင်နှင့်အလင်း ပျော်ဝင်မျှတနေသော နံနက်ခင်းတချို့ကိုသာ အလိုရှိခဲ့သည်။

ဤကမ္ဘာ၏ နံနက်ခင်းတစ်ခုသည် နှင်းစက်ဖြူတို့ဖြင့် အေးစက်ထုံကျင်နေလိမ့်မည်။ (ထိုအခါ ကလေးငယ်တစ်ယောက်က ထို နံနက်ခင်းအား ရေခဲမုန့်တစ်ခုလို အငမ်းမရ ၀ါးစားပစ်နိုင်သည်။)

ဤကမ္ဘာ၏ နံနက်ခင်းတစ်ခုသည် ကောင်းကင်မှ ရွှေရောင်ငွေရောင် စက္ကူမျှင်စများ ကြဲဖြန့်ကျရောက်လာခြင်းကို တအံ့တသြ ကြုံတွေ့နေရလိမ့်မည်။ (ထိုအခါ ထိုမြို့မှ အဆိုတော်များ သည် လမ်းမများပေါ်တွင် အမ်မ်တီဗွီရိုက်ကာ စုံတွဲများက ပန်းခြံထဲ၌ လက်ချင်းချိတ် ရင်း လမ်းလျှောက်နေနိုင်သည်။)

ဤကမ္ဘာ၏ နံနက်ခင်းတစ်ခုသည် နှင်းစက်ဖြူ၊ ရေခဲမုန့်၊ ယမ်းငွေ့မီးခိုး ၊ လင်းချင်းချိတ်၊ အဆိုတော်၊ ကြောင်စီစီ၊ ပန်းခြံ၊ အမ်တီဗွီ ။ထားလိုက်ပါတော့။ ဘယ်လိုနံနက်ခင်း မျိုးပဲဖြစ်ဖြစ်ပေါ့။

သူထိုင်နေကျ လက်ဖက်ရည်ဆိုင်ရှေ့က နံနက်ခင်းကတော့ ခါတိုင်းလိုပင် မထုံတက်တေးအသွင်အပြင်နှင့်ပင်ဖြစ်သည်။ ဆိုင်ရှေ့ မှ ဖြတ်သန်းသွားမည့် မျက်ဝန်းပြာပြာနှင့် ကောင်မ လေးတစ်ယောက်ကို သူစောင့်ဆိုင်းနေခြင်းဖြစ်၏။

သည်နေ့သည် ခရစ္စမတ်နေ့ဖြစ်ကာ ကောင်မလေးကို လက်ဆောင်ပေးရန် ၀ယ်လာခဲ့သော ခရစ္စမတ်ကဒ်လေးအား သူ့လက်ဖျား များဖြင့် မကြာခဏပွတ်သပ်နေဖြစ်သည်။

မျက်ဝန်းပြာမလေးသည် သူထိုင်နေကျ လက်ဖက်ရည်ဆိုင် နောက်ဖက်ရှိ ရပ်ကွက်ထဲတွင် နေထိုင်သည်။ ကောင်မလေး၏ ကျောင်းအသွားအပြန် နံနက်ခင်းများနှင့် ညနေခင်းများအား သူက ဤလက်ဖက်ရည်ဆိုင်လေးမှ လာရောက်၍ ငေးရီစောင့်မျှော်နေကျဖြစ်၏။

_ _ _

ကောင်မလေး၏ နာမည်သည် သူ့အတွက် အရေးမကြီးလှသော်လည်း လိုအပ်သည်ဟု ယူဆ၍ ကောင်မလေးနှင့် တစ်လမ်းထဲနေ သည့် သူ့သူငယ်ချင်းအား ဤလက်ဖက်ရည်ဆိုင်သို့ ခေါ်ယူကာ ကောင်မလေး အကြောင်းကို သူအတော်များများ စုံစမ်းခဲ့သည်။

ကောင်မလေး၏နာမည်သည် ထိပ်ထားရွှေစင်လား၊ ကလျာသီရိစန္ဒာလား၊ အိနြေ္ဒစိမ့်သက်သက်ခိုင်လား ဒါမှမဟုတ် ဂျိန်းဖောင်ဒါ လား၊  ဘရွတ်စ်ရှီးလား၊ ဒယ်မီမိုးလားလို့ ကောင်မ လေးကို တွေ့စတုန်းက သူစဉ်းစားမိခဲ့ဖူးသော်လည်း ကောင်မလေးနာမည်သည် “၀င်းဝင်းမော်”ဟု သိလိုက်ရသောအခါ သူက ထိုနာမည်လေးကိုရော ကောင်မလေးကိုပါ ချစ်မိပြီးသား ဖြစ်သွားခဲ့ပြီးပြီ။ တစ်ချို့ကိစ္စရပ်များ သည် ထူးခြားမည်ထင်ထားသော်လည်း ထူးခြားမလာသည့်အတွက် သူဘာမှ မတတ်နိုင်ပါ။

နာမည်ဆိုသည်မှာ တစ်စုံတစ်ယောက်က တစ်စုံတစ်ယောက်အား ခေါ်ဆိုဖို့၊ အတင်းအဖျင်းပြောဖို့၊ မြှောက်စားဖို့၊ စော်ကားဖို့၊ ဖော်လံဖားလုပ်ဖို့၊ ရန်စဖို့၊ နှိမ်ချဖို့၊ အချိုသတ်ဖို့စသည် ကိစ္စရပ်များ သက်သက်အတွက် မှည့်ဆိုထားကြခြင်းမဟုတ်နိုင်ပါ။ သူက ကောင်မလေး ကို ကောင်မလေးဟုသာ ခေါ်ဆိုချင်ပါသည်။

အခန်း(၂)

သူဖြတ်နင်းလျှောက်လာခဲ့သည့် မြက်ခင်းစိမ်းစိမ်းလွင်ပြင်အား နီးကပ်စွာ ကြည့်မိရာ နှင်းစက်မှုန်တို့ဖြင့် စိုလူးနေသော မြက်ပင် ရွက်ဖျားများကို မြင်ရသည်။ ခပ်ဝေးဝေးမှ မြွေတစ် ကောင်လို တွန့်ခွေနေသည့် မြေနီလမ်းကလေးသည်လည်းကောင်း၊ ကြည်စင်နေသော ကောင်းကင်ထဲ တိုးသက်စီးဝင်သွားကြသည့် အညိုဖျော့ဖျော့မီးခိုးများသည်လည်းကောင်း၊ ထိုမီးခိုးများအား မှုတ်ထုတ်လိုက်သော နီညိုရောင် ခေါင်းတိုင်နှင့် အုတ်တိုက်ပုပုလေးများသည်လည်းကောင်း၊ သူ့အတွက် ခံစားချက်တစ်စုံတစ်ခု မပေးစွမ်းနိုင်သည်မှာ သေချာလွန်း နေသည်။

““ဟိုကောင်မလေး၊ ဘယ်အချိန်ရှိပြီလဲ၊ ကျောင်းမသွားသေးဘူးလား

ခြံထဲရောက်ရောက်ခ်ျး အလှစိုက်ပန်းအိုးများဖြင့် အလုပ်ရှုပ်နေသည့်။ မိန်းကလေးတစ်ယောက်ကို တွေ့၍ မေးလိုက်ခြင်းဖြစ်သည်။ ထိုမိန်းကလေးသည် သူ့သမီးငယ်ဖြစ်ပြီး စီးပွားရေး တက္ကသိုလ် ဒုတိယနှစ်တက်နေသူလည်း ဖြစ်သည်။ သူ့သမီးက…

““သမီး… ဒီနေ့နေ့လည် ညိုမာတို့ တင်မြင့်အောင်တို့နဲ့ သမ္မတရုံမှာ ရုပ်ရှင်ကြည့်ဖို့ ချိန်းထားတယ် ဖေဖေ။ ကျောင်းမှာလည်း ဒီနေ့ Class မရှိဘူး””

““အေးကွယ်.. ဒါဆိုရင်လည်း အိမ်အပြန်တော့ သိပ် နောက်မကျ နဲ့နော် သမီး””

သူ့စကားကြောင့် သူ့သမီးနှုတ်ခမ်းတစ်ဖက်မဲ့ကာ မျက်နှာအောက်ငုံ့သွားသည်။ သူ့သမီးဆီမှ ထိုကဲ့သို့သော အမူအရာများအား မြင်တွေ့ဖူးဖန်များသောကြောင့် သူမည်သို့မျှ ထိထိခိုက် ခိုက်မခံစားရ။ ယခင်သည်လိုအချိန် သူမနက်ခင်းလမ်းလျှောက်ထွက်ရာမှ ပြန်လာလျှင် သူ့သမီးက ကျောင်းအကြိုအပို့ ဖယ်ရီကားပေါ်ရောက်နေပြီ။ ဒီနေ့တော့ “အင်း… စောစောပြန် လာခဲ့သာ မှာရတယ်၊ သမီးက ဖအေပြောတာ ဆိုရင် သိပ်အလေးအနက်ထားချင်တာ မဟုတ်ဘူး။ အင်းလေ.. ဒီလောက်တော့ ရှိမှာပေါ့။ “သိပ်အရေးမကြီးပါဘူး”ဟု သူ့နှုတ်ခမ်းမှ ခပ် တိုးတိုးရေရွတ်ရင်း အိမ်ထဲလှမ်းဝင်လိုက်သည်။

(ကိုသိန်းဖေ၊ ကျွန်မဆိုင်သွားပြီ၊ မိသက်တို့သားအမိလည်း သူတို့ အဒေါ်နဲ့ မနက်ကပဲ ကျိုက်ထီးရိုးသွားကြတယ်။ ရှင်လိုအပ်တာ ရှိရင်လည်း ထုံးစံအတိုင်း ထွေးလေးကိုပဲ ခိုင်းပါ။)

ဧည့်ခန်းထဲမှWhite Board ကိုကြည့်ပြီး မိန်းမဖြစ်သူနှင့် စကားမပြောဖြစ်တာ သုံးလလောက်တော့ ရှိပြီလို့ တွေးမိတော့ သူယဲ့ယဲ့ကလေး တောင်ပြုံးမိလိုက်သေးသည်။ တကယ်တော့ တမင်တကာ စကားမပြောဘဲ နေကြတာတော့လည်း မဟုတ်ပါဘူး။ အယူအဆမတူညီ သူနှစ်ယောက်အဖို့ ရန်စကားတွေ ပြောနေကြမည့်အစား အတတ်နိုင်ဆုံး နှုတ်ဆိတ်နေကြရာမှ ယခုလို စကားမပြောဖြစ်ကြတာပဲဖြစ်မည်ဟု သူထင်သည်။ ထားနေကျအတိုင်း နံရံတစ်နေရာတွင် လမ်းလျှောက်တုတ်ကောက်လေးအား မှီထောင်ထားလိုက်ကာ အိစက်နေသော ဆိုဖာဆက်တီပေါ်သို့ သူခြေပစ်လက်ပစ်ထိုင်ချလိုက်သည်။

_ _ _

ဒီတစ်လ ထီဖွင့်ဖို့ ဘယ်နှစ်ရက်လိုသေးသလဲ။ အရေးမကြီးပါဘူး။ မြင်ရကြားရသမျှကလည်း မိုးပေါ်က မဆင်းတော့ဘူး။ အရေးမကြီးပါဘူး။ ကမ္ဘာကြီးတစ်နေ့ထက်တစ်နေ့ ကျဉ်းလာ တယ်ဆိုရင် ကြပ်လည်းကြပ်လာမှာပေါ့။ အရေးမကြီးပါဘူး။ နယ်က သော့ခတ်ထားခဲ့တဲ့ ကိုယ့်တိုက်ခန်းပေါ် သူခိုးတက်လို့တဲ့။ အရေးမကြီးပါဘူး။ အရေးမကြီးပါဘူး။ သူ့အတွက်က ပစ်စလတ်ခတ်ပိုလျှံနေသော အချိန်ကာလများ အား အဓိပ္ပာယ်ရှိရှိ ကုန်ဆုံးသွားရန်သာ အရေးကြီးသည်။ ဟင့်အင်း… အဓိပ္ပာယ်ရှိဖို့ဆိုတာတောင် အရေးမကြီးတော့ပါဘူးလေ။ အရေး မကြီးသော အတွေးတွေထဲတွင် လွင့်မျောနေရာမှ အသိတစ်ခုက ခန္ဓာကိုယ်ကို လာကပ်သည်။ သူ့ချွေးမ မိသက်တို့ သားအမိတောင် နယ်ကလာတဲ့ ဧည့်သည်နဲ့ ကျိုက်ထီးရိုးဘုရားဖူး သွားကြတယ်ဆိုပဲ။ အဲဒါကြောင့် စောစောက အိမ်ထဲအ၀င်မှာ တစ်ခုခုလိုနေသလို ခံစားရတာကိုး။

အခန်း(၃)

လေအလှုပ်မှ ယိမ်းရွေ့သွားသော သစ်ရွက်ခတ်သံသဲ့သဲ့အား ကြားရ၏။ ကောင်းကင်မျက်တောင်ဖျားမှာ တိမ်ဖြူတို့ ၀ဲရှပ်လွင့်ပါး နေကြသည်။ အနောက်အရပ်ဆီ ပျံသန်းသွားကြသော ငှက်တစ်အုပ်ကို မြင်နေရသည်။ ဝေးလွန်းသည့်အတွက်ကြောင့် အပြာရောင်ထဲတွင် အမည်းစက်ကလေးများ ညင်သာရွေ့လျားသွားသည့် အသွင်ဖြစ်နေသည်။ သူတို့လည်း ကိုယ့် အဖော်ကိုယ်စီနှင့် ပျော်ရွှင်နေကြပေမည်။ ကောင်းပါသည်။ နားခိုနေရာတာထက် လှုပ်ရှားဆူဝေနေရတာက ဘ၀ပိုဆန်ပါလိမ့်မည်။ ခပ်ညံ့ညံ့လူများ ပြောလေ့ပြောထရှိသော “ဘ၀ဆို တာ တိုက်ပွဲ”ဟူသည့် စကားနှင့် အဓိပ္ပာယ်ခြင်း ဆင်ကောင်းဆင်နေနိုင်သည်။ ဒီလိုပါပဲ။ သူတို့အားလုံး ကြားဖူးနားဝတွေဖြင့် မိုးချုပ်နေခဲ့တာ ကြာပြီ။

ယခုလည်း သူနှင့် သူ့ချစ်သူကောင်မလေး (မျက်ဝန်းပြာမလေး) တို့သည် သမီးရည်းစားတို့လမ်းစဉ်အတိုင်း ပန်းခြံထဲမှာ ချိန်းတွေ့ ရမည် ဟူသည့် ကြောင်တောင်တောင် ကြားဖူးနားဝ အစဉ်အလာကို လိုက်နာသောအားဖြင့် ရေကန်ကြီးကြီးရှိသော ပန်းခြံတစ်ခုထဲတွင် လာရောက်တွေ့ဆုံကြခြင်းဖြစ်သည်။

““မောင်…. ကန်ကြီးက သိပ်လှတာပဲနော်””

သူကတော့ ဖြစ်နိုင်လျှင် ပန်းခြံထဲမှာ သမီးရည်းစားချိန်း မတွေ့ချင်ပါ။ ရုပ်ရှင်ရုံသွား၍လည်း အတူတူမကြည့်ချင်ပါ။ (ထို ရုပ်ရှင်က ကုလားကားဖြစ်နေလျှင် ပိုပြီး စိတ်ရှည်နေရဦးမည်။) နီးစပ်ရာ ဘောလုံးကွင်းတစ်ခုထဲသို့သာ နှစ်ယောက်အတူ သွားနေလိုပါသည်။ (ထိုနေ့ တွင် မည်သည့်ဘောလုံးပြိုင်ပွဲမှ ရှိမနေစေနဲ့ပေါ့။)

““နေဦး… မောင်၊ ဟိုးက အပင်မြင့်ကြီးပေါ်မှာ နားနေတာ ဘာငှက်လဲဟင်””

အဆိုပါ ဘောလုံးကွင်းထဲသို့ ဆေးရောင်ခြယ် ကာတွန်းစာအုပ်တစ်အုပ်-နှစ်အုပ်နှင့် ရောင်စုံခဲတံတစ်ဗူးလည်း ယူလာရပါလိမ့် မည်။ ပျင်းလျှင် ကွင်းထဲဆင်း၍ ဘောလုံးကန်ရန် ဘောလုံးတစ်လုံးလည်း ယူလာရပါလိမ့်မည်။ ဘောလုံးကွင်းသည် ပန်းခြံထက် မျက်စိ နောက်နိုင်စရာ မရှိနိုင်ပါ။ (ပန်းပွင့်လေးများ၏ ရနံ့ကို ရူရိုက်နိုင်ခွင့် ဆုံးရှုံးသွားသော်လည်း ချစ်သူရနံ့ဝင်သက်ထွက်သက်ဖြင့် နွမ်းသောရင်အား ဖြေလျော့ဝပ်ဆင်းပါမည်။) ပြီးတော့ ဘောလုံးကွင်းသည် ပန်းခြံလိုပဲ လေကောင်းလေသန့် အပြည့်အ၀ရနိုင်သည့် နေရာလည်းဖြစ် သည်။ မကောင်းဘူးလား။

““မောင်…ကြည့်၊ မေးနေတာကြာပြီ မဖြေဘူး။ ဘာလဲ မောင်က မော့်ကို ဘေးနားထားပြီး တစ်ခြားကောင်မလေးတစ်ယောက် အကြောင်း စဉ်းစားနေတာလား””

မျက်ဝန်းပြာမလေးက ပြောပြောဆိုဆို သူမပခုံးသားနုနုကလေးဖြင့် ခပ်သာသာတိုက်လိုက်သောကြောင့် သူလန့်သလို ဖြစ်သွား ကာ ဘောလုံးကွင်းလည်း စိတ်ကူးထဲမှ ပျောက်သွား၏။

““ဟာ၊ ဟင့်အင်း… မဟုတ်ပါဘူးကွာ။ မောင်က လာမယ့် စနေနေ့မှာ မောင်တို့ ဘာအစီအစဉ်နဲ့ လှုပ်ရှားရင် ကောင်းမလဲလို့ စဉ်း စားနေတာ””

ကောင်မလေးကို တိုးတိုးတိတ်တိတ်လေး သူလိမ်ညာလိုက်သည်။ ငါတွေးတာတွေမှ သူသိမှ မသိဘဲ။ ဗြောင်လိမ်တာလို့တော့ ဘယ်ပြောရပါ့မလဲဟု သူထပ်တွေးမိပြန်သည်။ ခဏကြာ တော့ ကောင်မလေး သူ့အပေါ် စိတ်ပြန်ကြည်လာကာ သူမ၏ ဆွေမျိုးအသိုက် အ၀န်းများအကြောင်းတွေအား ပြောပြနေပြန်သည်။ ကောင်မလေးပျော်နေရင် ပြီးတာပါပဲ ဟူသည့် သဘောလည်း ကျရောက်ကာ သူ့ထံတွင် ထိုအခိုက်တန့်မှာ လုပ်ကိုင်စရာ ကိစ္စကြီးကြီးကျယ်ကျယ် အဆင်သင့်ရှိမနေခြင်းကြောင့် သူမပြောသမျှကို ဂရုတစိုက် သူနားထောင်ပေးနေ လိုက်သည်။

ကန်ရေပြင်ကို လှုပ်ရှားလှိုင်းထစေသော လှေငယ်တစ်ချို့ပေါ်တွင် စုံတွဲတစ်ချို့ ရှိနေသည်။ ကြည်နူးမှုတစ်ချို့လည်း ရှိနေလိမ့် မည်။ ထိုကြည်နူးမှုတို့သည် နှစ်ယောက်ထိုင်ခုံလေး ပေါ်တွင်လည်း ရှိနေသည်။ တချို့ကြည်နူးမှုများကတော့ ဟောဟိုက စားသောက်ဆိုင် ထဲမှာ စကားစမြည်ပြောနေကြသည်။ သို့သော် ကြည်နူးမှုသည် ခါးသီးသောရမ္မက်အသွင်ပြောင်း ၍ ၀ါးရုံပင် ခြုံကွယ်များနောက်တွင်လည်း ရှိ နေကြ၏။

ကောင်မလေးနှင့် တစ်လမ်းထဲနေသည့် သူ့သူငယ်ချင်း၏ အကူအညီဖြင့် (အတိုချုပ်ပြောရလျှင်) ကောင်မလေးနှင့်သူ ချစ်သူဖြစ်ခဲ့ကြသည်။ သည်ကာလကြားထဲ ယောက်ျားပျိုတစ် ယောက်က မိန်းမပျိုတစ်ယောက်၏ အချစ်အတွက် ထိုက်သင့်သလောက်ပေးဆပ်မှုများဖြစ် သည့် အချိန်ကာလ၊ ဘာနေ့ညာနေ့အမှတ်တရလက်ဆောင်၊ အားနာစိတ်ပျက်မှု၊ ကိုယ်နှင့် ရည်းစားလုဖော်လုဖက်၊ မျိုးရိုးနှင့်ပညာအရည်အချင်း။ နောက်… ငွေ (သို့မဟုတ်) ရေ (သို့မဟုတ်) အာရကေ (သို့မဟုတ်) သြညနပ မန်းနီး စသဖြင့်ပေါ့… သမာရိုးကျဆန်ဆန် မိုက်မဲမှု တွေပေါ် ရင်ခုန်နားခိုခဲ့သော အ၀ါရောင် မပီမသနေ့ရက်တွေလေ။ အခုထိ လတ်ဆတ်ချင်ယောင်ဆောင်ထားတုန်း….

အခန်း (၄)

အိမ်အပြင်ဘက် ခြံဝန်းဆီမှ အမျိုးအမည်မသိ ငှက်တစ်ကောင် အော်မြည်နေသံကို ခြောက်ကပ်စွာ ကြားနေရသည်။ နေ့လည်ခင်း သည် ပွင့်ဖတ်တစ်ဝက်တစ်ပျက် ကြွေကျနေသည့် ရိုးတံငေါငေါ နှင်းဆီကိုင်းခြောက်တစ်ခုလို စိတ်ပျက်ဖို့ကောင်းလွန်းနေသည်။ ဘာကြီးလဲ… ဘာလိုအပ်နေတာလဲ …လက်ထဲမှ ဇွန်းနှင့်ခက်ရင်းကိုချကာ အနီးက ဖန်ခွက်ထဲရှိရေကို သူ ကောက်မော့လိုက်သည်။

သူနှင့် မျက်နှာချင်းဆိုင်မှာ အသက် (၁၀) နှစ်အရွယ် ကောင်လေးတစ်ယောက် ထမင်းထိုင်စားနေသည်။ စားနေရင်းမှ သူ့ဘယ် ဘက်ရှိ အသက် (၃၀) ခန့်လောက် မျက်နှာထားတည် တည်နှင့် အမျိုးသမီးထံ လှမ်းပြီး စကားပြောနေသည်။ ထိုအမျိုးသမီး၏ ဘေးတွင် ပါးစပ်မှာ ဟင်းဖတ်များပေကျံနေသောအသက် (၃) နှစ်အရွယ် ကောင်မလေးတစ်ယောက် ထမင်း ထိုင်စားနေသည်။ သူတို့ပြောနေကြသော စကားများကိုတော့ သူမကြားရပါ။ သည်အဖြစ်အပျက်တွေက ဟိုအရင် (၁၆) နှစ်အလွန်မှာ ကျန်ရစ်ခဲ့လေသည်။

ထမင်းစာခန်းသည် ရှိရင်းစွဲအခြေအနေထက် ပိုမိုတိတ်ဆိတ်သွားသလို ခံစားရသည်။ စောစောက သူကောက်မော့လိုက်သည့် ရေတွေလည်း လည်ချောင်းထဲမှာပင် ခြောက်ကပ်သွားပုံရ ၏။ ရင်ဘတ်ထဲထိမရောက်၊ ယခင်ရက်တွေတုန်းကလို သူ့ချွေးမမိသက်တို့ သားအမိ မရှိတာလည်း ပါမည်။ သူ့ချစ်မြေးဖိုးဇော်က အလွန်အဆော့သန်တဲ့ကောင်။ ဒီကလေးတောင် ရှေ့လဆို (၅) နှစ်ပြည့်ပြီ၊ ရှိပြီပေါ့လေ။ သူအဖေ ဇေယျာလတ်တောင် (သူ၏သားအကြီးဆုံး) ဘာလိုလိုနဲ့ မလေးရှားသွားတာ (၃) နှစ်ရှိပြီပဲ။

အေးခဲစပြုနေသော အတွေးအိုတို့ဖြင့် ထမင်းစားစားပွဲမှ မထဘဲ သူငိုင်နေဖြစ်သည်။ နေ့လည်ခင်းသည် တံလျှပ်ထနေသည့် ကန္တာ ရလွင်ပြင်တစ်ခုဆန်ဆန် တိတ်ဆိတ်ဆဲ…။

““ဘဘကြီး၊ ပန်းကန်တွေ သိမ်းလိုက်ရတော့မလား””

အသံတစ်ခုကြောင့် သူ့တစ်ကိုယ်လုံး ဆတ်ခနဲဖြစ်သွား၏။ အိမ်မှာ အ၀တ်လျှော်ထမင်းချက်ရန် သူ့မိန်းမ နယ်မှခေါ်ထားသော ထွေးလေး၏ အသံဖြစ်နေသည်။ ထွေးလေးကို သူခေါင်း တစ်ချက် ညိတ်ပြလိုက်သည်။

““ဘဘကြီး ဒီနေ့ထမင်းသိပ်မစားဘူးနော်၊ မမလေး နှင်းချိုလတ်လည်း စားမသွားဘူး၊ ရုပ်ရှင်ရုံရောက်မှပဲ တစ်ခုခုဝယ်စားတော့ မယ်တဲ့…။””

ထမင်းစားခန်းထဲမှ သူထွက်လာခဲ့သည်။

ပထမတော့ ဧည့်ခန်းဘက်သွားရန် ဟန်ပြင်ပြီးမှ မသွားဖြစ်ဘဲ အိပ်ခန်းထဲဝင်ကာ တံခါးပိတ်လိုက်သည်။ တစ်ယောက်တည်းရှိနေ ကာမှ အထီးကျန်ဆန်မှုက သူ့အပေါ် သိသာစွာ ဖိစီး ကျဆင်းလာသလို ခံစားရ၏။ သွေးတိုးရောဂါဖြင့် အလုပ်မှ ဆေးပင်စင်ယူစဉ်ကာလအထိ တော့ သူ့ဘ၀က လှုပ်လှုပ်ရှားရှားရှိခဲ့သည်။ “ရှင် ဒီရောဂါကြီးနဲ့ အလုပ်လုပ်တော့ကော ဒီအိမ်မှာ ငွေဘယ်လောက်ဝင်လာမှာမို့လဲ”၊ သူ့မိန်းမ၏ အသံခပ်စူးစူးက သူ့မျက်နှာပြင် အရေးအကြောင်းတွေပေါ် ဖျတ်ရိုက်သွားသည်။ သည်တုန်းက သူတို့လင်မယား တကျက်ကျက် ပေါ့။ သူတို့ အိမ်ထောင်သက် (၁၈) နှစ်လောက်မှာပင် သူ့မိန်းမ၏ အဖေ၊ (သူ့ယောက္ခထီးကြီး) ဆုံးသဖြင့် ဗိုလ်ချုပ်ဈေးမှ ရွှေဆိုင်တစ်ဆိုင် အပါအ၀င် အမွေတွေအတော်များများ ရလိုက်ကြသည်။ အခုတော့လည်း တစ်အိမ်လုံး သည်ရွှေဆိုင်နှင့်ပဲ စားသောက်နေကြသည်။ သူကတော့ အားလုံး ၏ အမြင်မှာ လူပိုသက်သက်။

အခန်း (၅)

သူ့လက်ထဲတွင် ဆေးသားရောင်စိုလွင်နေသော ဓာတ်ပုံတစ်ပုံကို ကိုင်လျက်သာရှိ၏။ ဓာတ်ပုံထဲတွင် မျက်ဝန်းပြာပြာနှင့် ကောင်မ လေးသည် ဘေးတိုက်မကျတကျ အနေအထားမျိုးဖြင့် သူ့ကို ပြုံးပြနေသည်။

““ဒီပုံကို မောင်ယူထားလိုက်တော့… မော့်ကိုလွမ်းရင် ထုတ်ကြည့် နိုင်တာပေါ့””

ကောင်မလေးမျက်နှာက ရှက်ကိုးရှက်ကန်းဖြစ်နေသည်။ မျက်ဝန်းပြာမလေးရယ်… နင်ရဲ့ အဲဒီအပြုအမူလေးတွေကိုပဲ ငါက ချစ်နေမိတာပါ။ သူက ကောင်မလေး၏ဓာတ်ပုံကို ဒိုင်ယာရီ စာအုပ်အပြာလေးထဲ ညှပ်ကာ လွယ်အိတ်ထဲ အသာအယာထိုးထည့်လိုက် သည်။

““ကိုယ်ပေးမယ့်လက်ဆောင်ကိုတော့ ခါတိုင်းလို ခရစ္စမတ်နေ့ ကျမှပဲ ယူတော့နော်… မော်””

သူ့အပြောကြောင့် ကောင်မလေးခေါင်းကို ဆတ်ခနဲ ညိတ်ပြသည်။ ကြည့်၊ သိပ်ချစ်ဖို့ကောင်းတဲ့ ငါ့ရဲ့မျက်ဝန်းပြာမလေး…

နှင်းဝတ်နှင်းမှုန်တို့ဖြင့် တလက်လက်လူးပေနေသော ချစ်သူဆံနွယ်ကြားမှာ နှင်းဆီဖြူတစ်ပွင့် ထိုးစိုက်ပေးချင်သည်။ ပိတောက်ပင် နှစ်ဆယ့်သုံး ပင်တန်းစီနေသော ကျောက်ခင်းလမ်း တစ်လျှောက် ငါတို့ လမ်းလျှောက်ကြရအောင်။ လမ်းကြားမှ အမှိုက်ပုံကို ခွေးငါးကောင် တိတိ မွှေနှောက်နေသည်။ နက်မှောင်ပြာရီသော လွမ်းဆွတ်ကြေကွဲတတ်မှုများ မလာပါနှင့်။ မိန်းမပျိုတစ်ယောက်၏ ရယ်သံလိုလို ခပ်ညှင်း ညှင်းတိုက်ခတ်နေသည့် လေပြေသည် မုန်တိုင်း၏ ကနဦးကစ စစ်မောင်းသံဖြစ်ကြောင်း အတော်ကြီးနောက်ကျမှ သိလိုက်ကြရ၏။ အသစ်တဖန် မပိုင်ဆိုင်တော့သော ပါးလျလျအိပ်မက်မြူတို့အား လက်ခုပ်ဖြင့် လိုက်လံဖမ်းဆုပ်ရင်း လေးလံနေသူတစ်ဦးရှိသည်။ ယုံကြည်ရာ အသီးသီးမှာ ရူးသွပ်နေကြသည့်လောက တွင် ဘာတွေကို ယုံကြည်ပစ်လိုက်ရမှာလဲ။ ကဲ… ပြော။

အခန်း (၆)

မည်သို့ပင်ဖြစ်စေ ဤကမ္ဘာ၏ နံနက်ခင်းတစ်ခုမှာတော့ သူ့အနေနှင့် တစ်စုံတစ်ခုလောက်တော့ ရူးသွပ်ယုံကြည်ခွင့်ရှိကြောင်း သူ့ကိုယ်သူ ပြောပြနေမိသည်။

_ _ _

လွမ်းဆွတ်ရီဝေစရာကောင်းသော အနမ်းတစ်ချို့အား ပန်းတစ်ခြမ်းဖြင့် ပို့လိုက်ပါ။ ဟောသည်မှာ… ခံတွင်းပျက်လူနာတစ်ယောက် လို ဆို့မှိုင်းမှိုင်းရနံ့ဖြင့် ဘ၀ကိုယ်တိုင် အစားမမှန် အ သောက်မမှန် ဖြစ်နေသည်။

ခရမ်းနုရောင်အသွင် မျှော်လင့်မှုများသည် ထင်ထားသလောက် မလေးနက် မခန့်ထည်ခဲ့ပါ။ အရည်ရွှမ်းမြနေသည့် လိမ္မော်သီး ကလေးများသည် ထင်မှတ်ထားသလောက် မချိုမြိန်ခဲ့ပါ။ နှုတ်ခမ်းသားထွေးထွေးပေါ် ထိတယ်ဆိုရုံလေး နမ်းခဲ့ဖူးသည့် အနမ်းများကလည်း ယုံကြည်ထားသလောက် ရင်ခုန်၍ မနေခဲ့ပါ။ ဆောင်းညကောင်းကင်မှ ကြယ်စုံဖူးများသည်လည်း စိတ်ကူးထားသလောက် လွမ်းဆွတ်ချင်စရာ မကောင်းခဲ့ပါ။ ထို့ကြောင့် လွမ်းဆွတ်ရီဝေချင်စရာကောင်းသော အနမ်းတစ်ချို့အား ပန်းတစ်ခြင်းဖြင့် ထပ်ပြီး ပို့ပေးလိုက်ပါ။

အခန်း (၇)

နံနက်ခင်းသည် ဖြူရော်ရော်နှင်းခိုးငွေ့များကြား ကကြိုးသစ်ကို  ဆင်ယင်နေပြီ။ ရေခဲငွေ့သီးသော စကားသံများဖြင့် ကမ္ဘာမြေသည် ရှင်သန်နိုးထ လူးလွန့်စပြုခဲ့ပြီ။ သည်နေ့ ခရစ္စမတ် နေ့။

သူက ထိုင်နေကျလက်ဖက်ရည်ဆိုင်မှာပင် ထိုင်နေသည်။ သူ့ လက်ထဲတွင် ဟောင်းမြေ့နေသည့် ဓာတ်ပုံတစ်ပုံနှင့် အတန်ငယ် ၀ါရော်စပြုနေသော ခရစ္စမတ်ကဒ်လေးတစ်ခုကို ကိုင် ဆောင်ထားသည်။ ထိုအရာဝတ္ထုလေးနှစ်ခုအား သူ့လက်ဖျားများဖြင့် (ယခုပင် ပျောက်ပျက်သွားတော့မည့်အလား) မကြာခဏ ပွတ်သပ်ထိစမ်းနေပြန်သည်။ သူ့ခေါင်းပေါ်မှ ဆံပင်များ သည်လည်း အဖြူရောင်ကျိုးတိုးကျဲတဲ ရှိနေ ခဲ့ပြီ။ ဓာတ်ပုံထဲမှာတော့ သူ့မိန်းမ (ဒေါ်) ၀င်းဝင်းမော်သည် သူမမြင်ဖူးသော အပြုံးမျိုးဖြင့် သူ့ကိုပြုံးပြနေလေသည်။

အခန်း (၈)

သူက ပီကေတစ်ခု၏ ချိုမြိန်သော ကာလများအား ရူးသွပ်ယုံကြည်မိလိုက်ခြင်းသာ ဖြစ်ပါသည်။

လွန်းဆက်နိုးမြတ်

ချယ်ရီ၊ဇန်န၀ါရီ၊၂၀၀၅

ကြယ်စုံသစ်ပင်ဝတ္ထုတိုစု၊(ဆရာမင်းလူ၊ဆရာတာရာမင်းဝေတို့နှင့် တွဲဖက်၍)

ငါးရိုးပင်လယ်ဝတ္ထုတိုစု။

ပန်းချီ-ဖေစိုးအောင်

ကိစ္စပြီးတော့ ဒေစီနဲ့ အခါတိုင်းလိုပဲ စကားပြောဖြစ်ကြတယ် တကယ့်ကို နွေးထွေးချိုမြိန်ထူးကဲတဲ့ အခိုက်အတန့်ကလေးပါပဲ ကိစ္စမပြီးခင်တုန်းက ဒေစီအော်သလို လေသံမျိုးနဲ့ သူလိုက် အော်ပြတော့ အိပ်ယာတစ်ဖက်ကို ဒေစီရှက်ပြီး လှည့်သွားတယ် ဒါပေမယ့်ခဏနေတော့ ဒေစီတဟင်းဟင်းရယ်ရင်း သူ့ခန္ဓာကိုယ်အောက်ပိုင်းကို လာပွတ်ပြန်တယ် ပေါင်တွင်းသားတွေ ပေါ်က ဒေစီ့လက်ချောင်းလေးတွေရဲ့ နူးညံ့မှုကို သူရနေတယ် သူ့မျက်လုံးတွေကို မှိတ်ပြီး ငြိမ်ခံနေလိုက်တယ် အဲဒီ့အချိန်မှာပဲ ပေါင်ပေါ်မှာ စူးခနဲဖြစ်သွားလို့ သူလန့်သွားတယ် မှိတ် ထားတဲ့ မျက်လုံးတွေကို ကမန်းကတန်းဖွင့်ကြည့်တော့ ဒေစီက ဘောပင်တစ်ချောင်းနဲ့ ပေါင်ပေါ်မှာ အရုပ်ဆွဲနေတာ အလစ်မို့ သူခံလိုက်ရတယ် ဘာတွေ လျှောက်ဆွဲနေတာလဲလို့ ဒေစီ့ ကို ခပ်တိုးတိုးလှမ်းမေးလိုက်တယ် တက်တူးဆွဲနေတာ ငြိမ်ငြိမ်နေလို့ ထုံးစံအတိုင်း ဒေစီက ညစ်ကျယ်ကျယ် ပြန်ဖြေတယ် ကိုယ်က တက်တူးဆို အရမ်းမုန်းတာလို့ သူထပ်ပြောလိုက် တယ် ငြိမ်ငြိမ်နေလို့ ပြောနေတယ်နော်လို့ ဒေစီအော်ရင်း ပေါင်ပေါ်မှာ စူးခနဲ နာသွားတယ် ဒေစီတမင်ညစ်နေပြီမှန်းသိတော့ သူဘာမှ ဆက်မပြောဖြစ်တော့ဘူး အဲဒီ့အစား မျက်လုံးတွေ ကိုပဲ နောက်တစ်ခါပြန်မှိတ်လိုက်တယ် နည်းနည်းကြာသွားတော့ ပြီးပြီ ဒေစီဆွဲထားတဲ့ တက်တူး စောက်ရမ်းလန်းတယ်ဆိုပြီး ခပ်ဆာဆာအသံမျိုးလေးနဲ့ ဒေစီလုပ်ပြောတယ် ကိစ္စပြီး တိုင်း ဒေစီဆီ့က အဲဒီလိုအသံမျိုးလေးတွေ မကြာခဏကြားနေကျပဲ သူကြည့်မလို့ မျက်လုံးတွေဖွင့်ပြီး ခါးမတ်ဟန်ပြင်တယ် နေဦး မကြည့်နဲ့ နောက်မှကြည့်လို့ ဒေစီက ဇွတ်ပြောရင်း သူ့ ကို အိပ်ယာပေါ်ပြန်လှဲချတယ် ဒေစီမှားနေပြီ တက်တူးဆိုတာ ဆွဲရတာမဟုတ်ဘူး ထိုးရတာလို့ မကျေနပ်တဲ့လေသံနဲ့ သူပြန်ပြောတုန်းတန်းလန်း အိပ်ယာခင်းပေါ် ပြန်လဲကျသွားတယ် သူ့စကားကို ဒေစီက ဘာမှ စောဒက မတက်ဘူး နောက်မှ ကြည့်လို့ပဲ ထပ်ပြောတယ် ဒါပေမယ့်လို့ နောက်တော့ သူဒီအကြောင်းကို လုံးလုံးမေ့သွားတယ် မေ့သွားတာမှ အိမ်က လေဒီ မာဂရက်ကြီးနဲ့ ကိစ္စဖြစ်ခါနီးလေးမှ ဖျပ်ခနဲ သွားသတိရတော့တာပဲ အိုး နိုး အအေးလှိုင်းဖြတ်သလား ဘာလားမသိ ဒီရက်တွေ သိပ်အေးလွန်းလို့ ရေတောင် သူမချိုးဖြစ်။        ။

လွန်းဆက်နိုးမြတ်
၂၅.၁.၁၂
မနက် ၀၂း၀၀နာရီ

စိတ်တိုင်းကျတာလေး တစ်ခုတစ်လေလောက်တောင် မလုပ်မပြုတော့ဘူးလား
စက်သေနတ်ပစ်ခတ်သံတွေ စပီကာထဲ လာစိုက်ပြီး ရုပ်ရှင်ပိတ်ကားဟာ မဲမှောင်ကျသွားခဲ့တယ်
ကဲ မင်းဘယ်လမ်းကို ရွေးမလဲ ရှေ့မှာလည်း အုတ်တံတိုင်းကြီးက ပျော်ပျော်ရွှင်ရွှင်ပိတ်ဆို့လို့
ခနော်နီခနော်နဲ့ပဲ ကျောက်တိုင်ထူခဲ့တယ် ဘယ်တော့မှမမေ့ဘူး အဲဒီ့လွင်ပြင်ကို ထုံးနဲ့ကွင်းပြီး
မှတ်သားထားတယ် အိပ်မက်ဟာ ညနေတိုင်း ခေါင်းငိုက်စိုက်မူးပြဲနေခဲ့တာချည်းပဲ အိပ်မက်ထဲမှာ။
ကိုယ့်ကို ပြန်မချစ်လဲနေပါကွယ် မတွင်တဲ့ ဗျူဟာတွေ ခင်းနေမယ့်အစား ကိုယ့်ဘာသာပဲ
ကိုယ့်အာသာကိုယ်ဖြေပါ့မယ် ဘယ်သူနဲ့မှ ၏သည်မရွေး အသံထွက်ချင်းမတူချင်လို့ နှုတ်ပိတ်ထား
ကာမှ အအ နဲ့ပိုတူသွားတယ် သစ်ကိုင်းခြောက်ထိပ်ဖျားမှာ စကူစွန်အလောင်းတွေမြင်မကောင်းဘူး
မကောင်းမြင်တာမဟုတ်ပါဘူး ဘယ်လိုမှ အကောင်းမြင်ကြည့်လို့ မရလို့ပါ အာဟ အာဟ အာဟ
ထူးခြားထင်ရှားသူတို့၏ မထင်ရှားသော အဆိုအမိန့်များ မထင်ရှားသူတို့၏ ထူးခြားထင်ရှားသော
အဆိုအမိန့်များ အဆိုအမိန့်ဆိုသည်မှာ ဓာတ်ကြီးလေးပါးမဟုတ် ဗုံမဟုတ် ပတ်မဟုတ်
မောင်ကောင်းထိုက်ဟာသတွေ တစ်အုပ်ပြီးတစ်အုပ်ထိုင်ဖတ်တာကမှ ဟုတ်တုတ်တုတ်ရှိသေး
ရေးတေးတေးပဲမှတ်မိတော့တယ် မိုးတွေ တ၀ုန်းဝုန်းရွာနေတဲ့ ကြားက ကြောင်တစ်ကောင်အော်သံ
မနက်ဖြန် ဘာဝတ်သွားရင်ကောင်းမလဲ ဘယ်ဖိနပ်စီးရင်ကောင်းမလဲ ဘယ်အချိန် အိမ်ကထွက်မလဲ
ဘ၀မှာ ကြက်ခြေခတ်တွေ အများကြီးဖြစ်ခဲ့တယ် ရှိခဲ့တယ် ရခဲ့တယ် အဲဒီ့အတွေအကြုံအရ
သူအခု ကြက်ခြေထောက်သုပ်ရောင်းနေတယ် ရောင်းနေတယ် ရောင်းနေတယ် ရောင်းနေတယ်
စောစောက တစ်ကြောင်းပြန်ကောက်မယ် ရေးတေးတေးပဲ မှတ်မိတာ ကြောင်အော်သံမဟုတ်ဘူး
လူတွေကြားမှာ သားရေကွင်းဥပဒေသဟာ ခေတ်စားတယ် ငွေရှိရင် ဘာမဆို ချုံ့ချဲ့နိုင်တယ်
အီးအီးကို အီတလီနှာခေါင်းနဲ့ နမ်းလည်း နံတာပဲ ဂျာမန်နှာခေါင်းနဲ့ နမ်းလည်း နံတာပဲ
စာသံပေသံကြားရင် အိမ်ရှေ့ထွက်မကြည့်နဲ့ အလကားနေရင်း ကျမ်းကိုးကျမ်းကားထဲ ညှပ်သွားမယ်
အခု ဒီအရေးအသားကို သားရေခွာ အစာသွတ် ရုပ်လုံးသွင်းပြီး အစိမ်းပြန်ချုပ်ထားလိုက်
ရေဒီယိုက စတင်လွှင့်တဲ့ နောက်ဆုံးသီချင်းကို နားထောင်ချင်လွန်းလို့ ပါးစပ်တွေ ပလုတ်အမြန်ထ
ကျင်းပစ်လိုက်မှ မျက်လုံးတွေ ကြည်လင်သွားတော့တယ် မဆိုစလောက် အပျိုရည်ပျက်နေပုံရတဲ့
ညနေခင်းကို ရင်ဆိုင်ရတာဟာ ဆိုစမှတ်ပြုလောက်စရာဖြစ်သွားလေရဲ့ ညညဆို တိုးတိုးတိတ်
တိတ် ပြောတဲ့အသံတွေ နားငြီးအောင် ကြားရလို့ နှလုံးသားကို စိတ်မရှည်ဘူး ဒီကမ်းသောင်မှာ
ပိုးစိုးပက်စက်ဟစ်အော်ဖွင့်ထုတ်ပစ်လိုက်စမ်း ငါ့အပြစ်တွေ ငါ့အမှားတွေ ငါ့ညံ့ဖျင်းနုံချာမှုတွေ
ငါ့မိုက်ရိုင်းစုတ်ပဲ့သိမ်ဖျင်းမှုတွေ ငါ့ညစ်ပတ်ကောက်ကျစ်ယုတ်မာဖျံကျမှုတွေ ငါ့…Cut…Cut..
တော်ပါတော့ မင့်ဟာက ကိုးရီးယားလမ်းနီးလွန်းလှချေရဲ့ကွာ ကောင်းကင်ရဲ့ အနောက်တောင်
ထောင့် ပျံသန်းသွားကြတဲ့ စာကလေးခွေတွေ ကြည့်ရတာ တဂျွတ်ဂျွတ်နဲ့ အရသာရှိတယ်
သစ်ပင်ခွကြားမှာ လင့်စင်ထိုး စခန်းချ ရာသီချိန်စောင့်ပြီးရင် တစ်တစ်ခွခွသာ လင်းပွင့်ပစ်ပြ
လိုက်ရရှာ သစ်ခွပွင့်လေးခမျာ လွန်ခဲ့တဲ့နှစ်ကာလတွေတုန်းက အသစ်စက်စက် လန်းလန်းဆန်း
ဆန်း ထိခရုန်းရွက်များ ရပ်ဝေးနေအိမ်နီးနားချင်းတစ်ယောက်ဆီ ယတြာအဖြစ်ပို့ဆောင်ပါ
အရောင်းကောင်တာနောက်ကနေ ရင်ကလေးပင့် တင်ကလေးပစ် လျှာကလေးလှစ်ပါ လောက
ကွင်းလယ်မှာ မိတ်ဆွေစစ်လောက်စာလုံးက ရှာရခက်ရင် မေးထူးခေါ်ပြော ပါတနာကျောက်စရစ်ခဲ
အနေတော်ကလေးတွေသာ ပန်းစပယ် နန်းအလယ် မပေါ်ခိုက်ဟာမို့ အလိုက်တော်တန်သင့်ရုံပ
ခံပွင့်ကိုကုံးပါ အကြိမ်တစ်သိန်းခြစ်ရင် အလွယ်တကူ တစ်ခါမတောက်ဘူး တစ်ခါမစွဲဘူး တစ်ခါမကူး
ဘူး တစ်ခါကူးစွဲတောက်လောင်ပြီပဲထား အလင်းအား အပြင်းအပျော့ဒီဂရီနှုန်းချင်းမတူဘူး ဓားကျမ်း
စာမျက်နှာတွေက ဓားရွက်တွေလိုပဲ ဖတ်လိုက်တိုင်း စိတ်ကို ရှတယ် ကြယ်တံခွန်တွေဆီ ဖုန်းလှမ်း
ခေါ်တိုင်း ဖြေဆိုမယ့်သူမရှိပါလို့ ဖြေဆိုတယ် ယဉ်ကျေးမှုမရှိဘူး အလကားအရိုင်းအစိုင်းကောင်
တစ်နယ်တစ်ကျေးက လာလည်တဲ့ ဧည့်သည်ကို ဧည့်ခန်းထဲမှာ တစ်ယောက်တည်းထိုင်ခိုင်းပြီး
လှမ်းပြောတယ် ဗိုက်ဆာရင် တစ်ခါတည်းဝင်စားသွားလေ အိမ်သာထဲက ညှစ်အော်သံ။    ။

လွန်းဆက်နိုးမြတ်
၁၁.၉.၁၁/မနက်၀၀း၁၅နာရီ

သင်္ကေတကျမ်းစာ

၁။ ဇူလိုင် ၈၊ စက်တင်ဘာ ၁၇ ထွက်ခွာရာပြပုဒ်

သမိုင်းမှာတော့ ၁၉၅၀ ဇူလိုင် ၈ ရက်မှာ ဗိုလ်ချုပ်မက်အာသာကို ကုလသမဂ္ဂတပ်များရဲ့ သေနာပတိအဖြစ် ကိုရီးယားမှာ ကြီးကြပ်စေပြီး ၁၇၈၇ ခုနှစ်၊ စက်တင်ဘာ ၁၇ ရက်နေ့ဟာ အမေရိကန်ပြည်ထောင်စုရဲ့ ဖွဲ့စည်းအုပ်ချုပ်ပုံ အခြေခံဥပဒေကို အတည်ပြုတဲ့နေ့ပေါ့။ ဒါပေမယ့် ငါ့အတွက် တော့ အေးစက်ခြောက်ကပ်နေတဲ့ နေ့စွဲပါပဲ။ ၀ါကျင့်နေတဲ့ ပြက္ခဒိန်ပေါ်က ဒီအမှတ် အသားတွေကို မေ့လျော့ပစ်လိုက်ဖို့တော့ ငါမကြိုးစားခဲ့ပါဘူး။ နတ်ဆိုးပိုင်တဲ့ နေ့စွဲတွေအတွက် ငါ့မေတ္တာတရားတွေကိုပဲ လောင်းကြေးထပ်လိုက်ပါရဲ့။ ညည ငါ့ အိပ်မက်ထဲမှာ လေယာဉ်တစ်စင်းဟာ အဝေးကို ပျံဝဲထွက်ခွာသွားနေပေါ့။ ကြည့်နေရင်းနဲ့ တိမ်တိုက်တွေရဲ့အဆုံး…. ဟိုး အဝေးဆုံးကြီးထိပေါ့ကွယ်။ အိပ်ယာက နိုးလာတော့ ငါ့ဝင် သက်ထွက်သက်တွေ ရစ်သမ်မမှန်ဘူး။ ရေဆာလိုက်တာ။ စိတ်ချပါ… ကျန်ရစ်သူရဲ့ သစ္စာတရားဟာ လေးနက်စွဲမြဲနေမှာပါ။ ညရဲ့အဝေးက နာရီသံချောင်းခေါက်သံတွေ အောက်မှာ ငါ့ရင်ဘတ်ကို စိုက်ဝင် သွားတာ အသွားထက်မြလွန်းတဲ့ ဓားတစ်လက်မဟုတ်ခဲ့ဘူး။

လေယာဉ်လက်မှတ်လေးတစ်စောင်သာ။

၂။ သံမဏိရောင်အလွမ်းနဲ့ လမ်းတွေဟာ မဆုံးဘူး

အဆုံးမဲ့တဲ့ လမ်းတွေပေါ်မှာ ငါတစ်ယောက်တည်းလျှောက်နေခဲ့ရင်း ငါ့အသွေးအသားတွေအနှံ့ ငါ့နံရိုးအကြိုအကြားတွေထဲအထိ ငါ့ရိုးတွင်း ခြင်ဆီတွေအဆုံး အလွမ်းဟာ လက်သည်း ချွန်ချွန်တွေနဲ့ ရက်ရက်စက်စက် ငါ့ကို ထိုးခွဲခဲ့ပါတယ်။ ငါတို့အတူဝယ်စားဖူးတဲ့ လမ်းဘေးမှာ အကြော်ရောင်း နေတဲ့ ကုလားကြီးဆီက အကြော်တွေ နှစ်ယောက်စာဝယ်ပြီး ငါတစ်ယောက်တည်း စားပစ်ခဲ့ပေါ့။ ပန်းခြံထဲက နှစ်ယောက်ထိုင် သစ်သားခုံလေးပေါ် ငါတစ်ယောက် တည်း သွားထိုင်ခဲ့တယ်။ အဲဒီနေ့က အကြောင်းတိုက်ဆိုင်လွန်းစွာ ကဗျာ တစ်ပုဒ်ကိုလည်း ငါရေးသားဖြစ်ခဲ့ပါသေးတယ်။ နောက်ပြီး မိုးကလည်း စွတ်စွတ်အီအီ ရွာသွန်းလို့….။ ကောင်းကင်ဟာ ပြာမှိုင်းမှိုင်းနဲ့ ငါ့အလွမ်း တွေကို မဟားဒယားဖြစ်အောင် တွန်းပို့ပေးနေသလို အရောင်မျိုးပေါ့။ ငါဟာ ကုတ်အင်္ကျီအိတ်ပေါက်တွေထဲ လက်နှစ်ဖက်ကို ထည့်ပြီး မင်းကို ဆွေးဆွေးမြေ့မြေ့ သတိရနေခဲ့တယ်။ မှန်နံရံတွေ ကာရံထားတဲ့ ဖိနပ်ဆိုင်တွေကို မြင်တော့ မင်းကို လွမ်းလိုက်တာ…။ မင်းက ဖိနပ်ဆိုင်မှန်သမျှကို အလှူပေးတဲ့အိမ်လို သဘောထားပြီး တစွက်စွက်ဝင်ကြည့်တတ်တယ်မဟုတ်လား။ မြို့လယ်ဖိနပ် ဆိုင်ကြီးတစ်ဆိုင်က မင်းအတွက် ငါတို့စပ်တူဝယ်ခဲ့ကြတဲ့ ဝေါကင်းရှူးလေးလည်း ခုလောက်ဆို ဟောင်းနွမ်းသွားလောက်ပြီပေါ့။ ရုတ်တရက် တိုက်ခတ်လိုက်တဲ့ အေးမြ တဲ့ လေရိုင်းတစ်ချက်ကြောင့် ငါ့ခန္ဓာကိုယ်ဟာ တွန့်ခါသွားတယ်။ ဒီအချိန်ဆို လေအေးပေးစက်တွေကြားမှာ ရောက်နေမယ့် မင်းကိုလည်း ဖျတ်ခနဲ သတိရလိုက်မိပါရဲ့။ ““အဖဘုရားသခင် သူမအား ကျန်းမာခြင်းကို အစဉ်အမြဲ ပေးသနားတော်မူပါ။””

အဲဒီနေ့က အလွမ်းကြောင့် ငါ့လည်ချောင်းတွေဟာ ခြောက်ကပ်နခဲ့တယ်။ များပြားလှတဲ့ လူလှိုင်းအုပ်ကြီးကြားက လက်ချင်းတွဲချိတ်ထားတဲ့ စုံတွဲတွေကို မြင်တော့ ငါ့ဘယ်ဖက်ရင်ဘတ် ဟာ နာကျင်သွားမိတယ် ထင်တယ်။ ငါတို့ မကြာခဏ စီးနှင်းလိုက်ပါလာခဲ့ကြဖူးတဲ့ ဘတ်စ်ကားကြီးပေါ်မှာ ခုတော့ ငါ မင်းကို တမ်းတနေခဲ့တယ်။ ထိုင်နေတဲ့ ငါ့ဘေးမှာ မင်းရှိနေရမယ့်အစား ပိန်ကပ်ကပ်သွားခေါခေါ အမျိုးသမီးတစ်ယောက်က ငါ့ဘက်အတင်း တိုးကပ်လို့…။ သြော်.. သူ့ဘက်ပြတင်းပေါက်က မိုးပက်နေတယ်မဟုတ်လား။ ရာသီဥတုက လည်း အေးလိုက်တာ။ မင်းအတွက်ဆိုပြီး ၀ယ်ထားတဲ့ ဆေးပြားတွေက လောလောဆယ် ငါ့အတွက် ဖြစ်လာပြီပေါ့။ သတိရမှုတွေနဲ့ ငါ့ဦးခေါင်းတစ်ခုလုံးဟာ တဆစ်ဆစ်ကိုက်ခဲစပြုလာခဲ့တယ်။ အတူတကွ စားသောက်ဖူးတဲ့ ဆိုင်တွေကို ရှောင်ကွင်းပြီး အဆုံးမဲ့တဲ့လမ်းတွေပေါ် ငါလျှောက်လာခဲ့တယ်။ တကယ်လို့ ဆိုင်တွေထဲ ၀င်မိခဲ့ရင် ငါဟာ မင်းကို ဒီထက်ပိုပြီး သတိရမိသွားဖို့ပဲ ရှိတယ်မဟုတ်လား။ ပြီးတော့ အဲဒီ့အတွက် လောလောဆယ် ငါ့မှာ လုံလောက်တဲ့ငွေကြေးလည်း ရှိမနေခဲ့ဘူး။ ငါ့ရဲ့ ကုတ်အင်္ကျီအိတ်တွေ ထဲမှာ ရေးလက်စ စာမူအကြမ်းတွေပဲ ရှိနေခဲ့တယ်။ ဘာပဲဖြစ်ဖြစ် ယုံပါလေ။ ဒီစာမူအကြမ်းတွေကို တစ်ချိန်မှာ လူတွေက ရွှေတုံးတွေနဲ့ လာရောက်လှဲလှယ်လာကြရပါလိမ့်ဦးမယ်။ ပြီးတော့ အဲဒီ့နေ့က မြို့လေးရဲ့ အမြင့်ဆုံးမျှော်စင်ပေါ်တက်ပြီး မင်းရှိမယ့် အရပ်ဆီ လွမ်းစိတ်နဲ့ ငါ ငေးမျှော်ကြည့်ခဲ့ပါသေးတယ်။ ကောင်းကင်ဟာ ပြာမှိုင်းမှိုင်းအနေအထားကနေ အညိုဖက်ကို ကူးပြောင်းလာနေပြီ။ ဆိုးရွားပြင်းထန်လွန်းတဲ့ ဟော့ဒီ သံမဏိရောင်အလွမ်းတွေ သက္ကရာဇ်ဘယ်နှစ်ခုအထိ နှိပ်စက်နေဦးမှာလဲကွယ်။ ငါ့ မျက်ဝန်းထဲက မျက်ရည်စက် တစ်ချို့ ပေါက်ခနဲ ကျဆင်းလာခဲ့တယ်။

အဲဒီနေ့က မသိမမြင် မကြားနိုင်တဲ့ နေရာတစ်ခုက မင်းဆီ ဘယ်လို နည်းမျိုးနဲ့မှ ငါမဆက်သွယ်ဖြစ်ခဲ့ပါဘူး။ တိတ်တိတ်လေးပဲ ငါလွမ်းဆွတ်နေခဲ့တယ်။

၃။ တည်းခိုခန်း

မကြာခဏရောက်ခဲ့ဖူးတဲ့ တည်းခိုခန်းလေးမှာ ဒီတစ်ခါ တတိယထပ်က အခန်းတစ်ခန်းရတယ်။ မင်းအနမ်းတွေနဲ့ စေးပျစ်လောင်ကျွမ်းရာ နေရာလေးပေါ့ကွာ။ ငါတို့ဟာ တစ်ယောက် ခန္ဓာကိုယ်ကိုတစ်ယောက် တပ်မက်မှုအပြည့်နဲ့ ပြင်းပြင်းပြပြ ဖက်ရစ်တွယ်ထားခဲ့ကြတယ်။ ဘယ်လောက် အင်အားကြီးတဲ့ လက်ချောင်းတွေပဲဖြစ်နေနေ ငါတို့ခန္ဓာကိုယ်တွေ ကို ဝေးကွာအာင် မဆွဲခွာနိုင်ပါဘူးကွယ်။ မင်း မျက်စိတွေမှိတ်ထားချိန်မှာ ငါက တိုးဝင်ပြီး ငါ့မျက်စိတွေ မှိတ်ပစ်လိုက်ချိန်မှာ မင်းက တိုးဝင်လာခဲ့တယ်။ ငါရဲ့သိမ်မွေ့တဲ့ ပျော့ပြောင်း ကျွမ်းကျင်မှုတွေဟာ မင်းကို ကျေနပ်မှုအပြည့် ပေးနိုင်ခဲ့ပါတယ်။ ဒါပေမယ့် အခိုက်အတန့်တစ်ခုအတွင်းမှာ ပြောင်းလဲသွားတဲ့ မင်းပုံရိပ်ကို ငါဘယ်တာ့မှ မေ့နိုင်လိမ့်မယ် မထင်ဘူး။ “သွားမယ် နေချင်နေခဲ့”အဲဒီ့စကားဟာ ငါ့နားထဲ ခုထိပေါက်ကွဲနေဆဲ…။ အခန်းနံပါတ်မမှတ်မိတဲ့ တည်းခိုခန်း တစ်ခုမှာ ဒီအဖြစ်အပျက်ဟာ တိတိကျကျ ဖြစ်ပျက်ခဲ့လေရဲ့။

၎။ အမှတ်တရတွေကို ဘာဖြစ်လို့ မေ့ပျောက်မရနိုင်ခဲ့ရတာလဲ။

မြို့လေးမှာ ချိတ်ဆွဲထားတဲ့ အင်္ဂလိပ်စာသင်တန်းဆိုင်းဘုတ်တွေ မြင်ရတဲ့အခါတိုင်း အဆုံးမဲ့တဲ့ လမ်းတွေပေါ်လျှောက်နေတဲ့ ငါ့ခြေထောက်တွေဟာ ရပ်တန့်သွားမိတယ်။ တစ်ဆက် တည်းမှာပဲ မင်း ကျွမ်းကျွမ်းကျင်ကျင် တတ်မြောက်ထားတဲ့ ဒီဘာသာရပ်အတွက် ငါ့ ဂုဏ်ယူမိပါရဲ့။ ဟိုတုန်းက စနေ တနင်္ဂနွေတွေဟာ ငါ့အတွက် သေရာပါ ဂီတပဲ။ ကားမှတ်တိုင်တွေ က ငါတို့ရဲ့ ချိန်းဆိုမှုတွေ တစ်ချိန်မှာ ပြန်ရနိုင်ဦးမလားလို့ သိချင်တယ်။ အဖြစ်အပျက် တစ်ခုကို သတိရမိတော့ ငါ့ခန္ဓာကိုယ်ဟာ အလိုလိုနေရင်း မိုးရေတွေ ရွှဲနစ်လာသလို ခံစားလာမိရဲ့။ မိုးရွာထဲ ကားတစ်စီးကို လမ်းပေါ်ထွက်ငှားနေတဲ့ ငါ။ ပလက်ဖောင်းမှာ ထီးတစ်ချောင်းအောက် ရပ်နေတဲ့ မင်း။ တစ်စစနဲ့ မိုးသားတွေသာ ပိုမိုထူပြောလာတယ်။ ငါတို့က ကားတားလို့ မရခဲ့ဘူး။ ဒီလိုနဲ့ မင်းရဲ့အဝေးခရီးမှာ ယူဆောင်သွားမယ့် ခရီးဆောင်အိတ်ကို သည်းထန်နေတဲ့ မိုးရေထဲ ငါ့ပုခုံးနဲ့ ထမ်းသယ်လာခဲ့ပါတယ်။ အလွန်အမင်း လေးလံစွာနဲ့။

ငါနဲ့မင်းကြားမှာ တယ်လီဖုန်းခေါ်သံတွေဟာ ဖွံ့ဖြိုးလွန်မြို့ပြ တိုက်တာတွေလို တဖြည်းဖြည်းထူထပ်မြင့်တက်လာခဲ့တယ်။ ငါ့အပေါ် ထားရှိတဲ့ မင်းရဲ့ မေတ္တာတရားတွေဟာ တယ်လီ ဖုန်းကြိုးလေးတွေထဲကနေတစ်ဆင့် ငါ့ဆီတသွင်သွင်စီးဆင်းခဲ့ဖူးတယ်။ စိတ်ဓာတ်ကျနေတဲ့ မင်းအတွက် ငါ့ရဲ့ အားပေးတိုက်တွန်းမှုတွေဟာလည်း တယ်လီဖုန်းခွက်တွေ ထဲမှာ တောက်ပခဲ့ပါရဲ့။ မင်းရဲ့ ဖြတ်တောက်ရက်စက်မှုကိုလည်း တယ်လီဖုန်းထဲကနေပြီး ငါလက်ခံခဲ့ဖူး သေးတယ်လေ။ အိပ်မပျော်တဲ့ ညတွေမှာ ငါဟာ မင်းဆီက တယ်လီဖုန်းသံ ကို မျှော်လင့်လို့ပေါ့။ တယ်လီဖုန်းဟာ ငါတို့နှစ်ယောက် အကြားမှာ အရေးပါတဲ့ ကူးလူးမှု။ ဟိုတုန်းက ငါဟာ ပိုနီတေးဆံပင်ပုံစံနဲ့… မဂ္ဂဇင်းမှာ ဖော်ပြခံရတဲ့ ကဗျာတစ် ပုဒ်ပြီးတစ်ပုဒ်နဲ့… ဂျစ်ကန်ကန်နိုင်တဲ့ စိတ်ကူးစိတ်သန်းနဲ့… ဂျင်းဘောင်းဘီနဲ့… ပြီးတော့ ငါသိပ်ချစ်တဲ့ မင်းနဲ့ပေါ့ကွယ်။ အရာရာကို တစ်ကပြန်စဖို့ ပြင်ဆင်နေတဲ့ လူသားတစ်ဦးဟာ ငါပါကွာ။ မင်းအတွက် ပြန်လည်ပြဋ္ဌာန်းခဲ့တဲ့ ငါ့ဥပဒေသတွေဟာ ခိုင်ခန့်ခဲ့ပါတယ်။ ဒီလိုနဲ့ အသက် ၂၄ နှစ်အရွယ် ကောင်လေးတစ်ယောက်ကတော့ စိုစွတ် တောက်ပတဲ့ အိပ်မက်တွေနဲ့အတူ လိမ္မာခဲ့ပါရဲ့။ တဖြည်းဖြည်းအသားကျလာတဲ့ ငါတို့နှစ်ယောက်ရဲ့ ထပ်တူညီမှုတွေဟာ တသမတ်တည်း ဖြစ်တည်မနေ နိုင်မှန်း အသိနောက် ကျခဲ့တာက လွဲရင်ပေါ့။ မင်းပြောတဲ့ မလိုက် ဖက်ခြင်း အမိန့်စကားတစ်ခွန်း အောက်မှာ မကြာမတင်ဘဲ ရိတ်သင်ပစ်ခဲ့ရတာ လပေါင်းများစွာ မွေးမြူ ထိန်ချန်ထားခဲ့တဲ့ ငါ့ဆံပင်ရှည်တွေလေ။ တကယ်က ဆံပင်ရှည်တွေနဲ့အတူ ငါ့ဆိုးသွမ်းအနိုင်ကျင့်မှုတွေကိုပါ ရိတ်သင်ပစ်ခဲ့တာ ပါကွယ်။

တစ်ခါက ပျောက်ဆုံးသွားခဲ့ဖူးတဲ့ မင်းရဲ့ မှတ်ပုံတင်လေးကြောင့်သာ မဟုတ်ရင် မင်းဆီကို ဂငယ်ကွေ့ပြန်လာတဲ့ ငါ့ကို လွယ်လွယ်နဲ့ မင်းလက်ခံမှာ မဟုတ်တာ သိပ်သေချာတယ်။ မနက်ပိုင်းတချို့မှာ ရေနံဆီဝနေတဲ့ သစ်သား တန်းလျားကြီးလို နှစ်ထပ်အဆောက်အဦထဲက မှတ်ပုံတင် စာရေးမဆီ ငါတို့ အတူတူသွားရောက်ခဲ့တာတွေကို ငါပြန်မှတ်မိပါသေးရဲ့။ အပြန်မှာ ငါတို့ဟာ အဲဒီ့ အဆောက်အဦကြီးနားက စားသောက်ဆိုင်လေးထဲ ၀င်ထိုင်တတ်ကြသေးတယ်။ ရက်အတော်ကြာတဲ့ထိ မင်းရဲ့ မှတ်ပုံတင်လေးအတွက် ငါတို့ အလုပ်ရှုပ် ခဲ့ကြဖူးပါရဲ့။ အမှတ်တရ ရိုက်ကူးခဲ့တဲ့ ဓာတ်ပုံက လေးတွေက ငါ့စားပွဲပေါ်မှာ အမြဲလိုလို ရှိနေခဲ့တယ်။ တစ်ခါတစ်ရံတော့ ဒီဓာတ်ပုံလေး တွေကို ကိုင်ကြည့်ရင်း ၀မ်းနည်းမှုကြောင့် ငါ့ရင်ဘတ်ဟာ ဆို့တက်လာ တတ်တယ်။ ဓာတ်ပုံထဲမှာ မင်းရုပ်က သိပ် မျက်နှာပြောင်တာပဲနော်။

၅။ အကြည့်တွေ ဂစ်တာကြိုးလို တုန်ခါနေခဲ့ကြတယ်။

ဘယ်လို ဗေဒင်ယတြာကိုမှ မယုံကြည်တဲ့ အတွေးအခေါ်ကို မင်းနဲ့ငါ သဘောတူညီခဲ့တယ်။ အဲဒီတုန်းက ငါတီးခတ်တဲ့ တေးသီချင်းတွေကို မင်းက တိုးတိုးကလေး လိုက်ဆိုလို့ပေါ့။ မြို့လေးအနှံ့လျှောက်သွားရင်း မိုးစက်တွေ အောက်ရောက်တဲ့အခါ ငါတို့နှစ်ဦးဟာ အနီရောင်တီရှပ်ကို ဆင်တူဝတ်ပြီး ထီး တစ်ချောင်းတည်းနဲ့ လုံလောက်ခဲ့ကြတယ်။ ပန်းခြံတကာမှာ ငါတို့ထားရစ်ခဲ့တဲ့ ရင်ခုန်သံတွေထက် ပျော်ဖို့ကောင်းတာ ဘာများရှိနိုင်ဦးမှာလဲကွယ်။ အဲဒီတုန်းက ကောင်းကင်ဟာ ဒီနေ့လိုမျိုး မည်းမည်းမှောင်မနေခဲ့ဘူး။ ကမ္ဘာမြေဟာ ဒီနေ့လိုမျိုး ပျင်းရိစရာမကောင်းသေးဘူး။ နောက်ပြီး လမ်းမတွေဟာ လည်း ဒီနေ့လိုမျိုး အဆုံးမမဲ့သေးဘူးကွယ့်။

ငါတို့နောက်ဆုံးတွေ့တဲ့နေ့က တွဲထားတဲ့လက်ကို ဖြုတ်ချပေးလိုက် ရတယ်။ ဆိုလက်စသီချင်းကို ရပ်တန့်ပစ်လိုက်ရတယ်။ နှလုံးသားက ခုန်ရင်း တန်းလန်း ခဏငြိမ်သက်သွားတယ်။ အတိအကျ မမှတ်မိပေမယ့် အဲဒီတုန်းက တိမ်တွေဟာ အုံ့အုံ့မည်းမည်း ရှိနေမှာပဲ။ သစ်ပင်တွေတိုင်းက သစ်ရွက်တွေဟာ အကုန်အစင်ကြွေကျကြမှာပဲ။ ရှိရှိသမျှ တေးရေး ဆရာအကုန်လုံး အလွမ်း သီချင်းတွေကိုပဲ အင်တိုက် အားတိုက် စတင်ရေးဖွဲ့နေကြ မှာပဲ။ ခွဲခွာခြင်းရဲ့ နောက်ဆုံးအကြည့်မှာ ငါတို့အရိပ်တွေက ဂစ်တာကြိုးလို တုန်ခါလို့…။

၆။ လပြည့်ည

ဒီစာစုတွေကို သင်္ကေတကျမ်းစာလို့ အမည်နာမတပ်ပြီး လပြည့်ည တစ်ညမှာ ငါအဆုံးသတ်ရေးသားနိုင်လိုက်ပါတယ်… ဘေဘီ။

လွန်းဆက်နိုးမြတ်

ရတီ၊ ဧပြီ၊ ၂၀၀၈

ငါးရိုးပင်လယ်ဝတ္ထုတိုစု

ပန်းချီ-ဧကစာချို

ဂျက်ကီနှင့် နက်ကျော်အမည်ရှိ ခွေးနှစ်ကောင်ကိုက်ကြသည်။
ခွေးဖြစ်သောကြောင့် ကိုက်ကြသည်။ လူဆိုလျှင် ကိုက်မည်မဟုတ်။ ရှုတော်မူ။

ဂျက်ကီက နက်ကျော်၏ ညာဖက်နားရင်းကို လှမ်းခဲသည်။ နက်ကျော်က လှလှပပတိမ်းရှောင်ကာ ဂျက်ကီ၏ ဘယ်ဖက်ပုခုံးပြင်ကို လှမ်းဟပ် သည်။ ဂျက်ကီက မရှောင်။ အဟပ်ခံသည်။ ပြီးတော့မှ နက်ကျော်၏ လည်မျိုကို မလွှတ်တမ်းလှမ်းခဲသည်။ နက်ကျော်က ရုန်းသည်။ တစ်ခါ၊နှစ်ခါ၊သုံးခါ၊ ရုန်းမရသည့်အဆုံး မြေကြီးပေါ် လှဲချကာ ခါချသည်။ ဂျက်ကီခဲထားရာမှ လွှတ်လိုက်ရသည်။ သို့သော် အပေါ်စီးက ဖြစ်သွားသည်။ နက်ကျော်က အောက်ကနေပြီး လက်တွေ ခြေထောက်တွေ ကာပြီး တဂီးဂီး အသံကုန်အော်သည်။ ခံစစ်။ ဂျက်ကီက နက်ကျော်၏ လက်တွေခြေထောက်တွေ လွတ်ရာဆီ ငုံ့ကိုက်သည်။ တိုက်စစ်။ နှစ်ကောင်စလုံး သားရေတမြားမြား အသံတွေကလည်း တဂီး ဂီးတဂါးဂါး မျိုးစုံအောင် ထွက်နေသည်။ တစ်ကြိမ်မှာ နက်ကျော်က ဂျက်ကီ၏ ညာဖက်လက်ကို လှမ်းဆွဲသည်။ ဂျက်ကီရှောင်ချိန်မရလိုက်။ နက်ကျော် ကိုယ်ပေါ် ပြုတ်ကျသွားသည်။ နှစ်ကောင် သား လုံးထွေးရှုပ်ထွေးသွား၏။ ရေဗွက်တွေလည်း ပေကျံကုန်သည်။ ထိုအရှုပ်အထွေးကြားမှာပဲ နက်ကျော်က ကုန်းထဖို့ပြင်သည်။ ဒါကပဲ မှားသွားသည်။ ဂျက်ကီက နက်ကျော်ကို အထမခံဘဲ မှီရာလှမ်းဆွဲပြီး လိုက်ထသည်။ နက်ကျော်က လည်ပြန်လှည့်ကိုက်သည်။ ဂျက်ကီက ခဲထားသည့် နေရာကို လွှတ်ပြီး နက်ကျော်၏ လည်မျိုဆီ ဗြုန်းစားကြီး ခုန်ကိုက်ပြန်သည်။ ပထမတစ်ခါ ကိုက် သည့်အနာကို ထပ်ကိုက်မိသွားသည်။ နက်ကျော်ဆီမှ နာနာကျင်ကျင် အော်မည်သံထွက်လာသည်။
နက်ကျော်က နာသည့်ဒဏ်နှင့် ပေါင်းကာ အားကုန်သုံးပြီး ဂျက်ကီ့ကို ခါချသည်။ခါချရင်း ဂျက်ကီ၏ ညာဖက်လက်ကို လှမ်းဟပ်ပြန်သည်။ ဂျက်ကီ၏…။ နက်ကျော်က…။ ဂျက်ကီသည်…။ နက်ကျော် လည်း…။ ဂျက်ကီနောက်ထပ်..။ နက်ကျော်ဆက်ပြီး…။ ဂျက်ကီခုန်ကာ…။ နက်ကျော်မှီရာလှမ်း…။ ဂျက်ကီ့ကို…။ နက်ကျော်ဆီ…။ ဂျက်ကီမှာ…။ နက်ေ ကျာ်…၊ ဂျ က် ကီ…။ န  က်  ကီ …။ ဂျ  က်ေ  ကျာ်…။ ဂျ  က် န  က်…။ေ  ကျာ်  ကီ…။ ဂီး ဂီး ဂါး ဂါး … ဂါး ဂါး ဂီး ဂီး …ဂီးဂီးဂီး …ဂါး ဂါး ဂါး … ။

ဂျက်ကီနှင့် နက်ကျော်အမည်ရှိ ခွေးနှစ်ကောင်ကိုက်ကြသည်။
ခွေးဖြစ်သောကြောင့် ကိုက်ကြသည်။ လူဆိုလျှင် ကိုက်မည်မဟုတ်။ ယုံပါလေ။

လွန်းဆက်နိုးမြတ်
၁၇.၉.၁၁
ည၁၀း၃၅ နာရီ
(မျှားသူ၏ “စီခနဲဂျက်ကီ”၀တ္ထုမှ စာသားများကို လိုအပ်သလို ဖြည့်စွက်ရေးသားသည်။)

အခုလို စော်ကားတဲ့အတွက် ကျေးဇူးတင်ပါတယ်။
သင့်ရဲ့စော်ကားမှုဟာ ပန်းတွေ ပွင့်စေပါတယ်။
ရာသီဥတုကိုလည်း သာယာစေပါတယ်။ ကျေးငှက်တွေတောင်မှပဲ
သင့်စော်ကားမှုကို ကောင်းမှုဆောင် တေးသီချင်းတွေ သီကြွေးကြပါလိမ့်ဦးမယ်။
သင့်ရဲ့ စော်ကားမှုဟာ စားကောင်းအိပ်ပျော်တဲ့ နေ့တွေ ညတွေ တစ်ထောင်။
ထက်ရှလင်းလက်တဲ့ ဥာဏ်စဉ်ကွန့်မြူးမှု တစ်သောင်း၊
အူမြူးလှိုက်ရွှင်ဖွယ် အရသာနဲ့ နေထိုင်ခြင်း ကာလပေါင်းတစ်သိန်း၊
တက်ကြွကြည်နူးစရာ ညက်သက်ညင်သာမှုတစ်သန်းနဲ့ ညီမျှပါပေတယ်။
သင့်ရဲ့ စော်ကားမှုသာမရှိခဲ့ရင် ဘ၀ဟာ အဓိပ္ပါယ်မရှိတော့ပါ။
ဒီကမ္ဘာမြေကြီးပေါ်မှာ အသက်ဆက်ရှင်သန်ရခြင်းဟာလည်း
အချည်းနှီးသာပါပဲ။ သင်စော်ကားသမျှ စကားလုံးတစ်လုံးချင်းစီတိုင်းမှာ
ခွန်အားနဲ့ အသက်ဓာတ်ဟာ ကိန်းဝပ်ဖြစ်တည်နေပါတယ်။ သင်စော်ကားတဲ့
ပြုမူလှုပ်ရှားမှုတိုင်းဟာ ကံကောင်းခြင်းဆုလဒ်ရဲ့အပိုင်းအစတွေပါပဲ။
သင်စော်ကားပါမှ မြိုသိပ်သည်းခံခြင်းတွေ တဖွားဖွားဖြစ်ပေါ်လာရတာပါ။
သင့်စော်ကားမှုတွေက အမှန်တရားနဲ့ သိမှုဆိုင်ရာအပိတ်အဆို့တွေအတွက်
အကောင်းဆုံး လမ်းညွှန်မြေပုံတစ်ချပ်ပါပဲ။ သင့်စော်ကားမှုမှန်သမျှဟာ
နောင်နှစ်ပေါင်းများစွာတိုင်အောင် သမိုင်းမှတ်တမ်းတွင်နေဦးမှာ ဖြစ်ပါတယ်။
ထပ်မံလဲပြိုကောင်း လဲပြိုလာဦးမယ့် လောကဓံတွေနဲ့ ရင်ဆိုင်ရချိန်တိုင်းမှာ
သင့်စော်ကားမှုတွေနဲ့အတူ စိတ်ဓာတ်တို့ကို အားယူထူမတ်ရပါဦးမယ်။
သင့်စော်ကားချက်တွေ ပီပြင်လေလေ သင်စော်ကားသည်ထက်
အဆမတန်တန်ဖိုးရှိတဲ့ အတွေးအခေါ်တွေရရှိလာလေလေပါပဲ။
ဒီ့အတွက် သင့်စော်ကားမှုတွေကို များစွာ ပြစ်ပြစ်နှစ်နှစ်ရှိစေချင်ပါတယ်။
များစွာ တရားလက်လွှတ်ဖြစ်စေချင်ပါတယ်။ များစွာလည်း ပိုးစိုးပက်စက်
ဖြစ်စေချင်လှပါတယ်။ များစွာ…များစွာ…များစွာ…စော်ကားပါလေ။
သင့်စော်ကားမှုမှန်သမျှဟာ ရွှေငွေကျောက်သံပတမြားတွေထက်
လွန်စွာမှပဲ အဖိုးထိုက်လှပါပေရဲ့။ ရေနံ၊ ကျောက်မီးသွေး၊
နျူကလီးယား၊ယူရေနီယံ၊ သဘာဝဓာတ်ငွေ့နဲ့ ရေအားလျှပ်စစ်တို့ကဲ့သို့ပင်
သင့်စော်ကားမှုတစ်ခုချင်းစီတိုင်းဟာ အရေးပါအရာရောက်လှပါပေတယ်။
သင်နဲ့ထပ်တူ သင့်စော်ကားမှုတွေ အဓွန့်ရှည်ပါစေသောဝ်။    ။

လွန်းဆက်နိုးမြတ်  
၇.၁၂.၁၁
ည ၁၁း၃၀နာရီ

မရေမရာ ဖီလိုဆိုဖာ

ဤဇာတ်လမ်းကို ကျွန်တော်၏အခြားသော ခပ်ညံ့ညံ့ဇာတ်လမ်းများအတိုင်း အဆီအငေါ်မတည့်သော စိတ်ခံစားချက်များဖြင့် အခြေပြုဖွဲ့တည် ထားပါသည်။

(၁)

ကမ္ဘာကျော်လူလည်ကြီးများ ကုမ္ပဏီအမှတ်တံဆိပ်ပါ ဘီယာတစ်ဗူးအား ဖွင့်ပေါက်သောက်လိုက်ရာ အထဲမှ ပြင်းရှသော ဘီယာရည်များထွက် ကျမလာဘဲ ရယ်မောသံအတုများကသာ ရင်ဘတ်ထဲသို့ တဟီးဟီး ဟားဟား အော်ဟစ်စီးဆင်းသွားကြလေသည်။

ထိုရယ်မောသံအတုများထဲတွင် သူ့မိတ်ဆွေများ၏ ရယ်မောသံအတုများ၊ တီဗွီကြော်ငြာတစ်ခုထဲမှ ရယ်မောသံအတုများ၊ သူ့ချစ်သူများ၏ ရယ်မောသံအတုများ၊ အညံ့စားဝတ္ထုတစ်ပုဒ်ထဲမှ ရယ်မောသံအတုများနှင့် မရယ်ရသော ပြက်လုံးတစ်ခုမှ ရယ်မောသံအတုများ စသည်တို့ ပါဝင် ကြသည်။

သို့ရာတွင် လွန်ခဲ့သော နှစ်များဆီမှ သူမ၏ ရယ်မောသံများကတော့ အစစ်ဖြစ်ခဲ့နိုင်ပါသည်။

အဲသည့်နေ့က သူမသည် ထုံးစံအတိုင်း စာသားပါအကြောင်းအရာများ လွဲချော်နေသည့် တေးသီချင်းတစ်ပုဒ်ကို ခပ်တည်တည်ပင် သီဆိုနေခဲ့ ပါသည်။ သူမသီချင်းဆိုလျှင် အမြဲတမ်းပင် မူရင်းသီချင်းစာသားနှင့် လွဲချော်သော စာသားများသာ ဖြစ်နေတတ်သည်။ သူကလည်း ထိုအ ကြောင်းကို ဘယ်တုန်းကမျှ သူမအား ဖွင့်ဟမေးမြန်း ပြောဆိုခြင်းမရှိခဲ့ဖူးးပါ။ လူ့ဘ၀ဆိုသည်မှာ စာသားနှင့်သံစဉ် ထာဝရမှန်ကန်နေသည့် တေး သီချင်းတစ်ပုဒ် ဖြစ်ချင်မှ ဖြစ်နေနိုင်မည် မဟုတ်လား။

သူ့အတွက် ထူးခြားနေခြင်းက လွန်ခဲ့သော နှစ်များဆီမှ သူမ၏ ရယ်မောသံများ…၊ သူမ၏ လှုပ်ရှားဟန်များ…၊ သူမ၏ ထုံးစံအတိုင်း စာသားနှင့် အကြောင်းအရာ လွဲချော်နေသည့် တေးသီချင်းတစ်ပုဒ်ကို သီဆိုနေပုံများကို ယခုရက်ပိုင်းတွင် မကြာခဏဆိုသလို အိပ်မက်မက်နေမိခြင်းပင် ဖြစ်သည်။ ထိုဖြစ်ရပ်သည် သူမည်သို့မျှ ကြိုတင်ရည်ရွယ်ထားခြင်းမရှိသော ဖြစ်ရပ်လည်း ဖြစ်နေသည်။

သူက ခြတောင်ပို့ကို ခြံခတ်ပြီး အမွှေးတိုင်ထွန်း ပူဇော်တတ်သူမဟုတ်ပေ။ သူက လမ်းလျှောက်ရင်း နားစွန်နားဖျားကြားရတတ်သော သီချင်း တစ်ပုဒ်ကို အရေးလုပ် လိုက်ဆိုတတ်သူလည်း မဟုတ်ပေ။ သူက အများသုံးအိမ်သာထဲမှ ရုပ်ပုံနှင့် စာသားများကို တကူးတက ကုန်းကွပြီး ဖတ်ရှု တတ်သူလည်း မဟုတ်ပေ။ သူက စိတ်နယ်လွန် ဖြစ်ရပ်ဆန်းတို့အပေါ် ထူးဆန်းကာ ယုံကြည်တတ်သူလည်း မဟုတ်ပေ။ သို့သော် အခုတလော အိပ်မက်တစ်ခုတည်းကိုပဲ ထပ်ခါထပ်ခါ မက်နေရခြင်းကိုတော့ သူ ဘာမှမတတ်နိုင်ပါ။ တွေးမိလျှင် အောင့်သက်သက်ဖြစ်ရ၏။ တစ်စုံတစ်ရာ ကို သူနည်းနည်းစိတ်တိုမိသည်။ ဘယ်က တစ်စုံတစ်ရာကို စိတ်တိုရမှန်းလည်းမသိ။ သူထပ်ပြီးတော့ ဘာမှမတတ်နိုင်တော့ပါ။

ဟိုတစ်ချိန်တုန်းကတော့ သူမသည် သူသီးသန့်စဉ်းစားတွေးခေါ်ရလောက်အောင် သူ့ရင်ဘတ်ထဲမှာ နေရာမယူနိုင်ခဲ့ပါ။ သူမသည် သူ့အတွက် စာသင်နှစ်တစ်နှစ်ရဲ့ အတန်းဖော်တစ်ယောက်မျှသာ ဖြစ်ခဲ့သည်။ ဒါဆိုလျှင် သူမကရော သူ့အပေါ် မည်ကဲ့သို့ ယုံကြည်မှုမျိုး ရှိခဲ့သလဲ။ သာမန်ယုံ ကြည်မှု မျိုးပဲလား။ ဒီထက် ပိုသေးခဲ့သလား။ သူ မသိပါ။ အရာရာဟာေ၀၀ါးအုံ့ဆိုင်းနေသည်။ သေချာမှုမရှိ။

သေချာတာက သူမ အခုတလော သူ့အိပ်မက်တွေထဲဝင်ပြီး အလွဲလွဲအချော်ချော် သီချင်းတွေဆိုပြပြီး နှောင့်ယှက်နေခြင်းပဲ ဖြစ်သည်။ ကောင်မ လေးရေ… ကျေးဇူးပြု၍ ငါ့အိပ်မက်တွေ နင့်ကြောင့် အပ်ကြောင်း မထပ်ပါစေနဲ့…။

(၂)

စာရေးဆရာကြောင်ချီးရဲ့ စာများကို သူတော်တော် သဘောကျသည်။ ထိုစာရေးဆရာရဲ့ စာတွေက ပျော့ပျော့လေးနှင့် နံသည်။ ထိုကဲ့သို့ နံနေ ခြင်းကပင် စာတွေရဲ့ အဓိပ္ပါယ်ကို တနည်းအားဖြင့် ဖော်ဆောင်ပေးနေခြင်းဖြစ်သည်။ စာရေးဆရာကြောင်ချီးရဲ့ နောက်ဆုံးထုတ်စာအုပ်ကို အသာချလိုက်ကာ လက်ဖက်ရည်ကို သူမော့သောက်လိုက်သည်။ ထိုမော့အသောက်လေးမှာပဲ လက်ဖက်ရည်ဆိုင်ရှေ့မှ ဖြတ်လျှောက်သွားသော အဲသည်ငတိကို သူတွေ့မိလိုက်ရခြင်းဖြစ်သည်။

အဲသည့်ငတိဆိုသည်မှာ နှစ်ကာလအတန်ကြာအောင် သူနှင့် ဝေးကွာခဲ့ရသည့် မိတ်ဆွေတစ်ယောက်နှင့်တူသော လူတစ်ယောက် ဖြစ်၏။ နှစ်တွေ ကြာမြင့်လွန်းသောကြောင့် ထိုမိတ်ဆွေလိုလို၊ သူစိမ်းလိုလို ငတိကို သူ့စိတ်ထဲမှ ကောင်းစွာမခွဲခြားနိုင်။ သူ့မိတ်ဆွေများ ဖြစ်နေမလား။ ဒါမှ မဟုတ် လူချင်းဆင်တာပဲလား။ မြူလိုလို နှင်းလိုလို အငွေ့ဖြူဖြူတွေထဲ သူနစ်နေသည်။ ဘာကိုမှ သဲကွဲစွာ မမြင်ရ။ မဟုတ်သေးပါဘူး။ သဲသဲ ကွဲကွဲဖြစ်ချင်ရင် အဲသည် ငတိကို လှမ်းခေါ်လိုက်လေ။ ဟင့်အင်း… နေဦး.. မခေါ်နဲ့ဦး။ သွားပလေ့စေ…။ ပြတ်သားသေချာမှုဆိုတာ ကိစ္စတိုင်း အတွက် လိုအပ်တာမဟုတ် ဘူးလေ။ သူ မခေါ်ဖြစ်တော့။

လက်ဖက်ရည်ခွက်ကို ကိုင်လျက်သား သူငိုင်နေမိသည်။ မြူလိုလို နှင်းလိုလို အငွေ့ဖြူဖြူတွေကြား သူငိုင်နေမိသည်။ မှုန်ဝါးဝါးအသိတရား တစ်ခုပေါ် နားခိုပြီး သူငိုင်နေမိသည်။ ပျောက်ဆုံးသွားတာ ကြာခဲ့ပြီဖြစ်သည့် ရွှေအိုရောင်အနာဂတ်ရဲ့ တစ်ဖက်ကမ်းအမှောင်ထုထဲတွင် သူငိုင် နေမိသည်။

လူဆိုတာက လက်ဖက်ရည်ဆိုင်ထိုင်သောအခါမျိုးမှာတောင် ကိုယ်ပြောသည့်စကားကို တစ်ဖက်လူ တယုံတကြည် နားထောင်ပေးစေချင် သော တစ်ဖက်သတ်ဆန်ဆန် သတ္တ၀ါဖြစ်သည်။ ထိုသတ္တ၀ါများသည် ယုံကြည်စိတ်ချမှု အခံချင်ဆုံးနှင့် ယုံကြည်စိတ်ချရမှု အနည်းဆုံး သတ္တ၀ါများ လည်း ဖြစ်သည်။ သူကတော့ လေကြမ်းကြမ်းတိုက်လျှင်ပင် လွင့်ပါသွားမည့် စက္ကူစုတ်လို အတွေးအခေါ်ရှိသည့် လူမျိုးနှင့်သော်လည်ကောင်း၊ လက်ဖက်ရည် စားပွဲပေါ် သံရိုက်ထားသလို တရားသေရှေးရိုးစွဲ အယူအဆရှိသူများနှင့် သော်လည်းကောင်း တစ်စားပွဲတည်း အတူမထိုင်လိုပါ။ ထိုအစွန်းတရားများမှ ကင်းကွာလိုလျှင် လွတ်လပ်စွာ တွေးခေါ်တတ်ဖို့ လိုပေလိမ့်မည်။ ခုလောက်ဆို အဲသည် ငတိကရော ဘယ်လိုတွေးခေါ်သူ ဖြစ်နေမှာပါလဲ။ ထားလိုက်ပါ။ “လမ်းချင်းတူရင် လူချင်းတွေ့ကြမယ်´´ဆိုတဲ့ စကားရှိတာပဲလေ။

မပျက်မကွက် ရောက်လာမည်ဆိုသော နှင်းဝတ်ရုံခြုံလွှာမြို့တော်ဆီမှ ချစ်သူရဲ့ ကတိစကားများသည် လေပွေအသေးစားတစ်ခုလို ပေါ့ပါးစွာ လွင့်ပါးပျက်ပြယ်သွားခဲ့လေပြီ။ အလင်းမှုန်အလင်းစက်တွေအတိပြီးသည့် ခေတ်ကြီးတစ်ခေတ်လုံးလုံးမှာ ငါက သတ္တိရှိရှိ နောက်ဆုတ်နေခဲ့တာ ပါ။ ပြောပါ…။ ပြောလိုက်စမ်းပါ..။ ငါ့ အနုပညာကျောတစ်ပြားစာတောင် နေရာလေးချခွင့်မရတဲ့ မြန်မာစာပေလောကကြီးကိုလေ…။ ငါက သိပ်မြတ်နိုး ကြောင်း ပြောလိုက်စမ်းပ။ ဟိုးကမြင်နေရတဲ့ ပါတိတ်အင်္ကျီကြီး လှမ်းထားတာ တော်တော်ကြည့်ရဆိုးတာပဲ။ ဘာဖြစ်လဲ… အဲသည့် ပုတ်အဲ့နံစော်နေတဲ့ လူမှုဆက်ဆံရေးတွေ မျိုမကျလို့ လက်ထိုးအန်ပစ်ခဲ့တာ…။ ကနုတ်ပန်းနွယ်အဆင်အကွက်တွေဖြင့် ရေးခြစ်ထားသော ကယုကယမုသား စကားများသည် အချစ်ကျမ်းစာရဲ့ အရုဏ်တက်နေထွက်စမှာပင် ပိုးဝင်ခဲ့ပြီးပြီ။ ဟုတ်ကဲ့… စာရေးဆရာကြောင်ချီးရဲ့ စာတွေ က ပျော့ပျော့လေးနှင့် နံပါသည်။

(၃)

အထက်တန်းကျောင်းသားဘ၀တုန်းက ရည်းစားများသော သူငယ်ချင်းတစ်ယောက် သူ့မှာ ရှိခဲ့ဖူးသည်။ ထိုသူငယ်ချင်းက သူရည်စားများများ ထားရတာ “အပျင်းပြေဖို့ပါ´´ဟု ဆိုသည်။ အလုပ်တစ်ခုတွင် တစ်နေကုန် အချိန်ရလျှင်ရသလို သကြားလုံးငုံနေသော ကောင်မလေး တစ်ယောက်ဆီမှ “တို့က အပျင်းပြေ သကြားလုံး ငုံတာပါ´´ဆိုပြီး ပြောသံကြားဖူးသည်။ ဟိုတလောက သူ့မိတ်ဆွေတစ်ဦး ဘောလုံးပွဲလောင်း ရာတွင် သိန်း ၃၀ ခန့် ဆုံးရှုံးသွားသော်လည်း ကြုံ၍မေးကြည့်သောအခါ “အပျင်းပြေလောက်ပါကွာ´´ ဟုအေးအေးလေးပြောသည်။ (မှတ်ချက်။ ။ ထိုမိတ်ဆွေသည် မိုးကုတ်သူဌေး တစ်ယောက်၏ တစ်ဦးတည်းသောသမီးကို မကြာခင်ကမှ လက်ထပ်ထားသူ ဖြစ်သည်။) တစ်ခါကတလည်း သူ့ညီငယ်အရွယ် လူငယ်တစ်ယောက်က အပျင်းပြေရေးထားသော ကဗျာများကို မဂ္ဂဇင်းတိုက်တွေသို့ ပို့ချင်ကြောင်း မည်သို့ ပို့ရမည်မသိကြောင်း လာပြော၏။ ဘုရားရေ… အပျင်းပြေဆိုသော အရာတွေထဲတွင် အနုပညာရော ပါဝင်နေပြီလား။ ဂေါ်ဂင်ဟာ ပန်းချီကို အပျင်းပြေရုံသက်သက် ရေးဆွဲခဲ့တာလား။ “ချောက်ကမ်းပါးထဲမှ လူသားများ´´ စာအုပ်ကို ဂျက်လန်ဒန်က အပျင်းပြေရေးခဲ့တာလား။ ဂျိမ်းဂျွိုက်(စ်)ကတော့ သူ့ `ယူလီးဆီး´ ကို အပျင်းပြေရေးခဲ့ခြင်း မဖြစ်နိုင်ပါ။ အမှန်တော့ လူတော် တော်များများသည် ရည်ရွယ်ချက်တိတိကျကျ မထားရှိဘဲ ဘာရယ်မဟုတ်သော ကိုယ်တိုင်လည်း သာယာနေမိတတ်သော ကိစ္စရပ်လေးတွေအပေါ် `အပျင်းပြေ´ဟု ခပ်လွယ်လွယ်အမည်နာမ တပ် ခေါင်းစီးထိုးလိုက်ကြခြင်းပင်ဖြစ်သည်။ တွေးကြည့်လျှင် ထိုသို့ ခေါင်းစီးထိုးလိုက်ကြတာကိုက `အပျင်းပြေ´ သဘော ဖြစ်ပုံရပါသည်။ သို့ရာတွင် `အပျင်းပြေ´ ဆိုသော စကားလုံးသည် ဆက်ဆံရေးနယ်ပယ်တွင် မိမိတာဝန်ယူမှုကို ကာကွယ်သည့် အသေးသိမ်ဆုံးနှင့် အကောင်း ဆုံးသော ဒိုင်းကာတစ်ခုဖြစ်နေခဲ့ခြင်းကိုတော့ မည်သူ့ကိုမျှ သူ မပြောပြချင်တော့ပါ။

သူကတော့ ရင်ခုန်စရာကောင်းသော၊ စိတ်ကူးကြွစေသော၊ သွေးပူနွေးသော၊ အစဉ်အမြဲသစ်ဆန်းနေသော ယုံကြည်ချက်တစ်ခုနောက်ကိုသာ လိုက်ခဲ့သူဖြစ်သည်။ သူ့အကြောင်း အတွင်းသိတစ်ချို့က သူ့ကို မရေရာသည့် လမ်းလျှောက်သူဟု ပြောကြသည်။ နောက်တစ်ချို့က သူ့ထံတွင် ခိုင်မာ သည့် စိတ်ဓာတ်ရှိသည်ဟု ချီးကျူးကြသည်။ လက်တွေ့ကျသူတစ်ချို့က သူ့ကို လောကနှင့်အံမကျသူတစ်ယောက်အဖြစ် မြင်ကြသည်။ တစ်ချို့ကတော့ ကျောင်းပြီးကတည်းက ရေရာသည့်အလုပ်အကိုင်မရှိဘဲ ဦးလေးအိမ်တွင် ယောင်ခြောက်ဆယ်လုပ်နေသူအဖြစ် သဘောထား ကြသည်။ တကယ်တော့လည်း ဦးလေးကိုယ်တိုင်တောင် သူ့ကို ဦးခေါင်းမှာ ဒဏ်ရာတစ်ခုရှိနေပုံမျိုး ထင်မှတ်ထားကာ စိတ်မမှန်သူတစ်ယောက် လို မြင်နေတာ သူအသိပဲဖြစ်၏။ ဘာပဲဖြစ်ဖြစ် အားလုံးတူညီသောအချက်ကတော့ သူ့ကို ကောင်းကောင်းနားမလည်ဘဲ ခပ်ချဉ်ချဉ် ဆက်ဆံကြ တာပဲဖြစ်သည်။

တလောက အင်္ဂလန်နိုင်ငံမှ ပုစဉ်းလေ့လာရေးအဖွဲ့တစ်ဖွဲ့သည် မြန်မာနိုင်ငံသို့ လာရောက်မည်ဟု ဂျာနယ်တစ်စောင်တွင် သူဖတ်ရှုလိုက်ရ သည်။ ထိုအဖွဲ့မှ လိုအပ်သည့် အထောက်အပံ့အဖြစ် အိမ်ရှင်နိုင်ငံမှ ဒေသခံ ပုစဉ်းလေ့လာသူများကို လစာကောင်းကောင်းပေး၍ အဖွဲ့ဝင်အဖြစ် လက်ခံ သွားမည်ဖြစ်ကြောင်းလည်း သူဖတ်ရှုလိုက်ရသေးသည်။ သူက ငယ်ငယ်လေးကတည်းက ပုစဉ်းများကို သဘောကျတတ်ခဲ့သူဖြစ်သည်။ ငယ်ငယ်က ပုစဉ်းလေးများကို ဖမ်းပြီး အမြီးမှ အပ်ချည်ကြိုးရှည်ရှည်တစ်ချောင်းချည်ကာ ကစားတတ်သော  သူငယ်ချင်းများနှင့် သူက အမြဲရန် ဖြစ်တတ်သူလည်း ဖြစ်ခဲ့သည်။ သူ့အခန်းထဲတွင် အရောင်အသွေးစုံသော ပုစဉ်းများကို အခန်းတံခါးများ ပိတ်ပြီး အဖြူရောင်အတ္တဖြင့် ပိတ် လှောင်ထားခဲ့ဖူးသည်။ သို့သော် ပုစဉ်းလေးများကို သူက နာကျင်အောင် မည်သည့်အခါကမျှ မပြုလုပ်ခဲ့ပေ။ တစ်စစနှင့် ပုစဉ်းလေးများကို စွဲလမ်းနှစ်ခြိုက်စိတ်သည် ကလေးဘ၀ ကုန်ဆုံးသွားသော်လည်း ပျောက်ကွယ်မသွားဘဲ ထူးဆန်းစွာပင် သူ့အရွယ်နှင့် လိုက်ကာ မယုံနိုင်စရာ ကြီးထွားရင့်သန်လာခဲ့တော့သည်။ ပုစဉ်းများကို ယေဘူယျ အားဖြင့် ပုစဉ်းကြီး Dragonflies နှင့် ပုစဉ်းငယ် Damselflies ဟုနှစ်မျိုး ခွဲခြားနိုင်သည်။ ပုစဉ်းကြီး  Dragonflies မှာ ပိုကြီးမားအကြမ်းခံကာ နားသည့်အခါ တွင် အတောင်ပံတွေကို ဘေးတိုက်ဖြန့်ကားထားလေ့ရှိပြီး ပုစဉ်းငယ် Damselflies များမှာမူ အရွယ်အစားသေးသွယ်ကာ နားသည့်အခါတွင် အတောင်ပံ များကို စုကာအပေါ်သို့ ထောင်ထားတတ်ကြ၏။ ပုစဉ်းများသည် ကမ္ဘာပေါ်တွင် မြောက်များစွာသော မျိုးစိတ်များရှိသည့် အင်းဆက်များပင်ဖြစ်သည်။ သိပ္ပံအခေါ်အားဖြင့် Calopteryxs plendes ကျောက်မျက်အတောင် Jewelin ( Calopteryn maculate) ပုစဉ်းမျိုး၊ မိတ်လိုက်နေသော တခြားပုစဉ်းစုံတွဲ ကို ဆွဲလား ရမ်းလား ထုထောင်းလား ကိုက်လား လုပ်တတ်သည့် အကျင့်ဆိုးရှိသော Stealers ပုစဉ်းမျိုး၊ နှစ်ပေါင်း သန်း ၃၀၀ ကျော်နေထိုင်ရှင်သန် ပြီးသော Odonates သို့မဟုတ် toothedones ခေါ်သော ပုစဉ်းမျိုး၊ အထီးပဲဖြစ်ဖြစ် အမပဲဖြစ်ဖြစ် နောက်ဆုံး အမကိုပဲ တခြားပုစဉ်းတွေထက် ထိခိုက် ဒဏ်ရာရစေသော Dragonhunter အမည်ရ (Hageinus brevistylus)ပုစဉ်းမျိုး၊ Club tails ပုစဉ်းမျိုး၊ မြောက်အမေရိကမှ bluets ဟုခေါ်သော Enallagma ပုစဉ်းငယ်မျိုး၊ ကျောက်မျက်အတောင် ပုစဉ်းငယ် ဒါမှမဟုတ် တက်ကြွသည့်ကြက်သွေးရောင် Darters ပုစဉ်းမျိုး၊ စသဖြင့်.. ဒါတွေက ပုစဉ်းနှင့်ပတ်သက်လျှင် အကင်းမျှလောက်သာ ဖြစ်သော မျိုးစိတ်များဖြစ်သည်။ အရွယ်ရောက်လာတော့ ဂျီတီအိုင်တက်ရင်း အင်ဂျင်နီယာပညာကို စိတ်မ၀င်စားဘဲ ကျောင်းဝန်းထဲပတ်ပြီး ပုစဉ်းလိုက်ဖမ်းနေသောသူ့ကို ဂျီတီအိုင်တစ်ကျောင်းလုံးက ပုစဉ်းကောင်ဟု နာမည်ပြောင်နှင့် သိထားကြပြီးပြီ။

 (၄)

သည်ရက်ပိုင်းအတွင်း ကမ်းရိုးတန်းဒေသများပေါ် မာလာအမည်ရှိ မုန်တိုင်းတစ်ခု တိုက်ခတ်ရန် အကြောင်းရှိသဖြင့် ဘယ်ကိုမှ မသွားလာမိပဲ အိမ်မှာပဲ သူငြိမ်နေမိသည်။ မုန်တိုင်းရှိသောကြောင့် ရာသီဥတုကလည်း အရင်လို အပြင်မှာ သိပ်မကောင်းလှပေ။ ထိုရက်များက ကောင်းကင် သည် အမြဲလိုလိုညိုမှောင်နေတတ်ကာ လေပြင်းများလည်း မကြာခဏတိုက်ခတ်နေသောကြောင့် အခန်းပြတင်းပေါက်မှ မြင်နေရသော မြင်ကွင်းသည် သူ့အား လွမ်းစိတ်ဖြင့် စိုထိုင်းလေးတွဲ့နေစေသည်။ မိုးပေါက်များ သည်းထန်စွာ ကျဆင်းလာပြီဆိုလျှင် ဖတ်လက်စ စာအုပ်တစ် အုပ်ကို လက်မှကိုင်ကာ ပြတင်းပေါက် နားတိုးရွေ့ထိုင်ရင်း ဘ၀ရဲ့ မရေရာမှုတွေကို သူဆင်ခြင်မိတတ်သေးသည်။

လူတချို့သည် တောင်တက်ဖို့ မွေးဖွားလာပြီး လူတချို့သည် မီးပုံးပျံစီးဖို့ မွေးဖွားလာသည်။ လူတချို့သည် သာသနာပြုဖို့ မွေးဖွားလာကာ လူတချို့သည် ဂျင်းဘောင်းဘီဝတ်ဖို့ မွေးဖွားလာသည်။ လူတချို့သည် ဗိုလ်ကျ စိုးမိုးဖို့ မွေးဖွားလာ၍ လူတချို့သည် မာသာထရီဇာဖြစ်ဖို့ မွေးဖွားလာသည်။ လူတချို့သည် ရုံဝင်ပေါက်စောင့် လက်မှတ်တောင်းဖို့ မွေးဖွားလာကာ နောက်ထပ် လူတချို့သည် ကပြဖျော်ဖြေဖို့ မွေးဖွားလာ ကြသည်။

မည်သို့ပင်ဖြစ်စေ ဟာမိုနီပြေပြစ်သော သီချင်းတစ်ပုဒ်လို လောကတွင် သူက ဘာအတွက်မွေးဖွားလာရပါသနည်း။ သူ့ကို စိတ္တဇရောဂါသည် တစ်ယောက်လို ဆက်ဆံတတ်သည့် ဦးလေးအတွက်လား။ အင်္ဂလန်မှ လာရောက်မည်ကြားရသော ပုစဉ်းလေ့လာရေးအဖွဲ့အတွက်လား။ ဘယ်တုန်းကမှ သူ့အပေါ် နားမလည်သော သူကလည်း ကြီးကြီးကျယ်ကျယ် စိတ်မ၀င်စားခဲ့သော တစ်ချိန်တုန်းက ငြိစွန်းဖူးခဲ့သည့် ချစ်သူတွေ အတွက်လား၊ မရေရာပါ။ ပြတင်းပေါက်မှ မြင်ရသည့်အတိုင်းပင် မြင်ကွင်းတစ်ခုလုံးသည် မိုးသည်းထဲ မည်းမည်းမှောင်နေကာ သူ့အတွက် အလင်းရောင် ပျောက်ဆုံးနေ၏။

မနက်ဖြန် အရှေ့အရပ်မှ နေထွက်မည်ဟု မည်သူပြောနိုင်သနည်း။ မနက်ဖြန်ဆိုသည်မှာ မရေရာပါ။ အရှေ့အရပ်ဆိုသည်မှာ မရေရာပါ။ နေထွက်မည်ဆိုခြင်းမှာ မရေရာပါ။ မနက်ဖြန် အရှေ့အရပ်မှ နေထွက်မည်ဟု ပြောသူ လည်း မရေရာပါ။ အချိန်ကာလတွေက လက်ပတ် နာရီတွေထဲမှာ တစ်ချက်ချက် သွားနေသည်။ သို့ရာတွင် အချိန်ကာလသည် နာရီဒိုင်ခွက်များထဲ ပုန်းအောင်း နေခြင်းမဟုတ်ဘဲ နာရီဒိုင်ခွက်များ ကသာ အချိန်ကာလကို ချုပ်နှောင်ဖို့ ကြိုးစားထားတာ ဖြစ်ကြောင်း သူတို့အားလုံး သဘောပေါက်ဖို့ လိုအပ်မည်ကို သဘောပေါက်အောင် ရှင်းပြရန် သူ့တွင် သဘောမရှိတော့ပါ။

(၅)

အစဉ်အမြဲ စိုပြေလန်းဆန်းနေသည့် သူမ၏တေးသွားများတွင် သူမေ့လျော့ပျော်ဝင်နေသည်။ ထိုတေးသွားများထဲတွင် သူ့ဦးခေါင်းပေါ် နီးကပ် စွာ ပြိုဆင်းကျလာသော တိမ်မည်းထုထည်ကြီးများ ရှိသည်။ ဟိုးအဝေးမှ တရွေ့ရွေ့နီးကပ်လာနေသည့် အေးစက်စက် ဓားသွားများ ရှိသည်။ အမှောင် ဒြပ်သားနောက်ကွယ်မှ ကံကြမ္မာ၏ ကြာပွတ်သံများရှိသည်။

ဒီမှာ… ငါက ဘယ်သူတစ်ဦးတစ်ယောက်မှ မကြားနိုင်တဲ့ အနက်ရောင် မြည်တမ်းမှုတစ်ခုပါ။ ဘ၀ရဲ့ ထောင့်ချိုးတိုင်းမှာ ဆေးစက်တွေ မှိန် ဖျော့ပြယ်လွင့်လို့…။ စိတ်ဖြစ်စဉ်စီးဆင်းမှုတိုင်းဟာ ထစ်အနှောင့်နှေး လို့…။ တောင့်တခြင်းအာသီသမှန်သမျှ ခါးဆူးကြမ်း ညှော်လို့…။ တကယ်ပါ…ငါက ဘယ်သူတစ်ဦးတစ်ယောက်မှ မကြားနိုင်တဲ့ အနက်ရောင် မြည်တမ်းမှုတစ်ခုပါ။

အနက်ရောင်မြည်တမ်းမှုတစ်ခုပါ…

အနက်ရောင်မြည်တမ်းမှု…။

အနက်ရောင်….။

အနက်…။

အ

   အ

             အ

                        အား

                                      အား

“အား´´

အိပ်မက်မှ လန့်အနိုးတွင် သူ့စိတ်တွေ ပျော့ပြဲနုံးချိနေသည်။ ထုံးစံအတိုင်း အိပ်မက်ထဲတွင် သူမက စကားလုံးတွေ လွဲချော်နေသည့် တေးသီ ချင်းများကို ဆိုပြနေပြန်သည်။ သူ အိပ်ရာပေါ်မှ ခုန်ထလိုက်ကာ မီးခလုတ်ကို ဖွင့်လိုက်၏။ အာရုံခြောက်ပါးစလုံး မောပန်းလွန်းနေသဖြင့် ရေကိုတောင် ချက်ချင်းမော့မသောက်နိုင်။ ရေခွက်ကို အသာကိုင်ပြီး အမောဖြေနေရသေးသည်။ တောက်… ဒီမိန်းမ ငါ့အိပ်မက်တွေထဲက ခုထိထွက် မသွားသေးဘူး။ တစ်ခုခုကို သူ မကျေမနပ်ဖြစ်နေမိသည်။

ခဏကြာတော့မှ ရေကို ကုန်စင်အောင် သူတကွပ်ကွပ် မော့သောက်ပစ်လိုက်သည်။ ရေသောက်ပြီးသွားသောအခါ ညနေက လက်ဖက်ရည် ဆိုင်မှာ ထိုင်နေရင်း ဆိုင်ရှေ့က ဖြတ်လျှောက်သွားသည့် သူ့မိတ်ဆွေနှင့် တူလွန်းသော ငတိကို ဖျပ်ခနဲ အမှတ်ရမိလိုက်သည်။ အဲဒီကောင် ကလည်း ဘာဖြစ်လို့ ညနေတိုင်း ငါသောက်တဲ့ လက်ဖက်ရည်ဆိုင်ရှေ့မှာမှ အားအားယားယား ဖြတ်လျှောက်နေရတာလဲ။ စိတ်ပေါက်ပေါက်ဖြင့် လက်ထဲမှ ဖန်ခွက် လွတ်ကို တစ်ဖက်က အုတ်နံရံဆီ သူပစ်ပေါက်ခွဲပစ်လိုက်သည်။

“ခလွမ်း´´

ဖန်ခွက်လွတ်ကျကွဲသံက ညနက်ထဲမှာ ကျယ်လောင်စွာ တုန်ခါသွား၏။

သူအတန်ကြာ သည်အတိုင်း ရပ်နေမိသည်။ ညက ပြန်လည်လို့ တိတ်ဆိတ်သွား၏။ အဝေးမှ နာရီသံချောင်း သုံးချက်ခေါက်သံ ကြားရတော့မှ အခန်းမီးကို ပိတ်ပြီး ကုတင်ပေါ် သူခြေပစ်လက်ပစ် လှဲလျောင်းလိုက်သည်။ သူအိပ်ပျော်သွားပြီး မကြာမီမှာပင် ကောင်မလေးတစ်ယောက်က စကားလုံး တွေ လွဲချော်နေသည့် တေးသီချင်းတစ်ပုဒ်ကို ဆိုပြရန် အိပ်မက်ထဲ ရောက်ရှိလာပြန်သည်။  သူ မနက်အိပ်ယာမှ နိုးထသောအခါ အသင့်ရောက်ရှိနေသည့် သတင်းစာထဲတွင် သူကြိုက်သော စာရေးဆရာကြောင်ချီး၏ စာအုပ်သစ်ကြော်ငြာကို တွေ့လိုက်ရပြီး တစ်ဖက်စာ မျက်နှာတွင်မူ အင်္ဂလန်နိုင်ငံမှ ပုစဉ်းလေ့လာရေးအဖွဲ့သည် မြန်မာနိုင်ငံသို့ လာရောက်ရန် မသေချာတော့ကြောင်း ရေးသားထားသည့် သတင်း ကို ဖတ်ရှုလိုက်ရလေ၏။

လွန်းဆက်နိုးမြတ်

ပုစဉ်းမျိုးစိတ်အခေါ်အဝေါ်များအား နည်းပညာဂျာနယ်တစ်ခုမှ ယူပါသည်။

ရတီ၊ စက်တင်ဘာ ၂၀၀၇

ဆံပင်အလယ်ခွဲနဲ့ နက္ခတ် ၀တ္ထုတိုစု(တာရာမင်းဝေနှင့်တစ်ခြမ်းစီ)

ငါးရိုးပင်လယ်ဝတ္ထုတိုစု

ပန်းချီ-ခေတ်ဖုန်းမို

ကုတ်အင်္ကျီအိပ်ကပ်ထဲက ဥယျာဉ်တစ်ခုကို လူမသိအောင် တိတ်တိတ်လေး ပွတ်သပ်လိုက်တယ်။
အဲဒါ(သူ့)ဆိုက်ကိုပဲ။ အခုမြည်တဲ့ အသံအရ ကြမ်းပြင်ပေါ် တစ်စုံတစ်ခုတရွတ်တိုက်ဆွဲထွက်သွားတာ။
သစ်သားစတွေ ရေစိုတဲ့ အနံ့ထဲမှာ မြစ်တစ်စင်းစီးဆင်းနေတယ်။ အဲဒီ့မြစ်ထဲ တောဘဲတစ်အုပ်က
ပျံသန်းလို့။ ပျံသန်းမှုမှာ အတောင်မဲ့တယ်။ လက်သည်းကို မထုတ်ဘူး။ ဖန်သားပြင်ပေါ် အရုပ်တွေ
တဖျပ်ဖျပ်ပြောင်းလဲခုန်ကူးနေကြတုန်း။ ချိန်းဆိုတဲ့ နာရီမှာ လိပ်ထားတဲ့ လမ်းက ဖြေချမရဘူး။
မျက်နှာပြင်ပေါ် အဖုအပိန့်ဗြုတ်ထနေတာပဲ ခိုက်တယ်။ တစ်ပင်လုံးကြွေသမျှ အပွင့်တွေ တစ်နေကုန်
သံနဲ့ ပြန်ရိုက်ပေးခဲ့ပြီးပြီ။ လက်ဖယ်။ပင်စည်ကို သွားမထိနဲ့ ဓာတ်လိုက်လိမ့်မယ်။ သွယ်ဝိုက်ပြောပြ
ရရင် အဖြောင့်သဘောကူလူးမှုလို့ နားလည်ထား။ မူရင်းကိုယ်ထည်ကနေ အူမျှင်တွေ တရွရွဖြစ်နေ
တတ်တာကိုက ဒင်းရဲ့ သဘာဝ။ ပြီးတော့ သပ်သပ်ရပ်ရပ် စမတ်ကျကျ ညှပ်အားကောင်းတယ်။
လုံးကြီးအမြဲတင်လို့ မရတဲ့အခါ လုံးသေးပဲ ယာယီတင်လိုက်။ ပလတ်စတစ်အကြည်တွေနဲ့ ပတ်ပတ်
လည် ကာရံပြီး မီးချောင်း၁၂ချောင်း စုံဖွင့်လျက် မှောင်ချထားပစ်တယ်။ အမှောင်ဟာ ကြည်တယ်။
ပလုံစီလုံးကလေးတွေ လေထုထဲ ဆက်တိုက်ထိုးတက်ဖို့ လုံလောက်ရဲ့လား/ မလုံလောက်ဘူးလား
ငါ့မှာ ပါးဟပ်ရှိတယ်။ ငါးတွေမှာ ပါးဟပ်မရှိဘူး။ ကားနောက်ဖုံးထဲ တုပ်နှောင်ခံဘ၀။ ဟစိဟစိ။

လွန်းဆက်နိုးမြတ်
၁၃.၉.၁၁
မနက် ၀၀း၂၀ နာရီ

မိမိကိုယ်ကိုယ်တစ်ဖက်လှည့်နဲ့ ပြန်လည်ကြိုးစားဆယ်မကြည့်ဖို့
စိတ်ကူးကြံရွယ်ထားခြင်းကိစ္စမှာ စွဲဆောင်မှုက (9)နိုင်းကျော်နေတယ်။
ခိုင်မာတောင့်တင်းတဲ့ သံယက်မကြီးတွေရဲ့ အသားသဘော အားရစရာ။
ပြဲကားငွားစွင့်စွာနဲ့ အရိပ်တွေ ဇယ်ဆက်သလို တဖြတ်ဖြတ် ကူးလူးနေတယ်။
ရှုပ်ထွေးထွေးစနစ်ကျမှုကြောင့် အချင်းချင်းထောက်ကန်ထိန်းမတ်ပြီး
အရောင်အရိပ်အမျိုးမျိုး ပါးပါးလေးမှသည် အဆင့်ဆင့်ရင့်မှောင်ထက်
သန်လာအောင် တရွတ်ဆွဲ ခေါ်ဆောင်ခြင်းခံလိုက်ရ။

အစွန်းအထင်း ဘယ်နှနှစ်သားလဲ။ မိုးခေါင်နေတဲ့ လွင်ပြင်ငယ်ထဲက
အသံတစ်မှုန် တုန်တုန်ခါခါ အနှေးလွင့် လွင့်ရောက်လာတယ်။ မတွေ့နိုင်ဘူး။
ပိတ်ကာထားတဲ့ မိုးသားထက်က ရေမှော်ရေညှိဖတ်ကလေး။ မိခင်ဆားဗစ်
စင်တာကတောင် မဖွင့်နိုင်လို့ လက်မခံဘဲ ပြန်လွှတ်လိုက်ရတဲ့
ခေတ်ကြီးရဲ့ အဖုံးခွံ။

သက်သေသက္ကာယကျကျပြောကြ ဆိုကြ(မယ်ပျော်ကြမယ်)ကြေးဆိုရရင်
တစ်လုံးငါးမူးနိုင်လောက်ဆိုရင် ပဲ ပြောင်း ကြံ ၀ါ ဂျုံနဲ့ စပါးခင်းတွေထဲက
အလင်းရောင်တစ်ဆင့်ချင်းပြောင်းလဲသွားပုံကို ကင်းဗတ်စပေါ် စုတ်တံ
လျှာနဲ့အပြားလိုက် သပ်ချလိုက်တာ အရည်ကြည်လေးတွေ စိုတိစိုဖတ်
ချွဲကျိကျိ အတွေ့အာရုံ။ မခမ်းမနားနဲ့ ဆွေးငင် ငင်လိုက်ရုံ ဘာပဲဖြစ်ဖြစ်
တွန့်ခေါက်တောင်စဉ်တန်းတွေ တကယ်ရောက်မလာဘူး။

ဖဲကြိုးပြေ ပြေလည်အောင် ဒါဘ၀ပဲပြောလိုက်တယ်။ အဖေက ပွဲတော်မှာ
အရောင်စုံ စက္ကူရုပ်ကလေးတွေ လုပ်ရောင်းတယ်။ အမေက ကလေးတစ်ဖက်
ရင်ခွင်ပိုက်ပြီး ပြောင်း(ဖူး)နည်းနည်းကောက်ထားတဲ့ ကော်(ပြောင်း)စေ့သေနတ်ကို
ကျည်ဖြည့်နေတယ်။ တစ်ရာဖိုး ငါးချက်ပစ်လို့ရတယ်။ သတ်မှတ်ထားတဲ့ သိမှုဗဟို
ချက်ကို မှန်အောင်ပစ်နိုင်ရင် သတ်မှတ်ထားတဲ့ ပုံသေပစည်းတစ်ခုရမယ်။ ပုံသေ
ဆန်တဲ့ သိမှုဟာ အသားသေနေပြီ။ မူလီပေါက်အခေါင်းထဲ နှစ်ပေါင်းအတော်ကြာ
အောင် နဂျီအုံစွဲနေရှာတဲ့ ခေတ်ကြီးရဲ့ အဖုံးခွံ။

မဖွင့်ကြည့်တာကြာတော့ ဖွင့်မကြည့်တာကြာတော့ မကြည့်ဖွင့်တာလည်း
ကြားကြာလှတော့ ခေတ်ကြီးရဲ့ အတွင်းထဲမှာ ဘာတွေရှိနေမလဲကွယ်။
တောများထူနေမလား။ ကွန်နက်ရှင်များကျနေမလား။ ပြည်တွင်းစစ်များဖြစ်
နေမလား။ ဘာဆိုဘာမှ ဘာဘာ ဘာမှမသိရပါကွယ်။ သိရသလောက်ပြောရ
ရင် မသိရသလောက်အဖိုးထိုက်တန်ပါလိမ့်မယ်။ တကတည်း အနက်ထဲထိ
မရောက်ခင် ဂယက်ထသွားတယ်။ စီစဉ်သူစကားအရတော့ ကတ္တားရည်
ပူလာ ကံလွှဲပဲ။ ဒီအရေးအသားကို ဘာအခြေမှပြုမထားဘူး။ ဘာအခြေနဲ့မှ
စားမထားဘူး။ အစာချေစနစ်ထဲ အရည်/အဖတ်/အဆီ/အရောင်/အညှီ/အငွေ့
စတာတွေ မဖြစ်မနေ ဖြစ်သလို ပုံစံမျိုးစုံ လောင်းထည့်ပစ်လိုက်တယ်။

နဂျီအုံစွဲနေတဲ့ မြေကြီးစတွေနဲ့
မူလဟာ ဘူကျနေတယ်။        ။

လွန်းဆက်နိုးမြတ်
၂၆.၁၁.၁၁
နံနက်၀၀း၁၅နာရီ

စာသုံးစောင်ဝတ္ထု

စာနံပါတ် (၁)

                ကေ။

ဘာတစ်ခုမှ မရေရာမသေချာသေးတဲ့အချိန်မှာပဲ ဒီစာကို ကိုယ်ရေးခဲ့ပါတယ်။ ဒီအတွက် ကိုယ့်မှာ အကြောင်းပြချက်တွေ အများ ကြီးရှိပါတယ်။ ကေနဲ့ ကိုယ်နဲ့ ခင်မင်တွယ်ငြိခဲ့တဲ့ ဟောဒီအချိန်ကာလတိုတိုလေးအတွင်းမှာပဲ အံ့သြစရာကောင်းလောက်အောင် တစ်ယောက် နဲ့တစ်ယောက် နားလည်မှုတွေ လျင်မြန်လွန်းခဲ့တယ်။ ကိုယ်တို့ ရင်ဘတ်ထဲက မေတ္တာ တရားကို အလွယ်တကူပဲ မြင်ခဲ့ကြတယ်။ ပြီးတော့ ကိုယ်တို့ရဲ့ လက်တွေဆုပ်ကိုင်ဖို့ထက် ကိုယ်တို့သွားရမယ့် လမ်းကို အခက်အခဲမရှိ သာယာစေချင်တဲ့ စိတ်က ပိုခဲ့ကြတယ်။

ကေနဲ့ စကားပြောပြီးတဲ့ ညနေခင်းတွေတိုင်းမှာ ကိုယ်ဟာ အုံ့ဆိုင်းတဲ့ အတွေးတွေထဲ အကြိမ်ကြိမ် နစ်ကျွံ့ခဲ့ရတယ်။ ချစ်ခြင်း မေတ္တာဆီချဉ်းကပ်ပုံမှာ ကိုယ်ဟာ မကြာခဏ ခြေချော် လက်ချော်ဖြစ်ခဲ့ဖူးတဲ့ ကောင်ပါ ကေ။ မိန်းမတွေ ဆီက ကိုယ်ရရှိပိုင်ဆိုင်ခဲ့ရတဲ့ အရာ တွေဟာ ကိုယ်ပြန်ပြီးပေးဆပ်ခဲ့ရတဲ့ အရာတွေရဲ့ တစ်ဝက်တောင် မရှိခဲ့ပါဘူး။ ဒီလိုနဲ့ပဲ မိန်းမတွေ တစ်ယောက်ပြီးတစ်ယောက် ကိုယ့်ကို လမ်းခွဲထွက်ခွာသွားခဲ့ကြတယ်။ ကြာလာတော့ ကိုယ်လည်း အရေထူလာတယ်။ ခုတော့ ကိုယ်ဟာ မိန်းမတွေဆီကပဲဖြစ်ဖြစ် ဒါမှမဟုတ် မိန်းမ တစ်ယောက်ယောက်ဆီကပဲဖြစ်ဖြစ် ဘာဆိုဘာမှ မမျှော်လင့်ဘဲ နေထိုင်တတ်လာတယ်။ ပြီးတော့ ဘာကိုမှလည်း မတောင်းဆိုဘဲနဲ့ပေါ့။

ကိုယ့်ဘ၀ရဲ့ တချို့အစိတ်အပိုင်းတွေဟာ ကေနဲ့ တိုက်ဆိုင်မှုတွေ များလွန်းတယ်ဆိုတာလောက်နဲ့တော့ ကေ့ရင်ခုန်သံတွေကို အချစ်လို့ မသတ် မှတ်သင့်ဘူးထင်တယ်။ လူဆိုတာဟာ တစ်နေရာမဟုတ် တစ်နေရာတော့ တိုက်ဆိုင်မှုဆိုတာ ရှိတတ်တာပဲမဟုတ်လား။ လူတွေကို ယုံကြည်လွယ်တတ်တဲ့ ကေနဲ့ လူတွေကို အလွယ်တကူ ယုံကြည်အောင် (အထူးသဖြင့် မိန်းမတွေကို) ပြောတတ်ဆိုတတ်တဲ့ ကိုယ့်ရဲ့ အတွေ့အကြုံတွေကြားမှာ ကေ ဇဝေဇ၀ါဖြစ် နေပုံရတယ်။ ဒါပေမယ့် သေချာတာတစ်ခုကတော့ ကေ့နေရာမှာ တခြား တစ်ယောက် ဆိုရင် ကိုယ်ဒီလိုမျိုး ဆက်ဆံရင်းနှီးဖြစ်မှာ မဟုတ်ဘူး။ ဘာဖြစ်လို့ လည်းဆိုတော့ ကေက သိပ်ပြီးရိုးသားတဲ့ မိန်းကလေးတစ်ယောက်လေ။ အံ့သြစရာကောင်းလောက်တဲ့ နားလည်စာနာမှုတွေနောက်မှာ ကိုယ့်ဘ၀ရဲ့ အချစ်ဆုံးလူတစ်ယောက်ဟာ ကေ ဖြစ်လာနိုင်တယ်။ ဒါပေမယ့် အမြဲတမ်း ရင်ကွဲပက်လက်ကျန်ခဲ့ရတဲ့ ဘ၀ကို နောက်တစ်ကြိမ် ကိုယ်ပြန် မသွားချင်ဘူး။ မိန်းမတွေကြောင့် ပြင်းရှတတ်တဲ့ ခံစားချက်တွေ ထဲမှာ နောက်ထပ်တစ်ကြိမ် ကိုယ်မနာကျင်လိုတော့ဘူး။ အလားတူ ကိုယ့်ကြောင့်လည်း တခြားမိန်းမတစ်ယောက်ကို စိတ်ဒဏ်ရာတွေ မပေး ချင်ဘူး။ အထူးသဖြင့် ချစ်ခြင်းမေတ္တာအပေါ် ကိုယ့်လိုပဲ ခံစားပုံတူတဲ့ ကေ့ကို ပိုပြီးတော့ မနာမကျင်စေလိုတာ ကိုယ့်စိတ်ရင်းအမှန်ပဲ။ ဒါကြောင့် ကေနဲ့ ပတ်သက်ရင် ကိုယ်ဟာ စိတ်မပါသလို အေးစက်စက်ဖြစ်နေခဲ့တယ်။

အနာဂတ်ဟာ ကေနဲ့ ကိုယ့်အတွက် ဘာဖြစ်လာမယ်မှန်း မသေချာသေးဘူးမဟုတ်လား။ ဒါပေမယ့် ကေ့ဘ၀မှာ ကိုယ့်ထက်ပိုပြီး အဆင်ပြေသင့်တော်တဲ့ လူတစ်ယောက်ထပ်ပြီးတော့ တွေ့ရှိလာရဦးမှာပါ။ အဲဒီတော့ တစ်ယောက်နဲ့တစ်ယောက် မချစ်မိကြသေးခင် နာနာ ကျင်ကျင် လမ်းခွဲမယ့် ကိစ္စတွေ ဖြစ်မလာခင် ဆုံးဖြတ်ချက်တစ်ခုကို ကိုယ်ချလိုက်ပါပြီ။ ဒီအတွက် ကေကတော့ ထင်မှာပဲ။ ကိုယ်ဟာ မိုးပြိုမှာ တွေးကြောက်တတ်သူတစ်ယောက် ဆိုပြီးတော့ပေါ့။ ခုမှတော့ ထားလိုက်ပါတော့လေ။ ကေနဲ့ ကိုယ်နဲ့ ခင်မင်မှုအဦးအစကတည်းက ကေ့အ တွက် ကိုယ်ကြိုပြီး ရေးပေးထားခဲ့တဲ့ စာသုံးစောင်ထဲက တစ်စောင်ကို ကိုယ်ရွေးချယ်ခဲ့ပါပြီ ကေ။

ဒီစာသုံးစောင်ကို သစ္စာရှိရှိ ဖောက်မဖတ်ဘဲ သိမ်းဆည်းခဲ့တဲ့ ကေ့ကို ကိုယ်ကျေးဇူးတင်ပါတယ်။ ဒီစာသုံးစောင်ဟာ ကေနဲ့ပတ် သက်ပြီး ပေးအပ်ခဲ့တဲ့ ကိုယ့်ဘ၀သုံးခုပါပဲ။ အချိန်တန်ရင် ကေ့လက်ထဲ အပ်ထားတဲ့ ဘ၀သုံးခုထဲက တစ်ခုကို ကိုယ်ရွေးချယ်မယ်ဆိုတဲ့ ဆုံးဖြတ်မှုနဲ့ပေါ့။ ဒီစာကို ဖောက်ဖတ်ပြီးချိန်မှာ ကိုယ်ဟာ ကေနဲ့ ဘယ်တော့မှ ချစ်သူဖြစ်မလာနိုင်တော့တဲ့ ခပ်ဝေးဝေးက သူငယ်ချင်းတစ် ယောက်အဖြစ်ပဲ ဆက်လက်တည်ရှိသွားမယ်ဆိုတာ သိစေချင် ပါတယ်။

ကေ့လက်ထဲမှာ ကျန်နေသေးတဲ့ စာနံပါတ်(၂) နဲ့ (၃) ကိုလည်း သစ္စာရှိစွာနဲ့ ဖောက်မဖတ်ဘဲ အမြန်ဆုံး ဖျောက်ဖျက်ပစ်လိုက်ဖို့ ကိုယ်နောက်ဆုံး တောင်းဆိုလိုက် ပါရစေ ကေ။

                သူငယ်ချင်း ကေ အစစအရာရာ အဆင်ပြေပါစေ။

စာနံပါတ် (၂)

                ကေ။

နေ့ရက်တွေ ကုန်ဆုံးတာမြန်တယ်။ သစ်ရွက်တွေ အသစ်ပြန် ထွက်တာမြန်တယ်။ ကမ္ဘာကြီးက အရင်ကထက် လည်တာပိုမြန် တယ်။ လက်ရှိ ဖြတ်သန်းနေတဲ့ ခေတ်ကလည်း မြန်တယ်။ ပြီးတော့ ကေနဲ့ ကိုယ်နဲ့ ချစ်သူတွေ ဖြစ်သွားကြတာလည်း မြန်တယ်။

ကေ ကိုယ့်ကို အဖြေပြန်ပေးတဲ့နေ့တုန်းကဆို ကိုယ်ဟာ ပျော်ရွှင် ရမယ့်အစား ရှေ့ဆက်ရမယ့် ခရီးတွေအတွက် အားသစ်တွေ ဖြာထွက်နေတာက ပိုခဲ့ပါတယ်။ ပြေပြစ်လိုက်ဖက်တဲ့ ချစ်ခြင်းမေတ္တာတစ်ခုကို ကိုယ်နဲ့ကေ ဖန်တီးနိုင်လိုက်တာ ကံကောင်းခြင်းတစ်ခုလို့ အထင်ရောက်ခဲ့ဖူးတယ်နော်။

တနင်္ဂနွေအားလပ်ရက်တွေတိုင်းဟာ ကေနဲ့ကိုယ့်အတွက် ရင်အခုန်ရဆုံးရက်တွေ ဖြစ်ခဲ့တယ်။ ကေ့ရဲ့ ရုံးအဆင်း ညနေခင်း တွေထဲ ကိုယ့်အပျော်တွေက အိမ်အပြန်လမ်းတစ်လျှောက် စီးဆင်းလို့။ အဆက်မပြတ် ချိတ်ဆက်ခဲ့တဲ့ တယ်လီဖုန်းပြောဆိုမှုတိုင်းမှာ ကေ့ရယ်သံတွေက လွင်လွင်ခတ်ခတ် ငြိမ့်ဝေလို့။ ပွင့်လင်းရိုးသားတဲ့ ဘ၀အဓိပ္ပာယ်ဆိုတာ ဟန်ဆောင်မှုကင်း စွာ ဖူးပွင့်မွှေးရီနေတဲ့ ခရေပွင့် လေးတွေဆိုပြီး ကေနဲ့ကိုယ် စာလုံးပေါင်း ညီညာခဲ့ကြတယ်။ ကိုယ်တို့နှစ်ယောက်ရဲ့ အာရုံမှာ ထင်သမျှ လောကတစ်ခွင်ဟာ သိမ်ခမ်းနား ခဲ့ဖူးတယ် ကေ။ ဘာကြောင့်လဲဆိုတော့ ကိုယ့်စိတ်ကူးတွေဟာ ကေ့ ရနံ့တွေဖြစ်ပြီး ကေ့ အိပ်မက်တွေက ကိုယ့် အနာဂတ်ဖြစ်လို့ပေါ့။

တကယ်တော့ ပျော်ရွှင်မှုတွေနောက်မှာ လိုက်ပါလာတတ်တဲ့ ၀မ်းနည်းမှုတွေကို သိလျက်နဲ့ သတိမမူခဲ့တာဟာ ကိုယ်တို့ အပြစ် ပါပဲ။ တစ်ခုခု လုပ်ချင်ပြီဆို ဘယ်သူ့ခံစားချက်ကိုမှ ထည့်မတွက်ဘဲ လုပ်တတ်တဲ့ ကေ့စရိုက်နဲ့ စကားမတည်ဘဲ လိမ်ညာတတ်တဲ့ ချစ်သူကို ဆင်ခြင်မဲ့စွာ မုန်းတီးတတ်တဲ့ ကိုယ့်စရိုက်နှစ်ခု ထပ်တိုက်ဆုံချိန်ဟာ ဘာဖြစ်လို့ ဒီလောက် မြန်ဆန်သွားရတာလဲ ကေ။

ကိုယ်တို့ရဲ့ ချစ်ခရီးဟာ ဘာဖြစ်လို့ ဒီလောက်တောင် ခက်ခဲကြမ်း တမ်းရတာလဲ။ ကေသိပ်ချစ်တဲ့ ကေ့ရဲ့ ဖေဖေဆီက စကားလုံး တွေဟာ ကိုယ့်ကို အထိနာစေခဲ့တယ်။ ကေ့မမတို့ မိသားစုဟာ အနုပညာသမားဖြစ်တဲ့ ကိုယ့်အပေါ် အရမ်းကြီးတော့ နားလည်ပေးနိုင်မှာ မဟုတ်ဘူးပေါ့။

ဖြစ်ပျက်ခဲ့သမျှအတွက် ကိုယ်ဘာမှ ပြန်လည်ဖြေရှင်းလိုစိတ် မရှိတော့ပါဘူး။ ဘယ်လိုမှ ပေါင်းစပ်ဖို့ မဖြစ်နိုင်တော့တဲ့အခါ ကျော ခိုင်းဝေးကွာသွားရမှာက သဘာဝတရားပဲမဟုတ်လား ကေ။ ကိုယ်ပိုင်အတ္တအတွက် အသက်ရှင်သန်နေတဲ့ လူသားတွေထဲမှာ ကေနဲ့ ကိုယ် လည်း ပါဝင်နေကြတယ်ဆိုတာ မေ့သွားလို့ မဖြစ်ဘူးလေ။ အချစ်အတွက် ဘယ်သူက ဘယ်လောက် အထိ ပေးဆပ်ရဲခဲ့လို့လဲ။ ဒီလိုနဲ့ ကိုယ် ဟာ ဗင်းဆင့်ဗန်ဂိုး မဟုတ်ခဲ့ဘူး ကေ။

ဟင့်အင်း ကေ။ ကေရော ကိုယ်ရော ဘယ်သူမှ မမှားခဲ့ကြပါဘူး။

ကိုယ်တို့နှစ်ယောက် ကြုံခဲ့ရတဲ့ မတရားတဲ့ အဖြစ်အပျက်တွေကသာ မှားယွင်းနေခဲ့တာပါ။ ကေ့ဖက်က အလျော့ပေးလာမယ့် နေ့ရက်ကို တစ်ဖက်သတ်ဆန်စွာ စောင့်စားဖို့မသင့်ပေမယ့် ကိုယ်စောင့်စားမိခဲ့တယ်။ တစ်ချိန်တည်းမှာပဲ ကေ ကလည်း ကိုယ့်ဆီက ချော့ မော့မှုလေး တစ်စွန်းတစ်စလောက်ကို ဇွဲကောင်းစွာနဲ့ စောင့်မျှော်ခဲ့ပြန်တယ်။ အဲဒီနောက်တော့ ကေလည်းသိတဲ့အတိုင်း ဟိုးအစောပိုင်း ကတည်းက ကိုယ်တို့နှစ်ယောက်ကို အကဲခတ်လာခဲ့ကြတဲ့ နှစ်ဖက်ဆွေမျိုး၊ သူငယ်ချင်း၊ လုပ်ဖော်ကိုင်ဖက်တွေရဲ့ စကားလုံးတွေဟာ ကိုယ်နဲ့ ကေ့ကို လုံးလုံးဝေးအောင် ဖန်တီးလိုက်ကြတော့တာပါပဲ။

                ကေရေ။

အခုလို ကေနဲ့ ကိုယ်နဲ့ ရိုးရိုးသူငယ်ချင်းအဆင့်မှာတင် ဒီစာကို ကြိုတင်ရေးပြီး ကေ့ဆီကို ပေးလိုက်မိတဲ့အတွက် ကိုယ်ဟာ တကယ့်ကို စိတ်မနှံ့သူတစ်ယောက်လို့ ထင်သွားမလားပဲ။ ဒါပေမယ့် ခု ဒီစာကို ကေ ဖောက်ဖတ်လိုက်ချိန်မှာတော့ ဟော့ဒီကြိုတင်ရေးသားမှုတွေဟာ အမှန်တကယ်ဖြစ်ပျက် ပြီးစီးသွားခဲ့ပြီလေ။

ဒီစာနဲ့အတူ တစ်ပါတည်း ရေးပေးခဲ့တဲ့ စာနံပါတ် (၁) နဲ့ (၃) ကို ကေမဖတ်ပါနဲ့တော့နော်။ ကျေးဇူးပြုပြီး စာနံပါတ် (၁) နဲ့ (၃) ကို မီးရှို့ဖျက်ဆီးပစ်လိုက်ပါတော့…။

                ထာဝရနှုတ်ဆက်လိုက်ပါတယ် ကေ။

စာနံပါတ် (၃)

                ကေ။

                ကိုယ် ကေ့ကို သိပ်ချစ်ပါတယ် ကေ။

ချစ်သူဘ၀အစပိုင်းမှာ ကိုယ့်မိသားစုထဲ ကေ ခပ်ရဲရဲတိုးဝင်ပြီး အဆင်ပြေအောင်နေထိုင်ပေးတာ တွေ့ရလို့လည်း ၀မ်းသာမိပါရဲ့။ တစ်ခါတစ်ရံမှာတော့ ကိုယ့်မိသားစုကြောင့် ကေတစ် ယောက် စိတ်ညစ်ခဲ့ရဖူးမှာပဲနော်။ ထင်သလောက် မလွယ်သလို ထင်သလောက်လည်း မခက်တဲ့ ဆက်ဆံရေးတစ်ခုမှာ အနည်ထိုင်ဖို့ ကေနဲ့ကိုယ် တော်တော် ကြိုးစားယူခဲ့ကြရတယ် မဟုတ်လား။

ကေ့ရဲ့ အားပေးမှုတွေသာ မပါရင် ကိုယ့်အောင်မြင်မှုတွေဟာ ဒီလောက်အတိုင်းအတာထိ ရောက်လာမယ်မထင်ဘူး။ ချစ်လမ်း ခရီးတစ်လျှောက် ကြုံတွေ့ခဲ့တဲ့ အခက်အခဲတွေတိုင်းမှာ ကိုယ့်ဖက်က ရပ်တည်ပေးခဲ့တာ ဘယ်တော့မှ ကိုယ်မမေ့တော့ပါဘူး။ ကိုယ်တို့ နှစ်ယောက် ချစ်သူဘ၀ကတည်းက တောင့်တမျှော်လင့်ခဲ့ကြတဲ့ အေးချမ်းလေးနက်တဲ့ မိသားစု ဘ၀လေးဟာ တဖြည်းဖြည်းချင်း ပုံပေါ်လာခဲ့ပြီ ထင်တယ်နော်။

ခုဆိုရင် ကိုယ်တို့မိသားစုဘ၀လေးအဆင်ပြေဖို့ ကေ ဦးဆောင်တဲ့ စီးပွားရေးလုပ်ငန်းတွေကလည်း တက်ရိပ်ပြနေပြီ။ ကေရဲ့ အားပေးမှုနဲ့ စစ်မှန်တဲ့ ကိုယ့်စေတနာတွေကြောင့် ကိုယ်လည်း အတော်အတန် ၀င်ငွေရနေတဲ့ အနုပညာသမားတစ်ယောက်ဖြစ်နေပြီ။ ကိုယ် တို့ရဲ့ သမီးကြီးကလည်း ဒီနှစ်ဆို ဒုတိယတန်းတက်ပြီ။ သားငယ်လေးကတော့ သူငယ်တန်း ပေါ့။

တစ်ခါတစ်လေ ကိုယ်စာထိုင်ရေးနေရင်း ကလေးနှစ်ယောက်ကို စာသင်ပြပြီး အလုပ်ရှုပ်နေတဲ့ ကေတို့ သားအမိသုံးယောက်ကို လှမ်းကြည့်ပြီး ကြည်နူးမိပါရဲ့။ နှစ်လခြားတစ်ခါလောက် ကိုယ်တို့ မိဘတွေဆီ အလည်သွားတိုင်း ကိုယ်တို့သမီးနဲ့ သားဟာ ဘိုးအေ ဘွားအေတွေရဲ့ အချစ်သည်းမှုခံရတာကို မြင်ရပြန်တော့လည်း ကိုယ် ကြည်နူးရတာပါပဲ။ ဒီလိုမြင်တဲ့အခါ တိုင်း ဟိုအရင် ကေနဲ့ကိုယ် သမီးရည်းစား ဘ၀က ရင်ဆိုင်ခဲ့ရတဲ့ အခက်အခဲတွေ အတွက် အမြတ်ပြန်ရလိုက်သလို ခံစားရတယ်။

ဒါပေမယ့် ကေရယ်။

ရုပ်ရှင်ထဲမှာသာ ချစ်သူတွေ ညားသွားရင် ဇာတ်လမ်းပြီးသွားတာ။ လက်တွေ့ဘ၀မှာက ညားပြီးမှ ဇာတ်လမ်းက စတာ မဟုတ် လား။ ကေနဲ့ကိုယ် လက်တွဲထူထောင်လိုက်တဲ့ အိမ်ထောင်တစ်ခုဟာ ခုမှ အဆင်ပြေခါစ ရှိသေးတယ်ဆိုပေမယ့် မမြင်နိုင်သေးတဲ့ အဖျက် အမှောင့်တွေက ရှေ့မှာ ပုံစံအမျိုးမျိုးနဲ့ ရှိနေဦးမှာ အသေအချာပဲ။

ဘာပဲဖြစ်ဖြစ် ဒီနေ့ဟာ ကေနဲ့ကိုယ် အိမ်ထောင်သက် ရှစ်နှစ်ပြည့် ဖြစ်တဲ့အတွက် ကေ့ကို အမှတ်တရလက်ဆောင်တစ်ခု ပေးချင်မိတယ်။ အဲဒါကတော့ ကေနဲ့ချစ်သူမဖြစ်ခင်ကတည်းက တင်ကြိုရေးသားပြီး ကေ့ဆီပေးအပ် ထားခဲ့တဲ့ ဟောဒီ စာနံပါတ် (၃)ကို ကေ ဖွင့် ဖောက်ဖတ်ဖို့ပါပဲ။ ပြီးတော့မှသာ စာနံပါတ် (၁) နဲ့ (၂)ကို ကေဆက်ဖတ်ပေါ့။

ဒီစာနဲ့အတူပေးအပ်ခဲ့တဲ့ စာနံပါတ် (၁) နဲ့ (၂) ကို ခုကစ နှစ်ဦးသဘောတူ ဆက်လက်သိမ်းဆည်းကြစို့နော်။ ဘာကြောင့်လည်း ဆိုတော့ ဟောဒီ စာနံပါတ် (၁) နဲ့ (၂) ဟာ ကိုယ်တို့နှစ်ယောက်ရဲ့ ခက်ခဲတဲ့   အောင်မြင်မှုအထွေထွေကို ကိုယ်စားပြုနေလို့ပဲပေါ့။

                အရာရာအတွက် ကျေးဇူးတင်ပါတယ် ကေ။

လွန်းဆက်နိုးမြတ်

အချစ်ဂျာနယ်၊ အတွဲ (၆)၊ အမှတ် (၁၃)၊ မေ ၂၀၀၉

ငါးရိုးပင်လယ်ဝတ္ထုတိုစု

ပန်းချီ-ဧကစာချို