ပန်းဝတ်ရောင်ထွေ

DSC01286ပန်းဝတ်ရောင်ထွေ

တောထဲမှာ သူတို့အားလုံးလူစုကွဲသွားကြသည်။ တခြားသူတွေတော့မသိ။ သူကတော့ နောက်ပြန်လှည့်လာခဲ့သည်။ အားလုံး သဘောတူညီမှုဖြင့် အရေးပေါ် ဆုံမှတ်တစ်ခုကို သူတို့ သတ်မှတ်ထားခဲ့ကြသည်။ ထိုဆုံမှတ်နေရာကို ရောက်ဖို့အတွက် နောက်ပြန်လှည့် ရမည်။ တောလမ်းက ရှည်လျားပြီး ရှုပ်ထွေးနေသည်။ အလာတုန်းက လာခဲ့သော လမ်း ဟုတောင် မထင်ရ။ စိတ်ထဲမှာ စိမ်းလွန်းနေသည်။ အလာတုန်းကလောက် မရင်းနှီးသလို ခံစားရ၏။ အမှန်တော့ အလာတုန်းက တစ်ဖွဲ့လုံးဟေးလားဝါးလားနှင့် လာခဲ့ကြတာဖြစ်သည်။ လမ်းကိုတောင် ကောင်းကောင်းသတိမပြုမိခဲ့ကြ။ ခုတော့ သူတစ်ယောက်တည်း မျက်စိသူငယ် နားသူငယ်ဖြစ်နေပြီ။

အနီးရှိသစ်ပင်တစ်ပင်ပေါ် ရှည့်နှစ်ကောင် ရှေ့ဆင့်နောက်ဆင့်ပြေးတက်သွားကြတာ မြင်သည်။ ဘယ်နေရာက မှန်းမသိ ငှက် တစ်ကောင်အော်မြည် သံက စူးစူးရဲရဲပေါ်ထွက်လာသည်။ စိတ်ထဲမှာ ငြိမ်းချမ်းသလို ခံစားလိုက်ရ၏။ ထူးဆန်းသည်။ အဖွဲ့နှင့်အတူ လာစဉ်က ထိုခံစားမှုမျိုးမရ။ လူဆိုတာ တစ်ယောက်တည်းရှိနေကာမှ ငြိမ်းချမ်းမှုကို ရတာလား။ သူအတွေးကို သူကိုယ်တိုင်ပြုံးဖြစ်သွားသည်။ တောလမ်းလေးအတိုင်း သူပြုံးရင်း လျှောက် လာခဲ့သည်။ ခြေလှမ်းတွေက ပေါ့ပါးနေသည်။ သီချင်းတစ်ပုဒ်လောက် နားထောင်ချင် စိတ်ပေါက်မိသည်။ သို့ရာတွင် Mp-4၊ Hand Phone စသော ပစ္စည်းများကို တောထဲမ၀င်ခင် အပြင်က သူတို့ကားတွေထဲမှာ စည်းကမ်းအရ ထားခဲ့ကြရ၏။ အားလုံးသဘောတူညီသတ်မှတ်ထားသော စည်းကမ်း။ ပန်းဝတ်ရောင်ထွေ၊ တင့်မျိုးနေသည်၊ ပြာခြေဖြူညွန့်၊ လည်ရေးတန့် နှင့်၊ ခပ်ဖန့်တောင်ပံ၊ ရွှေရည်ကျံသည် ၊ နှိုင်းစံတက်ဝေး၊ သင်္ဘောကျေး။ ဦးတိုး၏ ရတုတစ်ပိုဒ်ကို သူတီးတိုးရေရွတ်ဖြစ်သည်။ စိတ်ထဲမှာ ပြည့်စုံသွား၏။ သူဆက်လျှောက်လာခဲ့သည်။ ခြေသံကြောင့် တောလမ်းဘေးခြုံငယ်တွေထဲမှ အကောင်ဘလောင်လေးများ ပြေးလွှားသွား ကြပုံရသည်။ ခြုံငယ်များ သိမ့်ခနဲ လှုပ်ခါသွားသော်လည်း အကောင်ကိုယ်ထည်ကို မမြင်ရ။ ခဏကြာတော့ သူနည်းနည်းဟိုက်လာသည်။ အောက်ခြေရှင်းသော ခပ်လတ်လတ် သစ်ပင်တစ်ပင်ရှာကာ ပင်စည်ကို မှီရပ်ရင်း ကျောပိုးအိတ်ကို ဖြုတ်သည်။ ထို့နောက် အထဲမှ ရေဗူးကို ထုတ်ယူ၍ မော့သောက်လိုက်သည်။ ရှေ့ကို မျှော်ကြည့်တော့ အတော်သွားရဦးမည့်ပုံ။ တခြားသူတွေကို ဖျပ်ခနဲ သူသတိ ရလိုက်၏။ အများစုကတော့ ဆုံမှတ်ရှိရာ နောက်ကြောင်းကို ပြန်လှည့်လာဖို့များသည်။ သို့သော်မသေချာ။ သူတို့ချင်းပြန်တွေ့သွားပြီး ရှေ့ခရီး ဆက်ချင် လည်း ဆက်နိုင်သေးသည်။ ဒါမှမဟုတ် လမ်းပျောက်ကာ ရှေ့မရောက် နောက်မရောက်လည်း ဖြစ်နေနိုင်သေးသည်။ သူဆက်မတွေးတော့။

ပင်စည်ကို မှီရပ်နေရာမှ လျှောရွေ့ထိုင်ချလိုက်သည်။ ကျောပိုးအိတ်ထဲက အသင့်ခေါက်ထည့်ထားသော ဂျာနယ်ဖြင့် တင်ပါးအောက်မြေပြင် ကို ခေါက်လျက်အနေအထားအတိုင်းပဲ ထိုးခင်းလိုက်သည်။ တောဆောင်းဦးထုပ်ကို သူချွတ်လိုက်တော့ စေးထန်းသော ချွေးတွေက လေနှင့် ထိပြီး အေးမြလို့ သွား၏။ မျက်နှာပေါ် နေပြောက်အနည်းငယ်ကျသဖြင့် ဦးထုပ်ကို မျက်လုံးပေါ်တယ်ဆိုရုံ အုပ်ကွယ် ထားလိုက်သည်။ အကြည့် က မြက်ပင်ငယ်လေးတွေထဲ ခြေမျက်စိထိ ဖုံးနေသော သူ့ခြေထောက်နှစ်ချောင်းဆီ တန်းရောက်သွား၏။ သို့သော် လည်ရှည်သားရေဖိနပ်စီးထား၍ ကိစ္စမရှိ။ ရှေ့တည့်တည့်မှ ကြည့်လျှင် သူ့ပုံသဏ္ဍန်က အင်္ဂလိပ်အက္ခရာ M ပုံသဏ္ဍန်။ ထိုပုံသဏ္ဍန်အတိုင်း ပင်စည်ကိုမှီလျက် သူမှေးခနဲ ဖြစ်သွားသည်။ မနက် ၅ နာရီကတည်းက ထထွက်လာခဲ့သော ခရီးပန်းမှုအစွမ်း။ ဘယ်လောက်ကြာသွားသည်မသိ။ သူ့ခြေထောက်ပေါ် တစ်စုံတစ်ရာ လာပွတ်သပ်နေ သလို ခံစားချက်ကြောင့် သူ့မျက်လုံးတွေပွင့် သွားသည်။ အား။ သူလန့်အော်မိမတတ် ထိတ်ထိတ်ပျာပျာဖြစ်သွား၏။ သို့ရာတွင် အသံကို ချက်ချင်းပဲ မထွက်အောင် ထိန်းလိုက်နိုင်သည်။ မြွေတစ်ကောင်။ သူ့ခြေထောက်တွေပေါ် တရွတ်ဖြတ်ပွတ်တိုက်သွားနေသည်။ မြင်ရုံဖြင့် အဆိပ်ပြင်းမှန်း သိသာသည်။ သူဘာလုပ်ရမလဲ။ မြွေက သူ့ပြောင်းလဲမှုကို ရိပ်မိသွားပုံရ၏။ ရှေ့ဆက်မသွားဘဲ နောက်ပြန်လှည့်ကြည့်ကာ ရပ်နေသည်။ သူအာခေါင်ေ တွ ခြောက်ပြီး ဇောချွေးတွေပြန်လာသည်။ ဘေးနားချထားသော ကျောပိုးအိတ်ထဲမှာတော့ ဓားမြှောင်ပါသည်။ သို့သော် လက်ရှိအခြေအနေက လှုပ် မရ ပြုမရ။ သူ့အကြံကို မြွေက သိသွားသလားမပြောတတ်။ ကျောပိုးအိတ်ဖက် ခေါင်းလည်လာကာ ဟိုတိုးဒီတိုးလုပ်နေသည်။ လျှာက အဆက် မပြတ်တစ်လစ်တစ်လစ်။ သူတုတ်တုတ်မျှမလှုပ်ရဲ။ မျက်လုံးကို အသာမှေးစင်းကာ ငြိမ်ကြည့်နေရသည်။ ခဏကြာမှ မြွေက သူ့ခြေထောက်ပေါ်ဖြတ် ပြီး တောထဲ တရွေ့ရွေ့တိုးဝင်သွား၏။ လုံးလုံး လျားလျား ပျောက်ကွယ်သွားတာ သေချာတော့မှ ကျောပိုးအိတ်ကို ကောက်ဆွဲပြီး ကမန်းကတန်း သူထရပ်လိုက်သည်။ မျက်နှာပေါ် တင်ထားသော ဦးထုပ်က အောက်ပြုတ်ကျသွားသဖြင့် ပြန်ကောက်ရသေးသည်။ သူမော သွားသည်။

တောလမ်းပေါ်ခြေချမိတော့ ရေဗူးထုတ်ကာ မော့သောက်လိုက်သည်။ ရေတောင်အတော်လျော့သွားပြီပဲ။ ရှေ့ဆက်ရန် အတွက် သူ့ကိုယ်နေဟန်ထား ကို ပြင်သည်။ ဓားမြှောင်ကိုတော့ အပြင်ထုတ်ပြီး ဂျင်းဘောင်းဘီခါးပတ်မှာ ချိတ်လိုက်သည်။ ဓားမြောင်အိမ် သားရေအိတ်က ခါးပတ်မှာ အဆင်သင့် ချိတ်ရအောင် ပြုလုပ်ထားသောကြောင့် အဆင်ပြေသည်။ သူဆက်လျှောက်လာခဲ့သည်။ တောက မနာလိုစရာကောင်းလောက်အောင် ငြိမ်သက်လို့နေ ၏။ တစ်ခါတစ်ခါမှသာ အဝေးက အကောင်ဘလောင်တချို့၏ အော်မြည်သံကို ကြားရ သည်။ သူတစ်ယောက်တည်း လာခဲ့တာ မှားပြီလား ဟု တောင်တွေးမိသည်။ သို့သော်လည်း တခြားသူတွေကို ရှာဖွေရန်မှာ မလွယ်ကူ။ ထိုအချိန်မှာပဲ သူ့ဗိုက်က ထိုးဆာလာသည် ။ ကျောပိုးအိတ်ကိုဖြုတ် ကာ အထဲမှာ စားစရာဘာပါလဲ ကြည့်ရပြန်သည်။ တောထဲမ၀င်ခင် အားလုံး သဘောတူညီသတ် မှတ်ထားမှုဖြင့် အစားအစာကို ဝေစုခွဲခြမ်းကာ ထည့်ပေးထားခြင်းဖြစ်သည်။ ကိုယ်စားချင်သည့် အစားအစာကို ကြိုတင်ယူဆောင်လာခဲ့တာမျိုးမဟုတ်သဖြင့် ဘာထည့်ပေးလိုက်သလဲ မသိရ ။ ကျောပိုးအိတ်ထဲမှ ဗူးငယ်နှစ်ဗူးထွက်လာသည်။ ဖွင့်ကြည့်လိုက်တော့ နှစ်ဗူးစလုံးထမင်းတွေချည်းဖြစ်နေသည်။ ဟင်းဗူးမပါတာပဲလား။ လွဲမှားစွာ ထည့်လိုက်ခြင်းပဲလား။ ဒါလည်းမသိရ။ အစားအသောက်တာဝန်ယူသည့် ငနဲက တော်တော်ချာတာပဲဟုတော့ သူမှတ်ချက်ချဖြစ်သည်။ ကျောပိုးအိတ် ထဲ သူထပ်မွှေလိုက်သည်။ ကံကောင်းထောက်မစွာ အာလူးကြော်တစ်ထုပ်ကို သွားတွေ့သည်။ ကျောပိုးအိတ်ထဲ ထမင်းတစ်ဗူးပြန်ထည့်ကာ ထိုင်ဖို့နေရာ ရှာရပြန်သည်။ ဒီတစ်ခါတော့ တောအောက်ခြေက ခြုံနွယ်တွေဖြင့်ရှုပ်ထွေးနေ၏။ အောက်ခင်းရန် ဂျာနယ်ကလည်း စောစောက မြွေတွေ့ သည့် နေရာမှာ ကျန်ခဲ့ပြီ။ တောကြီးတစ်ခုလုံးမှာ လောလောဆယ် သူထိုင်ဖို့ နေရာတစ်နေရာစာ ခက်ခဲနေသည်။ လောကသည် တစ်ခါတစ်ရံ ထိုသို့သော သဘောရှိသည်။ တောလမ်းပေါ်မှာပဲ ထိုင်စားလိုက်ရင် ကောင်းမလားဟု အလွယ်တွေးဖြစ်သည်။ သို့တိုင်အောင် ထိုင်ရတာ အဆင်ပြေမည် မဟုတ်။ စိတ်ထဲမှာလည်း မသိုးမသန့်ဖြစ်မိသွား၏။ ထမင်းဗူးနှင့် အာလူးကြော်ထုပ်ကို တွဲကိုင်လျက် သူရှေ့ဆက် လျှောက်လာခဲ့သည်။ အတန် ငယ်လျှောက်မိသောအခါ တောလမ်းတစ်ဖက်တွင် အောက်ခြေရှင်းသော ကမူတစ်ခုကို လှမ်းတွေ့လိုက်သည်။ ရှင်းသည်ဆိုသော်လည်း မြက်ပင် အနည်းငယ်တော့ ပေါက်ရောက်နေသည်။ မတတ်နိုင်။ လတ်တလော ဒီနေရာသာ အကောင်းဆုံး ဖြစ်သည်။

ကမူဆီ ခပ်သွက်သွက် ပြေးသွားရင်း  ထိုင်ချရန် ဟန်ပြင်ပြီးကာမှ မထိုင်ဖြစ်သေးဘဲ ပြန်ထလိုက်သည်။ မြွေပါး ကင်းပါးကြည့် ရဦးမည်။ နောက်ပြီး သူ့ခေါင်းပေါ်က ဦးထုပ်ကိုချွတ်ကာ စိတ်ထဲမှနေ၍ တစ်စုံတစ်ခုကို ခပ်တိုးတိုးရေရွတ် တောင်းပန်လိုက်သည်။ ယုံတာ၊ မယုံတာ အပထား။ ထမင်းဖြောင့်ဖြောင့် စားရအောင်တော့ စိတ်ရှင်းထားရမည်။ အားလုံးပြီး သွားမှ နေရာတွင် အကျအနထိုင်ကာ ထမင်းကို အာလူးကြော်နှင့် သူဖွင့်ဖောက် စားလိုက်သည်။ တခြားသူတွေရော ဘယ်လိုနေထိုင်စားသောက်နေကြပါလိမ့်။ တကယ်ဆိုလျှင် လမ်းမှာ တစ်ယောက်မဟုတ် တစ်ယောက်နှင့်တော့ သူတွေ့သင့်သည်ထင်သည်။ မတွေ့ရသည့်အကြောင်းရင်းက သူကလွဲ၍ တခြားသူအားလုံး ဆုံမှတ်နေရာကို ရောက်နှင့်နေကြလို့များလား ။ ဖြစ်နိုင်ချေနည်းသည်။ သူကသာ နောက်ပြန်လှည့်ပြီး ဆုံမှတ်နေရာကို ရည်မှန်းသွားနေခဲ့ သည်။ တခြားသူတွေက ရှေ့ဆက်ပြီး သွားနေလျှင် မခက်ဘူးလား။ သူ့လိုမျိုး လမ်းခုလတ်မှာ ရောက်နေမည့်သူတွေလည်း ရှိနိုင်နေသေးသည်။ ထမင်းကို သူမြန်မြန်ပဲ စားလိုက်သည်။ ရေဗူးကို နောက် တစ်ခါထုတ်သောက်တော့ ရေကုန်ခါနီးပြီဆိုတာကို သတိပြုမိ၏။ ရှေ့လျှောက် ရေကို ချွေတာရမည်။ ကံကောင်းတာတစ်ခုက တောနှင့်အပြိုင် စီးဆင်းနေသော စမ်းချောင်းတစ်ခုရှိနေမှန်း သတိရမိလိုက် ခြင်းပင်။ ကမူကနေခွာပြီး သူရှေ့ဆက်လျှောက်လာခဲ့သည်။ လောလောဆယ် စမ်းချောင်း ကို ရှာရမည်။ ဆုံမှတ်ကို ရောက်ဖို့က အဝေးကြီး လိုသေးသည်။ ကံကောင်းလျှင် စမ်းချောင်းမှာ ကွဲကွာခဲ့ရသော တခြားသူတွေ ကို ပြန် တွေ့နိုင်သည်။

တောလမ်းလေးအတိုင်း သူလျှောက်လာသည်။ ဗိုက်ပြည့်သွားသဖြင့် အိပ်ချင်စိတ်လည်း ပေါက်လာသည်။ သို့သော်မအိပ်ရဲ။ စမ်းချောင်းဆီရောက်မှ အနားယူတော့မည်။ စမ်းချောင်းဆီရောက်လျှင်တော့ နေရာကောင်းကောင်းရနိုင် သည်။ သူ့လက်မှ နာရီကို ယောင်ယမ်းပင့်မြှောက် ကြည့်မိလိုက်သည်။ သူ့လက်မှာ ဘာနာရီမှမရှိ။ အပြင်က ကားထဲမှာ ထားခဲ့ရတာကို ပြန်အမှတ်ရမိသွား၏။ ကျွတ် …။ ဘ၀င်မကျဟန်ဖြင့် သူကျွတ်တစ်ချက်စုတ် လိုက်စဉ်မှာပဲ လမ်းမြွှာတစ်ခုကို ဘွားခနဲ သွားတွေ့သည်။ တကယ်တော့ အစကတည်းက ဒီတောက လမ်းတွေရှုပ်တယ်ဆိုပြီး နာမည်ကြီးပြီးသား။ သူတို့ အားလုံးလူစုကွဲခဲ့ရတာလည်း ဒီအချက်ကြောင့်ပဲ ဖြစ်သည်။ နောက်ပြီး ဒီတောကိုမှ အဓိကရွေးပြီး လာကြဖို့ အားလုံး သဘောတူညီသတ်မှတ် ခဲ့ရတာလည်း ဒီအချက်ကြောင့်ပဲဖြစ်သည်။ လမ်းမြွှာထိပ်မှာ ရပ်ပြီး အတွင်းကို သူလှမ်းမျှော်ကြည့်လိုက်သည်။ လက်ရှိ သူလျှောက်နေေ သာ တောလမ်းလေးနှင့် ချွတ်စွတ်နီးပါးတူညီနေတာကလွဲ၍ အခြား ထူးခြားမှုကို မမြင်ရ။ သူလှည့်ထွက်မည့်ဟန်ပြင်လိုက်သည်။ နေဦး။ ရုတ်တရက် တစ်စုံတစ်ခုကို စဉ်းစားမိပြီး သူခေါင်းနပန်းကြီးသွား၏။ သူလျှောက်လာခဲ့သည့်လမ်းက ဆုံမှတ်ရှိရာဆီသွားသောလမ်း အစစ်အမှန်မှဟုတ်ရဲ့လား။ အခိုက်အတန့်အားဖြင့် ဇဝေဇ၀ါ ဖြစ်ကာ သူကြောင်သွားမိသည်။ သူတို့အားလုံး လူစုကွဲကာစအခြေအနေကို ပြန်တွေးကြည့်လိုက်သည်။ အခြေအနေက ရှင်းရှင်းလင်းလင်းမရှိဘဲ ရှုပ်ထွေးနေသည်။ တောထဲ စတင်ဝင်ရောက်လာကတည်းက ဘီယာတစ်ပုလင်းပြီးတစ်ပုလင်း သောက်ခဲ့သော ရီဝေမှုများနှင့် အထိန်း အသိမ်းမဲ့ပျော်ရွှင်မှုများကြားမှာ အရာရာေ၀၀ါးနေသည်။

တဖြည်းဖြည်းနှင့် နဂိုလျှောက်လာသော လမ်းကို ယုံကြည်မှုမရှိတော့သလို ခံစားလာရသည်။ မှတ်ဥာဏ်က လည်း ခုကျမှ အလာတုန်းကလမ်း ဆိုတာကို မသေချာချင်တော့။ အတန်ကြာသည်အထိ လမ်းမြွှာထိပ်မှာ သူရပ်တန့်နေမိ၏။ ဘာလုပ်ရမလဲ။ ဘာလုပ် သင့်သလဲ။ နဂိုလျှောက်လာသော လမ်းက ဆုံမှတ်ဆီ အမှန်တကယ်ရောက်သော လမ်းလား။ အခုမှတွေ့ရသည့် လမ်းမြွှာက ဆုံမှတ်ရှိရာ ဆီရောက်နိုင်သော လမ်းလား။ ဆုံမှတ်ဆီ အမှန်တကယ်သွားသောလမ်းဆိုလျှင် လမ်းဘေးမှာ အလာတုန်းက သူတို့သောက်ပြီး လွှင့်ပစ်ခဲ့ သော ဘီယာပုလင်းခွံများ ရှိရမည်။ ကြည့်စမ်း။ ဘာဖြစ်လို့ ဒါကို စောစောကတည်းက သူသတိမပြုမိရတာလဲ။ သူ့မျက်လုံးတွေ အရောင်တဖျပ်ဖျပ်လက်သွားသည်။ သို့ရာတွင် ဒီကိစ္စက ထင်သလောက်မလွယ်။ တောလမ်းဘေးတစ်ဖက်တစ်ချက်တွင် ခြုံတွေ နွယ်တွေ အပင်တွေက ပေါင်းစုံရှုပ်ယှက်ခတ်နေသည်။ နောက်ပြီး သူတို့ အားလုံး တစ်ယောက်တစ်ပေါက် လက်စလက်နအမျိုးမျိုးဖြင့် ထင်သလို လွှင့်ပစ်ခဲ့သော ဘီယာပုလင်းများကလည်း ရောက်ချင်ရာရောက်နေနိုင်သေး သည်။ သူ့မျက်လုံးတွေ အရောင်ပြန်ဖျော့သွားပြန်၏။ ဘာလုပ်ရမလဲ။ စဉ်းစား။ ခုမှတွေ့ရသော လမ်းမြွှာထဲကို သူနောက်တစ်ကြိမ် မျှော်ကြည့်မိ သွားပြန်သည်။ ဇဝေဇ၀ါဖြစ်မှုက စိတ်ထဲမှာ ပြန်ပေါ်လာ၏။ အိုကွာ… ဖြစ်ချင်ရာဖြစ်ဆိုပြီး လမ်းမြွှာထဲ သူစွတ်ဝင်ချလာလိုက်သည်။ ၀ါးတစ်ရိုက်ေ လာက်လျှောက်ဝင်ပြီး သွားကာမှ မဖြစ်သေးပါဘူး ဆိုကာ နောက်သို့ သူပြန်လှည့်လာသည်။ မူလသူရပ်နေရာကို ပြန်ရောက်တော့ ဘာလုပ်ရမည် မသိတော့ဘဲ ထပ်ပြီး ရပ်နေမိပြန်၏။

ဘာပဲဖြစ်ဖြစ် သဲလွန်စက ဘီယာပုလင်းတွေပဲဖြစ်သည်။ အလာတုန်းက သူတို့ထဲမှ တစ်ယောက်က ဘီယာ ပုလင်းလွတ် တစ်လုံးဖြင့် လှမ်းပစ်လိုက်ရာ အပင်ကြီးတစ်ပင်၏ ပင်စည်နှင့် ထိမှန်ကွဲကြေသွားခဲ့တာ သူသတိရလိုက်သည်။ လက်ကျန်ဘီယာရည်တွေက ပင်စည်မှာ စွန်းထင်းစီးကျနေ ခဲ့သေးသည်။ ဟုတ်ပြီ။ ဒါကိုပဲ ရှာရမည်။ လမ်းဘေးခြုံနွယ် ပေါင်းမြက်တွေထဲက ပုလင်းလွတ်များကို ရှာလျှင် ခက်နေဦးမည်။ တစ်ခုရှိတာက လမ်း ။ ဘယ်လမ်းကို ရွေးမလဲ။ နဂို လျှောက်လာသော လမ်းကို ရွေးလျှင် ဘီယာပုလင်းထိမှန် သော အပင်ကြီးကို ကျော်လွန်လာခဲ့ပြီလားပင်မသိ။ သူက နဂို တောလမ်းအတိုင်း တော်တော်ဝေးဝေးရောက်အောင် လျှောက်လာခဲ့ပြီးပြီ မဟုတ်လား။ သူအကြံအိုက်သွားသည်။ မဟုတ်သေးဘူး။ အလာတုန်းက ဘီယာတင်မဟုတ်၊ အမြည်းအဖြစ် အာလူးကြော်ထုပ်များ သီဟိုဠ် စေ့လှော်ထုပ်များပါ ဖောက်စားခဲ့ကြတာကို သူပြန်မြင်လာသည်။ တောထဲမ၀င်ခင် တစ်ယောက်က ၀က်ဆီဖတ်ကြော်ထုပ်ယူမလို့ လုပ်သေးသော်လည်း အားလုံးဝိုင်းကန့်ကွက်ကြသဖြင့် ကားထဲမှာ ထားခဲ့ရသေးသည်။ ဟုတ်သားပဲ။ ထမင်းနှင့်စားခဲ့ရသော သူ့ကျောပိုး အိတ်ထဲက နောက်ဆုံးလက်ကျန်အာလူးကြော်ထုပ်ကလေး။ သို့ရာတွင် ခုခါမှ သူပြန်စဉ်းစားကြည့်မိသွားသည်။ နဂိုလျှောက်လာသော တောလမ်းမှာ ထိုအမြည်းထုပ်အမှိုက်သရိုက်များကို မမြင်ခဲ့ရ။ ယုတ်စွအဆုံး ရေသန့်ဗူးခွံလေးတောင် မတွေ့ရှိခဲ့ရ။ တစ်ခုခုတော့ မှားနေပြီ။ ဘုရား..ဘုရား။ သူဦးခေါင်းတစ်ခုလုံး အိုးထိန်းစက်ပမာ ဖြုန်းစားကြီး ချာချာလည်သွားသည်။ အစကတည်းက လမ်းမှားလာခဲ့တာထင် တယ်။ ထိုနေရာမှာပင် သူသေချင်စိတ်ပေါက်သွားသည်။ တောထဲ ရောက်လာပြီး နောက် ပထမဆုံးအကြိမ်အဖြစ် သူ့ကိုယ်သူလည်း စိတ်ပျက်သွားမိသည်။ အခုနေ တစ်ယောက်ယောက်နှင့်တွေ့လျှင် ကောင်းမည်ဟုလည်း တောင့်တမိလိုက်သည်။ တစ်ယောက်မှား တာထက် နှစ်ယောက်မှားတာက ပိုများကောင်းနေနိုင်မလား။ အစကတော့ ဆုံမှတ်နေရာသို့ သူသွားနေသည်ဟု ယူဆထားခဲ့၏။ သို့ရာတွင် လူစုကွဲစဉ်ကပင် သူက လမ်းမှားလာခဲ့ ပုံရသည်။ ဒါမှမဟုတ် ဆုံမှတ်ရှိရာ နောက်ဖက်သို့ ပြန်မသွားဘဲ ရှေ့ဆက်လျှောက်လာမိ တာရင်လည်း ဖြစ်နိုင်သည်။ အလိုလိုနေရင်း ခြေကုန်လက်ပန်း ကျသွားသလိုမျိုး သူခံစားလိုက်ရသည်။ အခြေအနေက မထူးတော့ပြီမို့ အသင့်တွေ့ရသော ရှေ့လမ်းမြွှာထဲ သူလျှောက်ဝင်လိုက်တော့သည်။ ဒီတစ်ကြိမ်မှာ နောက်ပြန်မလှည့်တော့ဘဲ ရှေ့ကိုသာ ဆက်လျှောက် လာခဲ့သည်။ တောက ထုံးစံအတိုင်း အေးခဲငြိမ်သက်လို့နေသည်။        ။

လွန်းဆက်နိုးမြတ်
၂၁.၈.၁၁
နေ့လည် ၀၃း၁၀နာရီ
(ပန်းဝတ်ရောင်ထွေ-ရာမရကန်ဦးတိုး၏ ရခိုင်အောင်ရတု၊မောင်ဘွဲ့ကျေးစေမှ ပန်းဝတ်ရောင်ထွေအပိုဒ်)

Idea Magazine ၊ဇန်န၀ါရီ၊၂၀၁၃

Advertisements

GHOST RIDERS(တစ္ဆေမောင်းနှင်စီးနင်းသူများ)

GHOST RIDERS
(တစ္ဆေမောင်းနှင်စီးနင်းသူများ)

သုံးယောက်ဆိုတာ ပုံမှန်ပါပဲ။ စီးသူတစ်ယောက် ထိုင်သူနှစ်ယောက်။
လေးယောက် ငါးယောက် တင်စီးတော့ရော ဘာဖြစ်သေးလဲ။
(ဆပ်ကပ်ထဲမှာဆို အယောက် အစိပ်(၂၅ယောက်)ကို
ဆိုင်ကယ်တစ်စင်းတည်းနဲ့ တင်မောင်းပြတယ် )
ဒီမှာက ဆပ်ကပ်မဟုတ်ဘူး။ အယောက်အစိပ်မတင်နိုင်ရင်သာရှိမယ်
ရသလောက်တော့ ရသလို တင်နိုင်ရမယ်။
ကားတစ်စင်းမောင်းဝင်လိုက်တာနဲ့ လမ်းပြည့်သွားတဲ့ ကတ္တရာခပ်ပါးပါးပေါ်မှာ
အရှိန်မပျက် ကပ်ပြီးကျော်တက်/ထွက် နိုင်ရမယ်။
အိမ်ကမိန်းမမျက်နှာပေါ်က သနပ်ခါးပါးကွက် မေ့ရင်မေ့ပလေ့စေ
လမ်းပေါ်က ချိုင့်ခိုးချိုင့်ခွက်မှန်သမျှ အလွတ်ရအောင် ကျက်ထားပြီးသားပဲ။
လမ်းကြိုလမ်းကြားထဲက လှစ်ခနဲ ခုန်ထွက်လာတတ်တဲ့ စည်းမဲ့ကမ်းမဲ့
ဘ၀တူဆိုင်ကယ်တွေ သတိထားတော်မူ။
နောက်ကနေ တိတ်တိတ်ကလေးလိုက်လာပြီး နီးလာမှ မိမိဆိုင်ကယ်လက်ကိုင် အလန့်တကြားဖြစ်သွားစေလောက်အောင် မဟားဒယားကျော်တက်တတ်တဲ့ ကြောင်သူတော်ကြွက်သူခိုးဆိုင်ကယ်တွေကြောင့်
မိမိနှလုံး ဟပ်အတက်ဖြစ်သွားစေနိုင်။
အုပ်စုလိုက် ဟေးလားဝါးလား လမ်းလုံးပြည့်ကွေ့ဝိုက်ဆူညံ စီးလာတာ
မိမဆုံးမ ဖမဆုံးမ ကာလသားလေးတွေပဲ ဖြစ်ပါတယ်။
ဆိုင်ကယ်ဘီးအောက်တည့်တည့် အသေခံစစ်သွေးကြွတွေလို ဆင်ခြင်မှုမရှိ ပြေးဝင်လာတတ်တဲ့ နှုတ်သီးမည်းမည်းနဲ့
ခွေးပေါက်စနလေးတွေရှောင်ရတာ အခက်ခဲဆုံးနဲ့ အန္တရာယ်အများဆုံးဒုက္ခပဲ။
ကမ္ဘာလုံးထဲ ပတ်မောင်းပြရတာလွယ်ပါတယ်။ လက်နှစ်ဖက်လွှတ်စီးပြရတာ ပိုလွယ်ပါတယ်။
နေပူမရှောင် မိုးရွာမရှောင် နေ့မရွေး ညမရွေး ခေါက်ရေကိုက်အောင် မောင်းရတာ မလွယ်ဘူး။
ရှစ်ရက်သားသမီးတို့ရဲ့ ဝေယျာဝစ္စ၀န်စည်စလွယ်မျိုးစုံတင်ပြီး
အရပ်ဆယ့်ခြောက်မျက်နှာ ခရီးတို/ရှည်မရွေး လိုက်လံမောင်းနှင်ပို့ဆောင်ပေးရတာ ပိုမလွယ်ဘူး။
မိုးကာကုတ်အကျီင်္ကိုယ်စီနဲ့ မျက်မှန်ကိုယ်စီနဲ့ တချို့ဆို မျက်နှာသနပ်ခါးကိုယ်စီနဲ့
နိုင်ငံရေးအေးဆေး၊ သားရေးသမီးရေးအေးဆေး၊ သာရေးနာရေးအေးဆေး၊ အားလုံး အေးဆေး။
ဘာမှ ရေးကြီးခွင်ကျယ်ပြောဆိုတွေးခေါ်နေဖို့ အချိန်အားမရှိတော့
အားလုံး အားလုံး အေးဆေးပေါ့။
ရှေ့နားမှာ ထိုးဆိုက်လာမယ့် ကားပေါ်က မိမိအတွက် ခွဲတမ်းဘယ်နှယောက်ဆင်းလာမလဲ။
ရုံး၊ ကျောင်း၊ ကဏ္ဍား၊ နေ့စဉ်သွားလာနေကျ ငါ သူတစ်ပါး ယောကျာ်း မိန်းမ ကလေး လူကြီး
အများပြည်သူဖောက်သည်မှန်ဖို့ အခေါ်အပြောလေးလည်း ညက်ရတယ်။
ကိုယ်လိုသူလို တစ္ဆေမောင်းနှင်စီးနင်းသူချင်းကြားမှာ
လူ့စည်း ဘီးလူးစည်းလေးထားပြီး ခရီးသည်ဆွယ်ရတယ်။
ကိုယ်လိုသူလို တစ္ဆေစီးနင်းသူချင်းကြားမှာ ခပ်ကြွားကြွားလေး လေးစားနေထိုင်နိုင်ဖို့
အရေးအကြီးဆုံးဟာ မိမိအလုပ်မိမိကျွမ်းကျင်မှုပဲ။ နိုင်ငံရေးကျွမ်းကျင်ဖို့ မလိုပါဘူး။
သားရေး သမီးရေးမပူပါဘူး။ သာရေးနာရေးမပြောပါဘူး။ အလွန်ဆုံးပြောလှ
အင်္ဂလန်ပရီးမိးယားလိဂ်နဲ့ ချန်ပီယံလိဂ်လောက်ပဲ ဖြစ်မယ်။
မိမိ မိသားစုပါးစပ်ပေါက်လေး လှုပ်နိုင်ဖို့အတွက်
မိမိလက်လီဗာလှုပ်မှ မိမိခြေထောက်ဂီယာချိန်းမှ မိမိသတိဘရိတ်လေးလည်း မှေးထိန်းနိုင်ဦးပါမှ။
KANBO၊ LUOJIA၊ JLM၊ WAVE၊ FEILING၊ YINXIANG၊ DAYUN ၊ DREAM ဘယ်အမျိုးအစားပဲလာလာ ကျွမ်းကျင်ရာ လိမ္မာကြရတယ်။
အင်ဂျင်မှာ KANBO ဘော်ဒီမှာ LUOJIA စသဖြင့်
တစ်ကွက်ကောင်း တရုတ်ဆိုင်ကယ်တွေပါပဲ။
ကယ်ရီဆိုင်ကယ်ဆိုတော့ များသောအားဖြင့် အင်ဂျင်ပါဝါ 125 ထက် 110 ပဲ သုံးကြတယ်။ ဆယ်ရက်တစ်ခါ အင်ဂျင်ဝိုင်လဲတယ်။
အနီနဲ့ အဖြူ လောင်စာဆီနှစ်မျိုးဈေးကွက်မှာ ၀ယ်ရတယ်။ တစ်ပုလင်း ၁၀၀၀ ပေးရတာချင်းတူတူ
အနီက တစ်ခါတစ်ခါ တစ်ရာနှစ်ရာ စွန်းချင်တယ်။ တချို့ဆိုင်ကယ်တွေက
သံသေးသံကြောင်ဟွန်းသံနဲ့၊ တချို့ဆိုင်ကယ်တွေက မီးရောင်စုံခြယ်သမှုနဲ့၊
တချို့ဆိုင်ကယ်တွေက အူကြောင်ကြားမောင်းသူနဲ့၊တချို့ဆိုင်ကယ်တွေဟာ အသစ်စက်စက်။  (ဘယ်လောက်သစ်လဲဆိုရင် ရုံးက သံနံပါတ်ပြားအစစ်မရသေးလို့ ယာယီနံပါတ်ကို စက္ကူကတ်ထူပြားပေါ်လက်နဲ့ရေးပြီး ပလတ်စတစ်လောင်းထားတယ်။
ရှေ့ဆုံးအက္ခရာအစား အတိုကောက်စာလုံး “ဘောင်”နောက်မှာ ၁၂၃၄၅ စတဲ့နံပါတ်တွေ
ဘောင်ဆိုတာ ဘောင်ဝင်တယ်လို့ ပြောချင်ဟန်တူပါရဲ့။)
တတ်မြောက်ထားတဲ့ အလုပ်နဲ့ မိမိရထားတဲ့ ဘွဲ့နဲ့ တခြားစီမှာ
မိမိလက်ရှိအလုပ်အကိုင်ဟာ ယိုင်နဲ့နဲ့ဆိုတော့ ငါးပွက်ရာ ငါးစာချလိုက်ရတယ်လို့ မထောက်မညှာ ပြောရမလား။
အီကိုနောမစ်အသိအတိုင်း Demand ဒီမန်းနဲ့ Supply ဆပ်ပလိုင်းလို့ ပညာရပ်ဆန်ဆန် သုံးနှုန်းပြောဆိုရမလား။ ကြာပါတယ် အရပ်ပြောအတိုင်းပဲ ဒါလာမှ ဒါလာမှာလို့
အရင်ဆုံး လက်ကို လီဗာဆွဲတဲ့ ပုံလုပ်ပြ နောက်မှ လက်ကို ပါးစပ်နားကပ် ထမင်းစားတဲ့ပုံ လုပ်ပြ။
ဘယ်သူမဆို တစ္ဆေမောင်းနှင်စီးနင်းသူဖြစ်နိုင်တယ်။ ဘယ်သူမဆိုတစ္ဆေမောင်းနှင်စီးနင်းသူဖြစ်ခွင့်ရှိတယ်။
သံဂဟေဆက်တဲ့အလုပ်က သိပ်မကောင်းတော့ ကယ်ရီမောင်းရတာပေါ့။လူပျိုဘ၀တုန်းက ဘီယာဆိုင်မှာ
တရုတ်စာအကြော်ဆရာ။ အိမ်ထောင်ကျတော့ ငွေပိုရတဲ့ ဆိုင်ကယ်ကယ်ရီဆရာ။ ဟိုအရင်က ကုန်စိမ်းရောင်းသမား။ ခုတော့ ပထမတန်းစားကယ်ရီသမား။ အရင်က ခြံပွဲစားလည်း ခြံဈေးကွက်ငြိမ်သွားတော့ ကယ်ရီဆွဲစားရတယ်။
ဗွီဒီယိုရိုက်ကွင်းဓာတ်ပုံဆရာဟာ ရိုက်ကွင်းနားတဲ့ရက် ကယ်ရီမောင်းသမားဖြစ်လာတယ်။
ကျွန်တော့်အသက် ၁၅နှစ်ရှိပြီ။ ကျောင်းမနေဘူး။ ရွာမှာ လုပ်စရာမရှိလို့ ဒီရောက်လာတာ။
ဒီက ကယ်ရီမောင်းတဲ့ ဆွေမျိုးက လှမ်းခေါ်လို့ ကယ်ရီမောင်းသမားဖြစ်လာတာ။
အကြောင်းအမျိုးမျိုးကြောင့် လူတွေဟာ တစ္ဆေမောင်းသူတွေ ဖြစ်လာကြတယ်။
တစ္ဆေမောင်းနှင်သူတွေဟာ ပုံစံအမျိုးအမျိုးပဲ။ အစုံအစုံပဲ။ အသက်အရွယ် မရွေးမရွေးပါပဲ။
ဂျင်းဘောင်းဘီဝတ်ကာ လက်တိုအကျီဝတ်ကာ အောက်မှာ
တက်တူးရုပ်အသားကပ်လက်ရှည်ဝတ်ထားကာ
လက်ချောင်းတွေကို လက်အိတ်နက်စွပ်ကာ လုံခြုံရေးဦးထုပ်ဆောင်းကာ
မျက်နှာပါးကွက်ကြားပေါ်နေတဲ့ ၀တ်စုံပြည့် အချိန်ပြည့် အိုးဆားဗစ်တစ္ဆေစီးနင်းသူတွေ။
ပုဆိုးနဲ့ ရှပ်လက်ရှည်အဖြူညစ်ညစ်နဲ့ လျှာထိုးဦးထုပ်နောက်ပြန်နဲ့
ရွာသားဟန်ပန် တောဂေါ်လီတစ္ဆေစီးနင်းသူတွေ။
ကွာတားဘောင်းဘီဝတ်လျက် အကျီင်္သန့်သန့်ဝတ်လျက် မျက်မှန်အနက်တပ်လျက်
ဟမ်းဖုန်းခါးချိတ်ထားလျက် ဟန်ကြီးတစ်ခွဲသား ဂိုဏ်းစတားဂိုက်တစ္ဆေစီးနင်းသူတွေ။
ပုဆိုးတိုတို စွပ်ကျယ်အောက်မှာ ဗိုက်ရွှဲရွှဲနဲ့ လုံခြုံရေးဦးထုပ်ကြိုးအမြဲမတပ်ဘဲ
ဆောင်းထားတဲ့ ကွမ်းတဗျစ်ဗျစ် ဘီးကျဲကြီးတစ္ဆေစီးနင်းသူတွေ။
ကယ်ရီသမားလို့ ထင်ရက်စရာမရှိအောင် အရွယ်ကောင်းချောမောပြီး အရောင်ထွက်အ၀တ်အစားနဲ့
ခရီးသည် မိန်းမပျိုလေးတွေကို တင်ဆောင်ရဖို့ ဦးတည်ကာ အများသူငှာအထင်မှားလည်း
မနည်းဘူးအကြံနဲ့ တဏှာ(နှာ)အသားပေးတစ္ဆေစီးနင်းသူတွေ။
ပုဆိုးကို တီရှပ်အပေါက်အပြဲ ဖြစ်သလိုတွဲဝတ်လို့ ဆိုင်ကယ်ဦးထုပ်ကို
မှန်အပြည့်ကာထားလို့ ထသွားထလာ အချိန်ပိုင်းတစ္ဆေစီးနင်းသူတွေ။
တစ္ဆေမောင်းနှင်စီးနင်းသူတွေ ဘယ်လိုပဲ ရှိနေ ရှိနေ ကိုယ်ပိုင်သင်္ကေတတွေနဲ့ ခွဲခြားနိုင်တယ်။
ကားပေါ်ကဆင်းတာနဲ့ မြေကြီးပေါ် ခြေမချခင် သင့်ရှေ့ကို ၀ူးခနဲ လာရပ်ပြီး “သွားမလား”မေးမယ်။
အဝေးမှာ သင်ရောက်နေရင် လက်ကလေးတစ်ချောင်း လှမ်းထောင်ပြမယ်။
တစ်ခါတစ်လေ သင့်နောက်ကနေ တတီတီနဲ့ ဟွန်းသံပေးမယ်။
ဒီမှာတော့ ဟိုနား ဒီနား ၀န်ဆောင်ခ တစ်ယောက် ၂၀၀၊ ခရီးနီးရင် နီးသလို ခရီးဝေးရင် ဝေးသလို။
ခရီးဝေးငှားရမ်းသူနှစ်ယောက်က မောင်းသူကို လမ်းခုလတ်လူပြတ်ရာမှာ
ရိုက်နှက်တဲ့ ဆိုင်ကယ်လုယက်သတင်းတွေလည်း မကြာခဏကြားရတတ်ပါတယ်။
ခရီးမဝေးပေမယ့် ညမှောင်မှောင် လေးယောက်တစ်ဖွဲ့မှာ နှစ်ယောက်တစ်စီးနှုန်းနဲ့ ငှားသွားပြီး
ကျောလာထောက်မှ ဓားပြအဖွဲ့မှန်းသိလိုက်ချိန် ကယ်ရီမောင်းသမားနှစ်ယောက် မသေရုံတမယ်
ခေါင်းကွဲ စုတ်ပြတ် နေရာမှာတင်မေ့လဲ ဆိုင်ကယ်နှစ်စီး ပျောက်ဆုံး လုယက် ယူဆောင်ခံရ။
ဒါကြောင့်ပဲ တစ္ဆေစီးနင်းသူတွေဟာ ဗလပဲရှိရှိ ဇပဲရှိရှိ အကြောက်တရားလေးတော့ မရှိမဖြစ် ရှိရတယ်။
ဂမ္ဘီရဆန်းကြယ်စွန့်စားခန်းစိတ္တဇအက်ရှင်နီကိုလပ်ကေ့ခ်ျရဲ့
ပိတ်သားထက်က GHOST RIDER နဲ့ ကွာခြားတာက
ဘ၀သရုပ်မှန်အောက်ခြေလူတန်းစားအခြေခံ မြန်မာပြည်သူပြည်သားတွေရဲ့ နေ့စဉ်ဘ၀အမြင်
အသေးစားခရီးသွားဝန်ဆောင်မှုလမ်းမထက်က GHOST RIDER(S) ဖြစ်ပါတယ်။
ဆိုင်ကယ်တစ်စင်းကို အုံနာခ တစ်နေ့ ၃၀၀၀ သွင်းရတယ်။ ရှစ်လဆိုရင် ပိုင်ပြီ။
ဒီကြားထဲ ဆိုင်ကယ်ပျက်ရင် မိမိပဲခံ။
နောက်တစ်နည်းက တစ်နေ့ကို အုံနာခ ၂၀၀၀ သွင်း။ ဒါပေမယ့် အုံနာကပဲ ဆိုင်ကယ်အမြဲပိုင်တယ်။
ဒီနည်းလမ်းမှာ ၃၀၀၀ ဖိုးအထက် ဆိုင်ကယ်ပျက်ရင် အုံနာနဲ့ မိမိနဲ့ တစ်ယောက်တစ်ဝက်။ ၃၀၀၀ အောက်ဆိုရင် မိမိပဲခံ။
မြို့နယ်ဈေးနယ်နမိတ်ကလွဲရင် ဘယ်နေရာမှာမှ အခွန်ဆောင်စရာမလိုပါဘူး။
ယာဉ်စည်းကမ်းလိုက်နာတာက လိုက်နာတာပေါ့။ မောင်းသူရော လိုက်သူရော ဦးထုပ်ကိုယ်စီဆောင်းရတယ်။ ဆိုင်ကယ်တစ်စင်း လူနှစ်ယောက်အပြင် ပိုမစီးရ။ ၀န်စည်စလွယ်မဆန့်အင်္ဂါအမြင်မတော်အောင် မတင်ဆောင်ရ။
ဆိုင်ကယ်တစ်စင်းမှာ ရှိသင့်ရှိထိုက်တဲ့ အင်္ဂါရပ်တွေ စုံလင်အောင်
လိုင်စင်ကအစ နောက်ကြည့်မှန်အဆုံးတပ်ဆင်ထားရ (မည်ဟုဆိုပေမယ့်လည်းပေါ့။)
တကယ်တော့ ဒါကလည်း စစ်ဆေးရေးရှိတဲ့အခါမှသာပါပဲ။
ဆိုင်ကယ်တစ်စင်း မိသားစုတစ်စု၊ ဖေကြီးကမောင်း မေကြီးကနောက်ဆုံးမှာထိုင်
ဖေကြီးနဲ့ မေကြီးကြားမှ သားလေးနှစ်ယောက်  ဖေကြီးရှေ့ခွကြားမှာ သမီးလေးကထိုင်
ကြပ်တော့ ကြပ်တာပေါ့ ဒါပေမယ့် မကြပ်ဘူး။ ဆိုင်ကယ်တစ်စင်းမှာ
ဆန်အိတ် ၃ အိတ်တင်လို့ ရတယ်။ ဘိလပ်မြေ ၃ အိတ် တင်မောင်းနိုင်တယ်။
မီးသွေး ၆ အိတ်တင်သယ်ကြတယ်။
ကယ်ရီဆိုင်ကယ်အများစုဟာ မနက်လင်းတာနဲ့ သန့်ရှင်းသပ်ရပ်တောက်ပြောင်စွာ
လမ်းဆုံတွေမှာ ရပ်စောင့်နေကြတယ်။
ရှားရှားပါးပါး ဆိုင်ကယ်တချို့ကတော့ ရှေ့ကာဗာမားကတ်တွေပြုတ်ပျက်ထွက်ပြီး
ရှုပ်ထွေးခွေလိမ်နေတဲ့ ၀ါယာကြိုးတွေ ပေါ်နေမယ်။ အောက်ကာဗာမရှိတော့ဘဲ အင်ဂျင်ကိုယ်ထည်ကိုမြင်ရမယ်။ မဲတုံးသံချေးကိုက်နေတဲ့ ချိန်းကြိုးကို မြင်ရမယ်။ ကာဗာမားကတ်တွေ ပြန်မတပ်ဘဲ ဖြစ်သလို မောင်းနေတဲ့ ဆိုင်ကယ်တွေကို ဆိုင်ကယ်ကတုံးတွေလို့ ခေါ်ရမလား။ ယာဉ်စည်းကမ်းက ယာဉ်စည်းကမ်းပဲ။ ဒီလိုပဲ တင်နေ သယ်နေ မောင်းနှင်နေတာက မောင်းနှင်နေတာပဲ။
ကုန်စိမ်းလား၊ ကုန်ခြောက်လား၊ အသားလား၊ ငါးလား၊ အလားတူ ရေသန့်ဗူး၊ ရေပိုက်၊
သစ်တိုသစ်စ၊ သံသေတ္တာ၊ရေစည်ပိုင်း၊ ခရမ်းချည်သီးထည့် ထင်းရှူးသေတ္တာ၊ ကြက်သွန်အိတ်၊ အာလူးအိတ်၊ ကြက်မွေးကြိမ်ခြင်း၊မုန့်မျိုးစုံထည့်ကြိမ်ခြင်း၊ ၀က်အရှင်လတ်လတ်၊ ကြက်ဘဲအရှင်လတ်လတ်(စုချည်လျက်)၊ရေခဲအထပ်လိုက်၊
သားကျွေးမှုမယားကျွေးမှုအထပ်လိုက် အကုသိုလ်အထပ်လိုက်
လောဘဒေါသမောဟအထပ်လိုက် အထပ်လိုက် အထပ်လိုက်က်က်က်က်။
ဆိုင်ကယ်ရှေ့ခြင်းထဲမှာ၊ ဆိုင်ကယ်ရှေ့ခွကြားမှာ၊ ဆိုင်ကယ်မောင်းသူလိုက်သူနှစ်ဦးဖင်အောက်မှာ၊ ဆိုင်ကယ်နောက်ခုံမှာ၊တချို့ဆို ဆိုင်ကယ်ဘေးမှာကို ပစ္စည်းတင်ဖို့သက်သက် သံဂဟေအပိုဆက်ထားလိုက်သေးတယ်။ ဘယ်ချိန်ကြည့်ကြည့် သတ်မှတ် ၀န်စည်ထက်
ပိုတင်နေကြတာ အလွယ်တကူတွေ့နိုင်တယ်။ သမုဒ္ဒရာ ၀မ်းတစ်ထွာမှာ ကူးရင်းခတ်ရင်း တစ္ဆေမောင်းနှင်သူတွေ အမြဲတမ်းမေ့လျော့နေတဲ့ အချက်ကတော့
သူတို့မောင်းနှင်စီးနင်းထားတာဟာ ဆိုင်ကယ်ဖြစ်သလို တစ္ဆေလည်း ဖြစ်တယ်ဆိုတဲ့ ကိစ္စပဲ။
ဝန်ပိုတွေနဲ့ အဆင်မသင့်တဲ့အခါ တစ္ဆေဟာ မောင်းနှင်သူကို ကုန်တင်ကားကြီးအောက် ဆွဲခေါ်သွားတတ်တယ်။ လူပိုတွေနဲ့ အနေမတတ်တဲ့အခါ တစ္ဆေဟာ မောင်းနှင်သူကိုရော
လိုက်ပါသူကိုရော ကတ္တရာလမ်းပေါ် ဒလိမ့်ကောက်ကွေးဖြစ်အောင် ခါရမ်းပစ်တတ်တယ်။
၂၀၀ရ ခုနှစ် ရန်ကုန်ဆိုင်ကယ်တိုက်မှု ၂၉မှု သေဆုံး ၅ဦး ၂၀၀၈မှာ ၂၄မှု သေဆုံး ၅ဦး
၂၀၀၉ ဧပြီထိ ၂၅မှု သေဆုံး ၈ဦး  ၂၀၁၂ ဇန်န၀ါရီမှ အောက်တိုဘာထိ
မန္တလေးခရိုင် ဆိုင်ကယ်တိုက်မှုများကြောင့် သေဆုံး ၉၄ ဦး ဒဏ်ရာရ ၃၃၈ ဦး
လမ်းဘေးမှာ မှောက်လဲနေတဲ့ သွေးစွန်းဆိုင်ကယ်တစ်စင်း၊ ဥဒဟိုလိမ့်နေတဲ့ သစ်သီးများ၊
မလှုပ်မယှက်ခန္ဓာကိုယ်များ၊ ယိုစီးသွေးကွက်များ၊ ဟိုမှ သည်မှ
ထိတ်လန့်တကြားပြေးလာသော လူများ။
လဲလျောင်းဆိုင်ကယ်ရဲ့ ဘီးဟာ မရပ်သေးဘဲ တစ်ဝီ၀ီလည်နေဆဲ…။
မောင်းသူရဲ့ မူလလက်ဟောင်းအရင်းစစ်အလုပ်အကိုင်ဟာ ဘာပဲဖြစ်နေဖြစ်နေ
လိုက်ပါသူပုဂ္ဂိုလ်ကြီးဟာ ဘယ်သူဘယ်ဝါကြီးပဲဖြစ်နေဖြစ်နေ
ဘယ်သူ့အတွက်ပဲဖြစ်ဖြစ် ဘယ်လိုပုဂ္ဂိုလ်အတွက်ပဲဖြစ်ဖြစ်
မောင်းနှင်စီးနင်းသူရဲ့ သတိတစ်ချက်အမှားမှာ
ဆိုင်ကယ်ဟာ တစ္ဆေပဲ။ တစ္ဆေဟာ ဆိုင်ကယ်ပဲ။    ။

လွန်းဆက်နိုးမြတ်
၂၃.၁၁.၁၂
ည ၀၇း၄၇နာရီ

ကန်စွန်းရွက်အထူးပြု

ကန်စွန်းရွက်အထူးပြု

ယုံကြည်ချက်ကြောင့် နှစ်ရှည်လများ အကျဉ်းချခံထားရခြင်းမဟုတ် ရိုးစင်းလွန်းတဲ့ ဂုဏ်ဒြပ်ပိုင်ရှင် မို့သာ သက္ကရာဇ်များစွာ မေ့လျော့ခြင်းခံထားရတာ ခပ်ညံ့ညံ့ဘ၀သရုပ်ဖော်ဝတ္ထုတွေထဲမှာ ကွန်မြူ နစ်လည်းဖြစ်ဖူး ဇာတ်ကို မနာနာအောင် ဇွတ်အတင်းထုရိုက်ခွဲခြေထားတဲ့ သရုပ်မှန် ရုပ်ရှင်ဇာတ် ၀င်ခန်းတွေရဲ့ ထမင်းချိုင့်လေးတွေထဲလည်းဖန်တရာတေအောင် ရောက်ရောက်သွားတတ် ခေတ် အဆက်ဆက် စီးဆင်းခဲ့တဲ့ ဧရာဝတီလို ပြည်သူ့နေ့စဉ်ဘ၀ထဲ တစ်နိုင်တစ်ပိုင်ဝန်လေးနဲ့ အညွှန့် ဖြာဝေ သူ့မှာ ငန်ခြင်းသော်လည်းကောင်း ချိုခြင်းသော်လည်းကောင်း အရသာမျိုးရှိ ၀မ်းမီးကို နိုင် နင်း ရူးသောအနာ သည်းခြေနဲ့ယှဉ်သောအနာတွေ သက်သာစေ သူ့ကို ပြုတ်မလား ကြော်မလား ချဉ်ရေဟင်း ချက်မလား တို့မြှပ်စားမလား သူ့အတ္ထုပ္ပတ္တိ သူ့ဖြတ်သန်းမှု သူ့ရဲ့ ခမ်းနားကြီးကျယ် မှု(မဲ့ခဲ့တဲ့) ရာဇ၀င်နောက်ခံရိုးဂုဏ်နဲ့ လတ်တလော သူ့လှုပ်ရှားမှုသတင်းတွေ သူ့အကြောင်း သိကောင်းစရာတွေ အင်တာဗျူးတွေ ဒုတ်ခွီမန်ထရီတွေ မှတ်ဖွယ်မှတ်ရာ စကားတိုစိကလေးတွေ မျိုးရင်း မျိုးကွဲ မျိုးပွားတွေ သူ့ကို ကုန်းနေနဲ့ ရေနေဆိုပြီး နှစ်မျိုးခွဲခြားထား ကုန်းနေဟာ ဥတဲ့ အမျိုး အစား(တစ်ချို့က ကန်စွန်းကြီးလို့ သိကြ) ရေနေမှာတော့ ဆင့်ပွားမျိုးများ အဆင်သင့်ရှိနေ ဆင့်ပွား အနက်ဂယက်အရ
(၁) ကန်စွန်းဖြူ-အရိုးအဖြူရောင်(တရုတ်ကန်စွန်းလို့ အခေါ်များ)
(၂) ကန်စွန်းနီ-အခြားကန်စွန်းတွေထက် အရိုးအရွက်ပိုမိုထွားကြိုင်း အရိုးပွလျက် နီညိုရောင် သန်း(အတို့အမြှပ်နဲ့ ချဉ်ရေဟင်းအဖြစ်အသုံးပြု)
(၃) ကန်စွန်းသေး-အရိုးအရွက်အသေးဆုံး(ဈေးကွက်မှာ ထိုင်ဝမ်ကန်စွန်း၊ ၀က်ဆီဖတ်နည်းနည်း၊ ပုဇွန်ခြောက်နိုင်နိုင် အဆင်ပြေသလို ကြော်လေ့ရှိ)
သူဟာ ကုန်းတစ်ပိုင်း ရေတစ်ပိုင်း ရှင်သန်ပေါက်ရောက်ရလို့ အမြဲစိမ်းစိုလတ်ဆတ်ခြင်းအသွင် အပြင်နဲ့ နွယ်ဆန်ဆန်ရှည်လျားဆန့်ထွက်လာတတ်တဲ့ စိတ်ကူးဥာဏ်ကွန့်မြူးမှုကိုလည်း ပိုင် ဆိုင်ပြန် သဘာဝအလျောက် မတော်မတည့် ဖြစ်တတ်တဲ့ ကိလေသာအဆိပ်အတောက်ကိုလည်း ဖြိုခွင်းနိုင်သေးသလို ခင်ဗျားတို့ရဲ့ ခန္ဓာအတွင်းပိုင်းထဲက အကောင်းမြင်အစိတ်အပိုင်းတွေ ကြီး ထွားဖို့ရာ လိုအပ်သလောက် အပြုသဘောဆောင်တဲ့ ဗီတာမင်အေလည်း ကြွယ်ဝလုံလောက် လော ကဓံနဲ့ ရင်ဆိုင်တဲ့အခါ အရေးအကြီးဆုံး အရိုးအဆစ်တွေ အားကောင်း သန်မာစေဖို့ မျှော်လင့်ယုံ ကြည်ချက် ကယ်လ်စီယမ်ခေါ် ထုံးဓာတ်များတောင် အချိုးကျ ပေါင်းစပ်ပါဝင်နေပေမယ့်လည်း သူဟာ ရာဇ၀င်မှာ စာတင်မခံရ သူဟာ သမိုင်းနဲ့ လမိုင်းမကပ်ခဲ့ရှာ ဒါတင်မက ဒီမိုကရေစီ နည်းကျကျ အောက်ခြေပြည်သူတွေရဲ့ ဆန္ဒမဲကို တစ်ခဲနက် ပိုင်ဆိုင်ခဲ့သလောက် ထာဝရမေ့လျော့ ခံနေရပြန်ရာ ပွင့်လင်းထင်သာ အခြေဆိုက်တုန်းခဏ ဒီအရေးအသားမှ တဆင့် သူ့ဖြစ်တည်မှုကို အထူးပြုဖော်ထုတ် တင်ပြ မီးမောင်းထိုးပြလိုက်ရပေသတည်း။ ကန်စွန်းရွက်အဓွန့်ရှည်ပါစေသောဝ် ။    ။

လွန်းဆက်နိုးမြတ်
၂၂.၇.၁၂