လပြည့်ထောက်ကူပစ္စည်းများ

လပြည့်ထောက်ကူပစ္စည်းများ

၁

တူတစ်လက်
သင်္ဘောရဲ့ ဘေးပတ်လည်နံရံတစ်လျှောက်
ခပ်သေးသေးသံချွန်လေးတွေ
သစ်သားကိုယ်ထည်ထဲ
အဖျားနစ်ရုံ ရိုက်သွင်း။
၂

ဗြောက်အိုး
လာဟေ့
နားထဲတည့်တည့် ထည့်ခွဲ။
၃

ကျမ်းစာ
မနက်တုန်းက ဘုရားစင်တစ်ခုပေါ်မှာ
နေ့လည်ရောက်တော့ အိပ်ယာခင်းတစ်ခုထဲ
ညနေမတိုင်မှီ
ပင်လယ်ထဲ လွင့်ပစ်လိုက်တယ်…သွား။
၎

တက်ထ်စတာ
လျှပ်စစ် ရှိ မရှိ သတ္တုအဖုံးပေါ် လက်မနဲ့ ဖိထောက်
ကိုယ့်ကိုယ်ကိုယ် နေရာအနှံ့ ထိစမ်း။
၅

ပလာယာ
ဝါယာကြိုးထဲ သွားလာနေတဲ့ အနီနဲ့ အနက်မျှော့နှစ်ကောင်
တစ်ကောင့်သွေးတစ်ကောင်
အရောင်တူရာ
မျက်နှာချင်းဆိုင် စုပ်ခိုင်း။
၆

မီးရှူးမီးပန်း
ရော့
မျက်လုံးထဲ အရောက် ပေါက်ကွဲ။
၇

ဝက်အူလှည့်
ဖွင့်လှစ်ရမယ့် စာမျက်နှာတွေကို ကျကျနန စာသားတစ်လုံးချင်း
ဖုံးပိတ်ရမယ့် ကောင်းကင်တွေကို အခိုင်အမာ ကြိုးတစ်ရစ်ချင်း
၈

မီးခြစ်တစ်လုံး
နှစ်လုံးမလိုဘူး
နှစ်လုံးဆိုရင် ခင်ဗျားကိုပါ
ထည့်ရှို့ပစ်လိုက်မယ်
၉

သံတရွင်း
သင်္ဘောကြမ်းပြင်ကို အမြန်ဆုံး ဆောင့်ချ
တစ်ချက်ပြီးတစ်ချက် ဆက်တိုက်
ငရဲမှာလည်း ပွဲတော်ရှိတယ်
၁၀

ပလတ်စတစ်မီးပုံးပျံ
ကောင်းကင်မှာ လောင်သွားရင်
အိုဇုန်းလွှာနဲ့ နီးမယ်
မြေပေါ်ပျက်ကျရင်
လူတွေနဲ့ နီးမယ်
၁၁

သေရည်
စစ်တုရင်ကို ဘယ်လို ရွှေ့ရမလဲသိပြီ
ခိုးထားတဲ့ ကျွဲတွေ ပေါ်ကုန်ပြီ။
၁၂

လှေကား
တိမ်ပေါ်တက်ချင်တဲ့သူ တက်
အ၀ီစိဆင်းချင်တဲ့သူ ဆင်း
၁၃

တရုတ် LED မီးလုံး
သင်္ဘောနံရံက သံချွန်သေးသေးတွေပေါ် ချိတ်ဖို့
လိုသလောက်
၁၄

လ
ပြည့်စရာမလိုဘူး
တစ်ဖက်ဖက်ကို နည်းနည်းရွဲ့ချင်ရွဲ့
အပေါ်အောက် ပိချင်ပိ ပြားချင်ပြား
နေကုန်နေခမ်း တပ်ဆင်ထားတယ်
လပြည့်ညဖြစ်ကြောင်းတော့ သေချာပစေ
ခွေးတွေ ဘာတွေ အူပစေ

လွန်းဆက်နိုးမြတ်
၂၈.၁၀.၁၅
ည ၁၁း ၄၈ နာရီ
လပြည့်ည

ပျော်ရွှင်စရာ ဒီပွဲခင်း

ပျော်ရွှင်စရာ ဒီပွဲခင်း

လက်စသတ်တော့ ပျော်ရွှင်စရာ ဒီပွဲခင်းကြီးရဲ့ ဘယ်အစိတ်အပိုင်းမှာမှ ငါမပါဘူးပဲ။
လက်စသတ်တော့ ဒီနှစ်တွေမှာ သူစိမ်းတရံတွေကြား ငါလမ်းသလားနေမိခဲ့။
လက်စသတ်တော့ ငါမျက်နှာဖုံးကြီးတပ်ပြီး လူအစစ်တွေလို့ ထင်မှတ်မှားခဲ့သမျှ
ငါ့ထက် အရည်အသွေးပိုကောင်းတဲ့ မျက်နှာဖုံးစွပ်တွေ ဖြစ်နေကြ။

လက်စသတ်တော့
ငါတို့ဟာ ဓားပေါက်သမားရဲ့ ကျွမ်းကျင်မှုကို လက်ခုပ်တီးဖို့ထက်
ကိုယ်ဟန်ပြမယ်ကိုယ်ပေါ်က သွေးစက်တွေကိုသာ
လျှာနဲ့ ၀ိုင်းလျက်ချင်နေကြ။

လက်စသတ်တော့ ငါ့ရပ်မိရပ်ဖတွေကိုယ်တိုင်ပါဝင်တဲ့ ဇွမ်ဘီလူသားစားပွဲကြီးဟာ သရုပ်ပြနေတာမှ မဟုတ်ဘဲ။
လက်စသတ်တော့ အိန်ဂျယ်လ်ဆိုတာ ငါတို့ခေါင်းပေါ် တင်ထားဖို့နဲ့ ငါတို့ရဲ့ စောက်ပြစ်တွေကို လွှဲချဖို့။
လက်စသတ်တော့ ငါ့ဘေးမှာ မြင်းရုပ်ချားရဟတ်ထိုင်စီးနေတာ ပရိုဂရမ်ထည့်ထားတဲ့ စက်ရုပ်ကလေးငယ်တွေ။ တခစ်ခစ်။
လက်စသတ်တော့ ငါ့ခနာတစ်ခုလုံးဟာ အာခိလိဖနောင့်။
လက်စသတ်တော့ ငါကလွဲပြီး သူတို့အားလုံးဟာ လုံခြုံစိတ်ချရတဲ့ အာခိလိတွေ။ ဖိနောင့်မပါတဲ့ အာခိလိတွေ။
လက်စသတ်တော့ ငါ့လှုပ်ရှားမှုကို စောင့်ကြည့်နေတဲ့ cctv တိုင်းရဲ့ နောက်ကွယ်မှာ ရှိနေတာ ကြေကွဲရောင်ဟင်းလင်းပြင်ကြီး။
လက်စသတ်တော့ ကမ္ဘာတစ်ခုပေါ်အတူမတ်တတ်ရပ်နေခဲ့ပြီးမှ ငါ့ခေါင်းထဲက ကမ္ဘာနဲ့ သူတို့ခေါင်းထဲက ကမ္ဘာ အမျိုးအစားမတူညီတဲ့ ကိစ္စ။
လက်စသတ်တော့ သူတို့ကိုယ်ထဲက ငန်းဖြူကကွက်ပီပြင်စေဖို့ ငါ့ကိုယ်ထဲ ၀ဲလှည့်နေတဲ့ ငန်းနက်ကိုမှ အငမ်းမရ သတ်စားချင်နေကြ။
လက်စသတ်တော့ ငါစောင့်စားနေတဲ့ ဘုရင်ဟာ သံခေါင်းစွပ်မင်းသား။ သူ့မျက်နှာကို ဘယ်သူမှ မမြင်ရ။ ရှိ မရှိတောင် သေချာ မသိရ။

လက်စသတ်တော့
ငါနဲ့အတူ ပြဇာတ်ကြည့်သူအားလုံး ဘရူးတပ်စ်ကို မုန်းတီးပြီး
ဘရူးတပ်စ်ဓားကိုကျ လိုအပ်ရင် ချစ်မြတ်ကြ။
လက်စသတ်တော့ နှာခေါင်းနီနီ ပါးစပ်ပြဲပြဲ လူရွှင်တော်တွေဟာ အပြစ်သားတွေ။
(ငါ့မျက်စိရှေ့တင် ပြက်လုံးတစ်ခါထုတ်ပြီးတိုင်း လူရွင်တော်တစ်ယောက်သေဆုံးလဲကျ။)

လက်စသတ်တော့ ငါ့တစ်ကိုယ်တော်ဝံပုလွေအမှတ်အသားရဲ့ ထင်ရှားမှုဟာ
လိမ္မာတဲ့ သိုးဖြူကြီးတွေ ဖိနပ်လုပ်ပြီး အုပ်လိုက်လမ်းလျှောက်စီးလို့ကောင်းတာ တစ်ခုတည်း။
လက်စသတ်တော့
တစ်ဦးနဲ့ တစ်ဦး သွက်သွက်ခါရူးသွပ်အောင် မသေမချင်းလှည့်စားတာဟာ ငါတို့ရဲ့ ကစားနည်း။ ပြာကျကျွမ်းလောင်သွားတဲ့ထိ။
လက်စသတ်တော့
ငါ့ရှေ့မှာ မျက်လှည့်ရုံထဲက ထွက်လာကြသူတွေ သူတို့တအံ့တသြအလိမ်ခံရဖို့ မျက်လှည့်ဆရာကို ၀ိုင်းလိမ်ခဲ့ကြ။
လက်စသတ်တော့
ငါလန့်ဖျတ် ငါနားမလည် ငါငြင်းခုံ ငါနာကျင် ငါဒေါသဖြစ်ရသမျှ
နောက်ဆုံးမှာ သူတို့ လက်ညှိုးလှမ်းထိုးပြတဲ့ ကင်မရာမှန်ဘီလူးထဲက Just For Laughs တွေ ဖြစ်ရဖို့။
လက်စသတ်တော့
အပြာရောင်ပျော်ရွှင်မှုနဲ့ အနက်ရောင်အထီးကျန်မှုနှစ်မျိုးမှာ ငါ့ဝေစုဟာ အမြဲတမ်း စည်းအပြင်က တတိယတစ်ခု။
ဆေးရောင်စုံဝမ်းနည်းမှု။
လက်စသတ်တော့
ငါရောက်နေတဲ့ ပျော်ရွှင်စရာ ဒီပွဲခင်းကြီးရဲ့ ကြက်ပျံမကျစည်ကားမှုဟာ
လုယက်မတတ်တောင်းရမ်းစားသောက်သူတွေကြောင့်ပဲ။

လက်စသတ်တော့ ငါလေးစားခဲ့တဲ့ လူတန်းစားရပ်တည်ချက်တို့ လူထုကောင်းစားရေးတို့ဆိုတာ တုတ်ထိုးရုပ်ဇာတ်လမ်းတွေပဲဖြစ်။
လက်စသတ်တော့ အကောင်းမြင်ချောက်ကမ်းပါးထဲကနေ ငါတို့ကို ဆွဲထုတ်ကယ်တင်ပေးနေတာ ရွှေရောင်တောင်ပံတွေနဲ့ ဒီမွန်းတွေပဲဖြစ်။
လက်စသတ်တော့ သရဲအိမ်ထဲက အရုပ်တွေကို ပိုက်ဆံပေးကြောက်ရွံ့ရခြင်းဟာ အပြင်ပက မကောင်းဆိုးရွားတွေကို ငါတို့ ခဏတာ ရှောင်ကွင်းဖို့ပဲဖြစ်။
လက်စသတ်တော့ ပျော်ရွှင်စရာ ဒီပွဲခင်းကြီးမှာ ငါ့မျှော်လင့်ချက်တွေက ကျက်သရေမဲ့တဲ့ မိုးပျံပူဖောင်းတွေပဲဖြစ်။
(ဘယ်နေရာမှာ ပျက်ကျသွားမှန်းတောင် မသိလိုက်ရ။)
လက်စသတ်တော့
ငါဟာ လူမြင်ကွင်းမှာ အစင်းဝါ၀ါခွန်အားပြည့် ကျားရဲကိုမှ ကြာပွတ်နဲ့ နိုင်စားပြပြီး
လူကွယ်ရာမှာကျ ဂျုံနဲ့လုပ်တဲ့ ကျားဝါရုပ်လေးကို မှဲ့တစ်ပေါက်မစွန်းအောင် စောင့်ရှောက်နေရတဲ့ အကောင်။
လက်စသတ်တော့
ငါတို့ဘ၀ရဲ့ ရက်စက်တဲ့ ရှုမျှော်ခင်းတွေဟာ ငါတို့ မျက်လုံးတွေထဲက တွားထွက်လာပြီး
ငါတို့ဘ၀ရဲ့ ပျင်းရိစဖွယ် နောက်ခံတီးလုံးတွေကတော့ ငါတို့ နားတွေထဲက ဖောက်ထွက်လာကြ။
လက်စသတ်တော့
ငါတို့ ဘ၀ရဲ့ နာကျင်ညစ်ညမ်းတဲ့ စကားလုံးတွေဟာ ငါတို့ ပါးစပ်ထဲကို အချိန်တိုင်း ကိုက်ဖြတ်ဝင်ရောက်လျက်။
လက်စသတ်တော့
ပျော်ရွှင်စရာ ဒီပွဲခင်းကြီးထဲ ငါတို့ဟာ တစ်ဦးနဲ့ တစ်ဦး ကောင်းလာလိမ့်မယ်အထင်နဲ့ နာကျင်ရှုံ့မဲ့တဲ့ အပိုင်းအခြားမှာပဲ
တစ်သက်လုံးအချိန်ကုန်ခံ လိင်ဆက်ဆံနေကြရ။
လက်စသတ်တော့ ပျော်ရွှင်စရာ ဒီပွဲခင်းကြီးရဲ့ ဘယ်အစိတ်အပိုင်းမှာမှ ငါ မပါဝင် သူတို့အားလုံးလည်း မပါဝင်။

လွန်းဆက်နိုးမြတ်
21.6.2015
7:49 pm

ဟောလီးဝုဒ်

ဟောလီးဝုဒ်

ကားချင်းပြိုင်မောင်းတာလောက်ကို ထည့်မပြောနဲ့ ဆိုပေမဲ့
ဒါကပဲ ဒေါ်လာတွေ သဲ့ယူနေတုန်း။
ထီးအနက်တွေရဲ့ ပြန့်ကားမှုကို အပေါ်စီးက ရိုက်ပြချင်တာတစ်ခုနဲ့
အသုဘတွေ မိုးရွာမှ ချရတယ်။
ရေချိုးကြွေဇလုံထဲမှာ မင်းသမီးကို တစ်ကိုယ်ရည်အာသာဖြေခိုင်းချင်ဖြေခိုင်း
ဒါမှမဟုတ် သွေးပေနေတဲ့ ရေချိုးခန်းလိုက်ကာနောက်အကွယ်မှာ
အရိပ်တစ်ခုထိုးပြချင်ပြ။
ဟ နေတဲ့ မြေအောက်ခန်းဖုံးသစ်သားပြားအောက်က
မျက်လုံးတစ်ဖက်ရိရွဲပျော်ကျ မျက်နှာပုံဆိုးကြီးတစ်ခု။
များသောအားဖြင့် လက်ဝါးကပ်တိုင်မှာ ကိုယ်တော်ကတော့ မရှိမဖြစ်ပဲ။
မီးခြစ်ဆံတစ်ချောင်းသာ ရှိပစေ
ဖိနပ်ကိုပဲ ကုန်းခြစ်ခြစ် မြင်းကုန်းနှီးကိုပဲ လှမ်းခြစ်ခြစ်
စီးကရက်မီးတောက်ဖြစ်။
ဘယ်လောက်ပဲ မွှတ်နေအောင် လက်ထဲမှာ လည်စမ်းပစေ
ခါးပေါ်က အိတ်ထဲ ခြောက်လုံးပြူးဟာ အမြဲအံကျ။
ရဲကားဥသြသံဆိုတာ အချိန်မရွေး တစ်နေရာမှတစ်နေရာ
ဖြတ်သန်းအော်မြည်သွား။
တိုင်ပတ်ကချေသည်မလေးရဲ့ အဝတ်အစား
ဗလာဖြစ်သွားတဲ့ထိ
ဝီစကီကို အရသာခံခိုင်းမယ်။
အိမ်မှာမနေချင်ရင် ကားထဲမှာ အိမ်လုပ်နေခိုင်းမယ်။
အော်စကာက နတ်ကြီးသလောက်
မဖြစ်နိုင်တဲ့ မစ်ရှင်တွေ ဖြစ်နိုင်တယ်။
မဖောက်နိုင်တဲ့ ဘဏ်တိုက်တွေ ဖောက်နိုင်တယ်။
မလွတ်မြောက်နိုင်တဲ့ အဆင့်မြင့်ထောင်တွေ လွတ်မြောက်နိုင်တယ်။
သဏ္ဍာန်လုပ် သရုပ်တူ ယေရှုများ။ ဂန္ဒီများ။ လင်ကွန်းများ။ ဟစ်တလာများ
ဆေးစက်ကျရာ အရုပ်ထင် ဗေသိုဗင်များ။ ဗာဂျီးနီးယားဝုဒ်များ။ အလန်ဂျင်းစ်ဘတ်များ
ဖြစ်ရပ်မှန်နောက်ခံ ဘဝအမှားတွေ။ အနာတရ ဟာသတွေ။
ကမ္ဘာကျော်တွေရဲ့ မကျော်ကြားတဲ့ အတွင်းရေးတွေ။
ပျော်ရွှင်စရာ အိုဗဒို့ဇ်တွေ။ အညံ့ဖျင်းဆုံး ဖက်ရှင်အလန်းစားတွေ။
အထူးပြုလုပ်ချက်တွေများ ကောင်းချက်
ကားစက်ရုပ်တစ်ကောင်လုံး မျက်စိရှေ့မှောက် ရောက်လာမှ ယုံ။
အသံစနစ်တွေများ လန်ထွက်
နျူကလီးယားဗုံးတစ်လုံး လုံး နားထဲစိုက်ဝင်ပေါက်ကွဲထွက်မှ ယုံ။
ဟောဒီ့မှာ အများသုံးတယ်လီဖုန်းရုံတွေ။
ဟောဒီ့မှာ မြေအောက်ဘူတာရုံတွေ။
ဟောဒီ့မှာ ကာစီနိုဝိုင်းကြီးတွေ။
ဟောဒီ့မှာ တစ်ကိုယ်လုံးကျပ်စည်းမံမီတွေ။
ဟောဒီ့မှာ ညစာစားပွဲပေါ်က ကြက်ဆင်တွေ။
ဟောဒီ့မှာ လမ်းလျှောက်နေတဲ့ လူလှိုင်းလုံးကြီးတွေ။
ဟောဒီ့မှာ ပိုက်ဆံအိတ်ထဲက F.B.I တံဆိပ်ပြားတွေ။
ဟောဒီ့မှာ အတချီကေ့အပြည့်ဒေါ်လာတွေ။
ဟောဒီ့မှာ ကားနောက်ဖုံးထဲက သက်မဲ့ခန္ဓာတွေ။
ဟောဒီ့မှာ ကော့မစ်ဘုတ်တွေထဲက စူပါဟီးရိုးတွေ။
ဟောဒီ့မှာ မြို့ပြတိုက်တာတွေ။
မြို့ပြတိုက်တာတွေရဲ့ မီးရောင်စုံညရှုခင်းတွေ။
ဟောဒီ့မှာ သဲကန္တရတွေ။
သဲကန္တရထဲက မြင့်မားထိုးထွက် ခြောက်သယောင်းတောင်ကတုံးကြီးတွေ။
ဟောဒီ့မှာ သိပ္ပံစမ်းသပ်ခန်းတွေ။
သိပ္ပံစမ်းသပ်ခန်းထဲက ဖန်ချောင်းပြွန်ထဲရောက် ဂြိုဟ်သားတွေ။
ဟောဒီ့မှာ ထိတ်ထိတ်ကြဲသရုပ်ဆောင်တွေ။
ထိတ်ထိတ်ကြဲသရုပ်ဆောင်တွေအတွက် ကျော်ကြားသူတို့ ကြယ်ပွင့်လျှောက်လမ်းတွေ။
Lee တောင်ကုန်းပေါ်က ရာသက်ပန်ထောင်ထားတဲ့
ပေ ၃၅၀ အရှည် HOLLYWOOD အဖြူရောင်လေးထောင့်စာလုံးကြီးများ။
ကမ္ဘာ့ထိပ်တန်းဧရာမဖျော်ဖြေရေးလုပ်ငန်းကြီးထက်ပိုတဲ့
အမေရိကန်ရဲ့ ဝါဒဖြန့်ချိမှု။
ဟောလီးဝုဒ်နဲ့ ပတ်သက်ပြီး မစ္စတာပရဲ့ဇစ်ဒင့်ထ်က ဒီလိုမိန့်တယ်။
”အာဏာရှင်တစ်ယောက်က တစ်နေရာကနေလှမ်းပြီး ဆင်ဆာဖြတ်နိုင်တဲ့
လူ့အဖွဲ့အစည်းမျိုး အမေရိကန်မှာ မရှိ”။

လွန်းဆက်နိုးမြတ်
၁.၂.၁၅
မနက် ၀၅း ၃၇ နာရီ

စိုက်တယ်လေ ပျိုးတယ်

စိုက်တယ်လေ ပျိုးတယ်

ခြံဝန်းက ကျယ်ပြောလွန်းလှတယ်ရယ်လို့တော့
မဟုတ်ဘူး။
စိုက်ပျိုးနည်းတွေ ဘာတွေ ကျွမ်းကျင်လှလို့ရယ်လည်း မဟုတ်ဘူး။
စိတ်ကူးတည့်ရာ ရေးသားလိုက်ရာကနေ
လူကြိုက်များပြီး ဘက်ဆဲလာဖြစ်သွားတာမျိုးက တစ်ပင်။
လမ်းဘေးနေ သူ့ဘ၀လေးစာနာမိလို့
အိမ်ခေါ်တင်လိုက်ကာမှ ကိုယ့်ဘ၀ပါ ထိပါးသစ်စိမ်းချိုးဖို့
ကြံရွယ်နေတာက တစ်ပင်။
သူ့အမေကိုယ်တိုင် လက်ဆွဲခေါ်လာတဲ့ပြီး
ဘဘုန်းကြီးလက်ထဲ ကျောင်းအိပ်ကျောင်းစားထိုးအပ်သလို
မရည်ရွယ်ဘဲ မွေးစားလိုက်ရတဲ့
ဒူးမနာသားက တစ်ပင်။
အချိုးမပြေ ဂျစ်ကန်ကန်အိုက်တင်
စကားပြော ဘုကလန့် ဟန်မကျပင်သော်ငြား
အခြားဒေသမှာ မတွေ့နိုင်တဲ့ အရသာထူးခြား
ဒေသခံက တစ်ပင်။
တစ်ပင် တစ်ပင် တစ်ပင်နဲ့
သစ်ပင်တွေဖြင့် စုံလင်လှချည့်။

စိတ်အလိုလိုက် စိုက်ခဲ့ပျိုးခဲ့လေသမျှ သဲရေမကျခင်
စူးနေရာစူး ဆောက်နေရာဆောက် ရတော့မယ်။
ကိုယ့်သစ်ရိပ်ဝါးရိပ်မှာ
အနားယူ အပန်းဖြေ ခြံရှင်း အိမ်သစ်ဆောက်ခဲ့တာမှ အားမနာ
ကိုယ့်သစ်ရွက်တစ်စ သစ်ကိုင်းတစ်ချောင်းကျူးမိတယ်ဆိုရုံ
ဘေးဘီခြံလူသစ်များရဲ့ လူမှုစီးပွားနဲ့
လိင်ပိုင်းဆိုင်ရာအလိုမပြည့်ဝခြင်းများအတွက်
ကိုယ့်သစ်ပင်တွေဟာ
ပစ်မှတ်ဖြစ်မှန်းမသိဖြစ်လာ။
စည်ပင်ကို တိုက်တာဆောက်ခွင့်မတင်တဲ့ သူတွေဆီက
စည်ပင်စည်းမျဉ်းကြားလာ။

ထမင်းကြမ်းခဲပဲ ယပ်ခတ်စားပါရစေ။
မဟားဒယားကျူးကျော်ကျရောက်တာ မဟုတ်ပါဘဲနဲ့
ကိုယ့်ခြံနဲ့ကိုယ် အကုသိုလ်မပွားလို။
ကိုယ့်အပင်နဲ့ကိုယ် အပူမီးမယူလို။
ဗမာ့လွတ်လပ်ရေးတပ်မတော် ဘီအိုင်အေကနေ
ဗမာ့ကာကွယ်ရေးတပ်မတော် ဘီဒီအေ
ပြောင်းလဲဖွဲ့စည်းလိုက်တဲ့အတိုင်း
ကိုယ့်မှာ မလိုတဲ့ အပင်တွေအများကြီးနှုတ်ပစ်လိုက်ရ။
ခြံစည်းရိုးနဲ့ သုံးပေခွာ တစ်ပင်နဲ့တစ်ပင် သုံးပေခွာ
ဘုရားရိပ် တရားရိပ် ပိတောက်၊ အုန်းနဲ့ ပိန္နဲတွေ။
သံဃရိပ် မိဘရိပ် ဒန့်သလွန်၊ သရက် နဲ့ ကံ့ကော်တွေ။
ဆရာရိပ် သမားရိပ် ယူကလစ်၊ ရှောက်နဲ့ သဘောင်္တွေ။
ဆွေရိပ် မျိုးရိပ် မာလကာ၊ တမာနဲ့ သနပ်ခါးတွေ။

မစိုက်ကောင်းတာ စိုက်ကောင်းတာ
နောက်မှပဲ ကျမ်းဂန်နဲ့ ပြန်ညှိယူတော့မယ်။
နှင်းဆီ၊ ခရေ၊ ဇီဇ၀ါ၊ ဒန်းနဲ့ ရွက်လှ၊
ပြေပြစ်နုရွကာယအလှမယ်လေးများသဖွယ်
ချည်ပေါင်၊ ကန်စွန်း၊ ဗူးနဲ့ ခရမ်း
ဗိုက်ခွေးနမ်းမယ့် ဖြည့်စွက်ဟင်းအမယ်
ဒီမိုကရေစီအသွင်ပြောင်းပြောင်း မပြောင်းပြောင်း
ကိုယ့်ခြံကတော့ အဆိုးထဲကအကောင်းပဲ။
ရတနာပုံဆိုက်ကိန်းပဲ။
နောက်ကြောင်းပြန်လှည့်လှည့် မလှည့်လှည့်
ကိုယ့်အပင်တွေဟာ  တည့်တည့်ရှုရှုပဲ။
မဲမလိမ်ဘူး။ စစ်မတိုက်ဘူး။        ။

လွန်းဆက်နိုးမြတ်
၁၈.၇.၂၀၁၄
မနက် ၀၁း၀၀ နာရီ

အေးသာယာ

အေးသာယာ

ရပ်ကွက်ဟာ ရပ်ကွက်ဖြစ်ဖို့ စောနေပါသေးတယ်၊ ကားတစ်စင်းဝင်ရခက်တဲ့ မြေသားလမ်းပေါ်မှာ
ကျွဲ၊ နွား၊ ဆိတ်၊ ခြေရာတွေ ရှိပါတယ်၊ လူနေအိမ်တွေကြားထဲ တစ်နေကုန်တစ်နေခန်း မီးစက်
တဖုန်းဖုန်းနဲ့ သံချောင်းသံခဲတွေပေါ် ဂျောင်ဂျောင်မြည်ထု ရိုက်နေတဲ့ လူနေအိမ် တစ်လုံးကို မြင်
ရမယ်၊ အိမ်ခြေဟာ ကင်းခြေများလိုမညီဘဲ စိပ်တဲ့နေရာ အသားကုန်စိပ်ပြီး ကျဲတဲ့ နေရာ အသား
ကုန်ကျဲပါတယ်၊ သဲဆန်မြေနဲ့ ရွှံ့ဆန်မြေနှစ်မျိုးပေါင်းစပ်မှုဟာ မြေပြန့်များပြီး ဆင်ခြေလျှော
နည်းနည်းတွေ့ရစေပါတယ် ၊ ရပ်ကွက်လမ်းမှာ ယောက်ျားစီးစက်ဘီးဟောင်းကြီး ကို ကုန်းရုန်းနင်း
နေတဲ့ အပေါ်ပိုင်းအ၀တ်ဗလာနဲ့ ဒေသခံအမျိုးသားကြီး တစ်ယောက်မဟုတ်ရင်တော့အခြား
တစ်ယောက်ပေါ့၊ ၀ါတွင်းကာလ တစ်ရက်မဟုတ် တစ်ရက်ရက်မှာ ရပ်ကွက်ကပဲဖြစ်ဖြစ်
ရပ်ကွက်နီးချုပ်စပ်ကပဲဖြစ်ဖြစ် ဓမ္မာရုံမတ်ရပ်ဘုရားရုပ်ပွားတော်တွေ လှည့်လည်ပင့် ဆောင်လို့
အနားကျယ်ဝါးခမောက်အသီး သီး ဆောင်းထားတဲ့ အလှူခံပုဂ္ဂိုလ်လေးတွေ လော်စပီကာတစ်လုံး
ကို စက်ဘီးတစ်စီးစီးပေါ်တင် တွန်းပြီး နေပူမိုးရွာမရှောင် တစ်အိမ်တက်ဆင်း အလှူခံကြပါတယ်၊
အိမ်တိုင်းလျှပ်စစ်မီတာရှိကြပေမယ့် မီးအားမြှင့်စက်ခံမှ တယ်လီဗေးရှင်း ဖွင့်လို့ ရပါတယ်၊
တစ်အိမ်မဟုတ်တစ်အိမ်အိမ်က တွံတေးသိန်းတန်မဟုတ်ရင် ဟင်္သာတထွန်းရင်ဖွင့်ထားတဲ့အခါ
မီးလာနေမှန်း အလွယ် သိပေါ့၊ နွေခါဆိုရင်တော့ မီးအားကြီးပြတ်တတ်ပါတယ်၊ အဖြူဟာ ဖားဥ
စွဲပြီး မည်းညစ်ချင်လည်း မည်းညစ်နေမယ်၊ အစိမ်းဟာ အရောင်မွဲပြီး ဖာထေးချင်လည်း ဖာထေး
ထားမယ်၊ ကျောင်းတက်ကျောင်းဆင်းချိန်တိုင်း ပကတိအပြစ်ကင်းတဲ့ အဖြူအစိမ်း ၀တ်လေးတွေ
ရပ်ကွက်လမ်းမှာ ပေါ့ပါးမှုနဲ့ လမ်းလျှောက်ကြပါတယ်၊ တရုတ်ကြီးကျေးဇူးတော်ပါပဲ၊ မော်တော်
ဆိုင်ကယ်တစ်စီး လောက်သာ ရှိကြည့်လိုက် အရွယ်ရှိယောက်ျား အများစု ကယ်ရီထွက်ဆွဲကြမယ်၊
ဆိုင်ကယ်တစ်စီးလောက်ကလည်း တကယ် ဆိုမလောက်ပါဘူး၊ အဖေတစ်စီး သားတစ်စီး အဖေ
ရော သားရော ကယ်ရီမင်းတွေဖြစ်ပါတယ်၊ တစ်အိမ်လုံးမှာ အိပ်စရာ နေရာကောင်းကောင်း မရှိရင်
သာနေမယ် ဆိုင်ကယ်ကောင်းကောင်း တစ်စီး တော့ ရှိတတ်ပါတယ်၊ မြက်ရိတ်တဲ့ ကုလားမူတူးဟာ
စူပါကပ်နဲ့ မြက်သယ်ပါတယ်၊ ဆန်ရောင်းတဲ့ အတီးရဲ့ သမီးဟာ 125 ကန်ဘိုဖင် ထောင်စီးပါတယ်၊
ကျွဲ နွား မဖြတ်သန်းရ လမ်းတွေဟာ သန့်ရှင်းပြီး ကျွဲ နွား ဖြတ်သန်းခံရတဲ့ လမ်းတွေဟာ ပြော့ပြဲ
ဗွက်ထနေပါတယ်၊ တစ်ခါတစ်လေ နွားခြေရာခွက်ထဲမှာ ဧရာမကျွဲမျော့ကြီးတွေ ထွန့်ထွန့်လူးနေတာ
ကို တွေ့နိုင်ပါတယ်၊ ကိုယ်ထူကိုယ်ထဖို့ ပြင်နေတဲ့ ရပ်ကွက် ဗဟိုလမ်းဟာ ကွန်ကရစ်ခင်းလက်စ
တန်းလန်းနဲ့ အလှူခံလက်စမဏ္ဍပ်ကြီးတန်းလန်းနဲ့ နှစ်ပေါက်ပြီးရင်း နှစ်ပေါက်နေပါတယ်၊
ရပ်ကွက်မှာ အိမ်တစ်လုံးဆောက်မယ်ဆိုရင် ရပ်ကွက်ထဲက လက်သမားနဲ့ပဲ ဆောက်ပါတယ်၊
ရပ်ကွက်မှာ သာရေးရှိရင် ရပ်ကွက်ဦးက ကျောင်းထိုင် ဆရာတော်ကြွပါတယ်၊ ရပ်ကွက်မှာ နာရေး
ရှိရင်တော့ တော်တော်ဝေးဝေးရပ်ကွက်တစ်ခုက သုသာန်ကို ၀ိုင်းပို့ လိုက်ကြတော့တာပါပဲ၊
မနက်ခင်း စည်ပင်သာယာဈေးဟာ စည်ကားပြီး ညနေခင်းလမ်းကြားဈေးဟာ ၀ယ်ဖြစ်ရုံလောက်သာ
ရှိပါတယ်၊ ရဲစခန်းပဲဖြစ်ဖြစ် ဆေးရုံပဲ ဖြစ်ဖြစ် မသွားမဖြစ်သွားချင်ရင် မြို့ထဲသွားတဲ့ လမ်းမပေါ်က
အတော်လှမ်းလှမ်း နေရာတွေဆီကို သွားရပါ့မယ်၊ လက်လုပ်လက် စားများပေါ့၊ ကျောင်းသား
ကျောင်းသူများပေါ့၊ မြေကောင်းပေါ့၊ ရေကောင်းပေါ့၊ အသက်၀၀ရှူဖို့အတွက် လေကောင်းပေါ့၊
တစ်အိမ်နဲ့တစ်အိမ် ဘောဂဗေဒ အရ ပြိုင်ဆိုင်မနာလိုတာမျိုးအနည်းငယ်စီရှိကြ သော်လည်းပဲပေါ့၊
လူသတ်မှု မုဒိန်းမှု လုယက်မှုတွေတော့ အဟုတ်ကြီးမကြားဖူးပါဘူး၊ ဟမ်းဖုန်းခါးချိတ်ထားတဲ့
ထိပ်ပြောင်ပြောင် ရာအိမ်မှူးကိုညိုဟာ တစ်ချိန်က ကယ်ရီဆွဲခဲ့တာလို့ ပြောသံကြားရပါတယ်၊
အလုပ်ကြမ်းသမား ကိုမည်းဟာ ရာအိမ်မှူး ကိုညိုရဲ့ ဦးလေးဖြစ်ပြီး လက်သမားဆရာကိုဖြူဟာ
ကိုမည်းအစ်မ၀မ်းကွဲနဲ့ ညားပါတယ်၊ ရေသန့်ဗူးပို့တဲ့ ကိုနီ့ညီမဟာ ကိုမည်း မိန်းမဖြစ်ပါတယ်၊
ပန်းရံဆရာကိုဝါ၊ ကုန်စုံဆိုင်ပိုင် ရှင်ကိုပြာနဲ့ ၀ါးရောင်းတဲ့ ကိုခရမ်း ဘယ်သူနဲ့ပဲဖြစ်ဖြစ် စကားစပ်
မိတဲ့အခါ တစ်ယောက်ယောက်ဟာ တစ်ဦးဦးနဲ့တော့ တစ်နည်း တစ်ဖုံ ဆွေမျိုးတော်စပ်ကြပါတယ်၊
ဘောလုံးနဲ့ နှစ်လုံးကစားရာမှာ ၀ါသနာကြီးသူတွေ နေထိုင်ကြပါတယ်၊ ဂေးလို့ ခေါ်တဲ့ အခြောက်
တစ်ယောက်နှစ်ယောက်ကို ပုံမှန်တွေ့ရပြီး လက်စဘီယံ တွေအတွက်တော့ လက်စဘီယံဖြစ်လို့
ဖြစ်မှန်းတောင် ကိုယ့်ကိုယ်ကိုယ် မသိမြင်နိုင်တဲ့ ဗဟုသုတမျိုးလောက်သာ ရှိပါတယ်၊ အိမ်ရှင်မ
တချို့နဲ့ မိန်းမပျိုတချို့ဟာ ရပ်ကွက်ထဲက တိုက်ပုံချုပ်အိမ်တွေကနေ တိုက်ပုံပိတ်စတွေကို
အိမ်ယူပြီး ချုပ်ကြ သီကြ ပါတယ်၊ ဆယ်တန်းအောင်ပြီး ဒါမှမဟုတ် တက္ကသိုလ်အောင်ပြီး
မိန်းမပျိုအများစုကတော့ မြို့တော်ကြီးဆီ နေ့စဉ် အလုပ်သွားရပါတယ်၊ အထည်ချုပ်၊ စက်မှုဇုံ၊
ကုမ္ပဏီနဲ့ အစိုးရရုံးတွေ ဖြစ်ပါတယ်၊ နေ့လည်နေ့ခင်း စက်ဘီးတစ်စင်းနဲ့ တစ်လမ်းဝင် တစ်လမ်း
ထွက် ၀က်ရောင်းမလားလိုက်မေးနေတဲ့ ၀က်အရေး ကျွမ်းကျင်သူကြီးတွေလည်း ရှိပါတယ်၊
ကျောင်းပိတ်ရက်တွေဆို ကိုယ့်လမ်းထဲလာပြီး ကိုယ့်အိမ်ရှေ့ကနေ ၀ါးခြမ်းပြားတစ်ချောင်းကိုင်
ထားတဲ့ သူ့အမေကြီးဟာ တခြား လမ်းထဲ တခြားအိမ်ရှေ့က သူ့ကမြင်းလတီးသားသမီးဘုစုခရု
တွေကို ကီးကုန် မြင့်လှမ်းအော်ခေါ်တာလည်း ရှိတတ်ပါတယ်၊ အိမ်အတော်များ များမှာ ခွေးတစ်
ကောင်ကနေ ခွေးသုံးကောင်ခန့် မွေးထားတတ်ကြပြီး အဲဒီ့ထက် ပိုများတဲ့ အိမ်တွေမှာတော့
ကြောင်တစ်ကောင်ကနေ ကြောင်ရှစ်ကောင်လောက်ထိမွေးထားတတ်ကြပါတယ်၊ ဗမာဗုဒ္ဓဘာသာ
တွေအနေများသလောက် ကရင်ခရစ်ရှန်တွေနဲ့ ဟိန္ဒူကုလားနဲ့ မွတ်စ လင်ကုလားတွေလည်း
ရှိကြပါတယ်၊ တောရွာဓလေ့လို ညနေခင်းပျိုမေတစ်သင်း ရေအိုး ကိုယ်စီရေခပ်ဆင်းတာမျိုးနဲ့
နည်းနည်းလေး တောင်ဆင်ဆင်မတူတဲ့ ရပ်ကွက်ထဲက ဒေသခံအဒေါ်ကြီးတွေ ၅ ဂါလံဝင် UPG
အိမ်သုတ်ဆေးပုံးအလွတ် နှစ်လုံးစီကိုင်ရင်း ညနေပိုင်းမှာ သောက်ရေ သုံးရေ ထမ်းပါတယ်၊
တောရွာဓလေ့မှာ နွားရိုင်း သွင်းချိန်ကျော်ပြီး အပြင်မထွက်ကြပေမယ့် ရပ်ကွက်ထဲ အလုပ်ပြန်ချိန်
အစောဆုံးဟာ ည၈နာရီဆိုလည်း ဟုတ်ရ ည ၉နာရီ ဆိုလည်းဟုတ်ရတာပါပဲ၊ ညဖက်တွေမှာ
ဓာတ်တိုင်မီးအလင်းထက် ဆိုင်ကယ်မီး တ၀င်းဝင်းကသာ လမ်းတွေကို အလှဆင် ပါတယ်၊
ညစာစားပြီးချိန်ဆို ဟိုဖက်အိမ်က ဟဲလေးနဲ့ ဒီဖက်အိမ်က မိုက်ခဲတို့ ကာရာအိုကေနဲ့ တံတျာတေ
ရှင်ကြပါတယ်၊ ညတရေးနိုးလို့မှ တပိုးတပါးထသွားမယ်မကြံနဲ့ ညသန်းခေါင်းထဲ လူအရှင်လတ်
လတ်ကိုတွေ့သွားလို့ အိမ်ရှေ့ထိုး ရပ်လာတဲ့ ဆိုင်ကယ်ပေါ်ကနေ ဒီနားမှာ အသုဘအိမ် ဘယ်နား
ရှိသလဲ လှမ်းဟစ်မေးတတ်တဲ့ ဖဲဝိဇ္ဇာတွေလည်း ရှိပါသေးတယ်၊ အောက်ခြေ လူတန်းစားတွေဆို
တော့လည်း နိုင်ငံရေးအပြောင်းအလဲမှာ ဘယ်သူမှ ဘာမှ ထူးထူးခြားခြားတောက်ပြောင်
လာတာမျိုး မရှိပေမယ့် ဒေါ် အောင်ဆန်းစုကြည်နဲ့ ဗိုလ်ချုပ်အောင်ဆန်းပိုစတာတွေ ပေါ်ကာစ
တုန်းက ဆိုင်ကယ်မားကတ်တွေ နဲ့ အိမ်ဝါးထရံတွေမှာ အပြိုင်အဆိုင် ချိတ်ဆွဲ ဖိကပ်ထားလိုက်
ကြပါသေးတယ်၊ နောက်တော့လည်း အမှန်လက္ခဏာကို နီးရာဓားအောက်ကနေခြစ်ခဲ့ကြတာပါပဲ၊
ဇာဂနာနာမည် ကြားတာနဲ့ ၀ါးလုံးကွဲအော်ဟစ်ရယ်မောကြဖို့ သတိရပြီး နောက်တော့လည်း
ဒီမိုကရေစီရေး မကရေစီရေးထက် နေ့စဉ်ထမင်းလုံးစီရေးကိုသာ တွေးတောအိပ်စက်ကြရပါတယ်၊
တစ်နေ့တော့ ထီပေါက်မှာပါဆိုတဲ့ မျှော်လင့်ချက်လိုမျိုးပေါ့၊ တစ်နေ့တော့ ရပ်ကွက်မြေဟာ တန်ဖိုး
ရှိလာ မှာပါ၊ တစ်နေ့တော့ ရပ်ကွက်မီးဟာ အားပြည့်လာမှာပါ၊ တစ်နေ့တော့ ရပ်ကွက်လမ်းတွေ
ကားကောင်းကောင်းမောင်းလို့ရအောင် မာကျော လာမှာပါ၊ တစ်နေ့တော့ ရပ်ကွက်စီးပွားဟာ
စည်ပင်ဖွံ့ဖြိုးလာမှာပါ၊ အဲဒီ့ ဘယ်တော့မှ ရောက်မယ်မှန်းမသိသေးတဲ့ အထူးသဖြင့် အောက်ခြေ
ထိ ဒုတ်ဒုတ်ထိ ရောက်မလာနိုင်သေးတဲ့ အဲဒီ့တစ်နေ့တော့ဆိုတဲ့ ဖွင့်မပြောဘဲထားတဲ့ စိတ်ကူးတွေနဲ့
ရပ်ကွက်သူရပ်ကွက်သားတွေဟာ ရပ်ကွက်မှာ မျှော်တွေးနေထိုင်ကြပါတယ်၊ စိတ်မချတချ။    ။

လွန်းဆက်နိုးမြတ်
မှန်စီရွှေချ ကဗျာစာအုပ်မှ-လွန်းဆက်နိုးမြတ်၊ မြတ်မိုးအိမ်၊ မြေမှုန်လွင်၊ WLO

ယန်းကီးအထာ

ယန်းကီးအထာ

“အမေရိကန်အပြင်ဖက်ကလူတွေဟာ နည်းပညာအရတော့ အာရပ်တွေပဲ”
(The Dictator Film)

လူလည်ကြီးကနေဒီ ဆေးပြင်းလိပ်ကြိုက်ပုံက စာတင်လောက်တယ်။
ကျုးဘားနိုင်ငံကို ကုန်သွယ်ရေးပိတ်ဆို့ မှုလက်မှတ်ရေးထိုးခြင်းမပြုခင်လေးမှာပဲ
ဆေးပြင်းလိပ်သောက်ဖော်သောက်ဖက် သတင်းထုတ်ပြန်ရေးဌါနအကြီင်္းအကဲ ပီရာဆလင်ဂျာကို မှာတယ်။
လက်နဲ့လိပ်တဲ့ ကျုးဘားနိုင်ငံထုတ် မက်ဆစ်အပ်(ပ်)မန်းဆေးပြင်းလိပ် ၁၀၀၀ ၀ယ်ပေးဖို့ပေါ့။
နောက်တစ်နေ့ ဆေးပြင်းလိပ် ၁၂၀၀ ၀ယ်ယူပြီးလို့ စက္ကန့်ပိုင်းအကြာမှာ
ကွန်မြူနစ်နိုင်ငံထွက်ကုန်အားလုံး အမေရိကန်ပြည်ထောင်စုက တားမြစ်တဲ့ အမိန့်ကို
ကနေဒီ လက်မှတ်ထိုးတယ်။

အစ္စရေး-အီရန်အရေးသုံးသပ်ချက်တစ်ခုလား။ ဒါမှမဟုတ် အမေရိကန်ရဲ့ အာဖျံကွီးမှုတစ်ခုလား။
နေတန်ယာဟု ပြောခဲ့သလို အမေရိကန်အစိုးရက ဘယ်လိုမူဝါဒတွေချမှတ် ချမှတ်၊
အစ္စရေးဆိုတာ ကနဦးကတည်းက အမေရိကန်ထောက်ခံမှုရထားတဲ့နိုင်ငံ၊ အစ္စရေးက
အီရန်ကို ၀င်တိုက်ဖို့ ကိစ္စအတွက် အိုဘားမားအစိုးရဟာ အများအမြင်မှာ
သဘောမတူချင်သလိုလိုလုပ်ပြီး ဖွင့်မပြောလည်း စည်းဝါးကိုက်သိပြီးသား နားလည်မှုမျိုးနဲ့
သဘောတူညီထားပြီးသား။ အရင်တုန်းက အစ္စရေးတွေ ကျူးကျော်ဝင်ရောက်နေထိုင်တဲ့ကိစ္စကို
အသံထွက်ကျယ်ကျယ်နဲ့ကန့်ကွက်ပြီးမှ ခွင့်ပြုခဲ့သလို
အခုလည်း နေတန်ယာဟုအဆိုကို လူသိထင်ကြားကန့်ကွက်ပြီးရင် ထောက်ခံဦးမှာပဲ။

“အမေရိကန်ပြည်ထောင်စုက ခင်ဗျားတို့ကို ကူညီချင်ပါတယ်။”
(ချားဝီလ်ဆင်၊ အမေရိကန်ကာကွယ်ရေးဆပ်ကော်မတီ ကွန်ဂရက်အရာရှိ၊Charlies Wilson’s War Film)

“မကူညီချင်ပါဘူး။ လုံးဝကို မကူညီချင်ပါဘူး။ ကျုပ် အောက်စဖိုဒ့်မှာ
ကျောင်းတက်ခဲ့တော့ ဒီစကားရဲ့အဓိပ္ပါယ်ကို ကောင်းကောင်းသိတယ်။
U.S က ကျူပ်တို့ကို မကူညီချင်ပါဘူး။”
(ကာနယ်မက်ဟုဒ်၊ ပါကစ္စတန်အရာရှိ၊Charlies Wilson’s War Film)

ကဒါဖီမသေခင်မှာ ပြောသွားခဲ့တဲ့ စကားတစ်ခွန်းရှိတယ်။
“မင်းတို့အမှန် အမှားကို ခွဲခြားသိကြရဲ့လား”တဲ့။
ထောက်လှမ်းရေးဆိုင်ရာ ကုမ္ပဏီတစ်ခုကနေ အီးမေးလ်သတင်းပေါက်ကြား။
အကြမ်းဖက်ခေါင်းဆောင် အိုစမာဘင်လာဒင်ရဲ့ ရုပ်အလောင်းဟာ ထုတ်ပြန်ကြေငြာသလို ပင်လယ်ပြင်မှာ
မွတ်စလင်ဘာသာထုံးစံနဲ့ မီးသဂြိုလ်ခဲ့ခြင်း မဟုတ်။ အမေရိကန်ပို့ပြီး မီးသဂြိုလ်ခဲ့ခြင်းသာဖြစ်တဲ့။
ဘင်လာဒင်ဟာ တကယ်ပဲ အိုဘားမားရဲ့
ရွေးကောက်ပွဲစည်းရုံးမှုသားကောင်ဖြစ်သွားခြင်းပဲလား။

လေ့လာတွေ့ရှိချက်တွေအရ
ပါကစ္စတန်မှာ ၂၀၀၉ခုနှစ်အတွင်း မောင်းသူမဲ့ဒရုန်းလေယာဉ်တိုက်ခိုက်မှုကြောင့်
အရပ်သား ၇၀၀ သေဆုံး။ အမေရိကန်အစိုးရဟာ အာဖဂန်ရဲ့ မူဂျာဟီဒင်သူပုန်တွေကို
ဒေါ်လာသန်းတစ်ဘီလီယံတန်ဖိုးရှိတဲ့ စစ်လက်နက်တွေ ထောက်ပံ့ပေးပြီး ကိုးနှစ်ကြာကျူးကျော်ဝင်ရောက်နေတဲ့
ဆိုဗီယက်တွေကို မောင်းထုတ်ပစ်ခဲ့။ အာဖဂန်ပြန်လည်ဖွံဖြိုးရေး ကျောင်းနဲ့ဆေးရုံတွေဆောက်ဖို့ကျတော့
ဒေါ်လာတစ်သန်းဖိုးတောင် မသဒ္ဒါ။ အကြမ်းဖက်သမားတွေကို နှိပ်နင်းရင်းနဲ့ အကြမ်းဖက်သမားတွေ
တိုးပွားလာပုံ ဥပမာပေးရရင်ဖြင့်-

“၂၀၀၄ခုနှစ် ပါကစ္စတန်နိုင်ငံမှာ တာလီဘန်သူပုန်ပေါ်ပေါက်ခဲ့တယ်လို့ ဆိုနိုင်တယ်။
ကျေးရွာတစ်ရွာကို အမေရိကန်မောင်းသူမဲ့ယာဉ်နဲ့ တိုက်ခိုက်ခဲ့လို့
အဲဒီ့ကျေးရွာသားသေဆုံးခဲ့တယ်။ နောက်တစ်နေ့ သူ့ရဲ့ အသုဘမှာ
နောက်ထပ်တိုက်ခိုက်ခံရပြန်တယ်။ ဒီဖြစ်စဉ်ကြောင့် ပါကစ္စတန်-တာလီဘန်ရယ်လို့
ပေါ်ပေါက်လာတာဖြစ်တယ်လို့ သုံးသပ်နိုင်တယ်။ အမေရိကန်မောင်းသူမဲ့
လေယာဉ်တွေရဲ့ တိုက်ခိုက်မှုဟာ တရားသဖြင့် ပြဌာန်းထားတဲ့ ဥပဒေတွေနဲ့
လွတ်ကင်းပြီး လူမှုကိုယ်ကျင့်သိက္ခာအရလည်း မမျှတဘူး”
(လန်ဒန်အခြေစိုက်လူ့အခွင့်အရေးဆိုင်ရာရှေ့နေ ဆာဂါဟတ်ဆန်အား ပရက်စ်တီဗွီသတင်းဌာနက တွေ့ဆုံမေးမြန်းခန်း)

အီရန်ရဲ့ စွပ်စွဲပြောဆိုမှုသက်သက်ဆိုရင်တောင် စိတ်ဝင်စားစရာကောင်းလှပါတယ်။
အီရန်နျူကလီးယားပညာရှင်တွေကို လုပ်ကြံတဲ့ အမှုသွားအမှုလာတွေမှာ
တစ်ခုနဲ့တစ်ခုတူညီတဲ့ လုပ်နည်းကိုင်နည်းတွေတွေ့ရတယ်။ ဆိုတော့ နောက်ဆုံးလုပ်ကြံမှုကလည်း
ကနဦးလုပ်ကြံမှုတွေနည်းတူ အမေရိကန်နဲ့ အစ္စရေးတို့အနေနဲ့ နောက်ကွယ်မှာ
ပတ်သက်နေမယ်လို့ ယူဆတော့တာပေါ့။ ၁၉၆၃ ခုနှစ်၊စီအိုင်အေ ထောက်လှမ်းရေးအဖွဲ့က အီရန်ဝန်ကြီးချုပ်
မိုဟာမက်မိုဆာဒီကို ရာထူးဖြုတ်ချ၊ ရှားဘုရင်ကို နန်းတင်၊ ရှားဘုရင်က သက်ဦးဆံပိုင်စနစ်နဲ့ အီရန်ကို အုပ်ချုပ်၊
၁၉၈၀ ခုနှစ်၊ အီရတ်အာဏာရှင် ဆက်ဒမ်ဟူစိန်တပ်ဖွဲ့များက အီရန်ကို ၀င်ရောက်တိုက်ခိုက်။
အမေရိကန်သမ္မတရိုနယ်ရီဂင်က ဆက်ဒမ်ဟူစိန်အစိုးရကို
ထောက်လှမ်းရေးသတင်းတွေ၊ ငွေကြေးနဲ့ စစ်လက်နက်ပစ္စည်းတွေထောက်ပံ့ပေးခဲ့။

“ကျွန်တော့်အမြင်ပြောရရင် အမေရိကမှာ အဲ့ဒီအရှေ့အလယ်ပိုင်းဒေသနဲ့
ပတ်သတ်လို့ ရည်မှန်းချက်တစ်ခုပဲရှိပါတယ်။ အခြေခံအားဖြင့်တော့
အဲ့ဒီဒေသထွက်ရေနံတွေကိုထိန်းချုပ်ဖို့ ပိတ်ဆို့မှုတွေဆက်တိုးမြှင့်ဖို့
တန်ခိုးအာဏာသိသိသာသာကြီးထွားလာတဲ့ တရုတ်နဲ့အိန္ဒိယအပေါ်ရည်မှန်းထားတဲ့
အစီအစဉ်တွေမှာ စစ်ပြုတာပဲဖြစ်ဖြစ် ပိတ်ဆို့ကန့်သတ်တာပဲဖြစ်ဖြစ်
သေချာတာကတော့ အကြောင်းပြချက်တစ်ခုပဲရှိတယ်လို့ ကျွှန်တော်ထင်ပါတယ်။
အရှေ့အလယ်ပိုင်းဒေသရေနံတွေကို လက်ဝါးကြီးအုပ်ရေးပေါ့”
(အီရန်-အမေရိကန်အရေးတက်ကြွလှုပ်ရှားသူ အလီရေဇာ)

စတိဗ်ဂျောဗ့်သေတာနဲ့  FBIက စတိဗ်ဂျောဗ့်ရဲ့ မှတ်တမ်းတွေ ထုတ်ပြန်တာနဲ့ ဘာဆိုင်လို့လဲ။
လစ်ဗျားနယ်မြေကို ကုလသမဂ္ဂလုံခြုံရေးကောင်စီက မပျံသန်းရဇုန်သတ်မှတ်ထားလည်း
အမေရိကန်နဲ့ နေတိုးတိုက်လေယာဉ်တွေက အဲဒီ့နယ်မြေတွေပေါ်  အဲဒီ့စည်းကမ်းကို
ချိုးဖောက်ပျံသန်းတာကရော အခြားစည်းကမ်းတစ်ခုလား။ တစ်ဖက်မှာ
တရုတ်(တိုင်ပေ)ကို လက်နက်ရောင်းနေသလို တစ်ဖက်မှာ တရုတ်(ပြည်မ)ကြီးနဲ့ အမေရိကန်ဟာ
မြောက်ကိုရီးယားလျှို့ဝှက်ချက်တွေ နှစ်ဦးသဘောတူ လဲလှယ်ပြီး နောက်ကွယ်မှာ
တရုတ်သူလျှိုလုပ်ငန်းတိုးမြင့်လုပ်ဆောင်နေမှုအပေါ် ထိတ်လန့်တကြားဖြစ်နေခြင်းဟာ
အမေရိကန်ရဲ့ နှစ်ထပ်ဆင့်မီးစတစ်ဖက် ရေမှုတ်တစ်ဖက်မူဝါဒလား။
နယူးယောက်မြို့က မွတ်စလင်တွေကို နယူးယောက်ရဲတပ်ဖွဲ့နဲ့ စီအိုင်အေပူးပေါင်းထောက်လှမ်းတာဟာ
အမေရိကန်တွေ ပြောပြောနေတဲ့ လူ့အခွင့်အရေးလား။
TO KILL A MOCKING BIRD ကနေ the Help အထိ အထင်ကရ ဟောလီးဝုဒ်ရုပ်ရှင်ဇာတ်ကားတွေမှာ
အဓိကပါဝင်တဲ့ အကြောင်းအရာဟာ ဘာဖြစ်လို့ အသားအရောင်ခွဲခြားမှုဖြစ်ရတာလဲ။
အော်စကာရရုံပဲလား။ အဲဒီ့ထက် ပိုတဲ့ ရည်ရွယ်ချက်ရှိသလား။ ဟာဗေးမစ်ခ်ဟာ
အမေရိကန်လူအဖွဲ့အစည်းအကြောင်းကို မသေခင်ကတည်းက
ကောင်းကောင်းကြီး သဘောပေါက်ခဲ့သူ။

“ဟာဗေး စကားပြောနေပါတယ်။ ဒါကို ကျွန်တော်လုပ်ကြံခံရပြီး သေဆုံးတဲ့အခါဖွင့်ဖို့ အသံသွင်းခဲ့ပါတယ်”
(ဟာဗေးမစ်ခ်၊ ဂေးအခွင့်အရေးလှုပ်ရှားမှုခေါင်းဆောင်၊ MILK Film၊)

ကြိုတင်မှာယူထားတဲ့ စစ်ပွဲတွေက တစ်ပွဲပြီးတစ်ပွဲအလှည့်ကျတန်းစီလို့။
မြို့ကြီး (၈၀) မှာ အီရန်အရေး ဆန္ဒပြသူက ပြနေပြီ။
ဆိုက်ကိုဖောက်တဲ့ သူကဖောက်နေပြီ။ ပူးတွဲစစ်ရေးလေ့ကျင့်မှုရဲ့ အသီးအပွင့်အဖြစ်
ဒေသခံမိန်းမပျိုတွေကို အဓ္ဓမကျင့်တဲ့ စစ်သားက ကျင့်နေပြီ။ တာလီဘန်တိုက်ခိုက်ရေးသမား
အလောင်းတွေပေါ် တခစ်ခစ်ရယ်ပြီး သေးနဲ့ပန်းတဲ့ စစ်သားက ပန်းနေပြီ။ အာဖဂန်အရပ်သားတွေကို အသားလွတ်
သေနတ်နဲ့ လိုက်ပစ်တဲ့ စစ်သားက ပစ်နေပြီ ( ကလေးငယ် ၉ ဦးအပါအ၀င် ၁၆ ဦး သေဆုံး)။ စစ်သုံးစရိတ်ဘတ်ဂျက်
ဝန်ထုပ်ဝန်ပိုးတွေအောက်မှာ အမေရိကန်ပြည်သူတွေ စီးပွားရေးကျဆင်း၊ အလုပ်လက်မဲ့နှုန်းမြင့်တက်။
လျှာတန်းလန်းနဲ့ မျက်လုံးမျက်ဆံပြူးကျယ်ပိပြားနေကြပြီဆိုသော်လည်း…။

ထုံးစံအတိုင်း ပြောချင်ရာပြောပြီးရင်
အမေရိကန်အစိုးရရဲ့ သဘောထားအမြင်အာဘော်သာဖြစ်ကြောင်း
ထုတ်လွှင့်ဆဲ သတင်းဌာနရဲ့ အမြင်အာဘော်မဟုတ်ကြောင်း
အမေရိကန်တက်ခနိနဲ့ အမေရိကန်ဝါရှင်တန်ဒီစီအခြေစိုက်အသံလွှင့်ဌာနကနေ
တစ်ကမ္ဘာလုံးကို အချိုသတ်ဦးမယ်။ သူ့ သကြားလုံးအရသာကတော့
သမိုင်းကြောင်းတစ်လျှောက် ချဉ်စုတ်စုတ်နဲ့။        ။

လွန်းဆက်နိုးမြတ်
(Resource-နိုင်ငံတကာရေးရာဂျာနယ်များ)

မှန်စီရွှေချ ကဗျာစာအုပ်မှ-လွန်းဆက်နိုးမြတ်၊ မြတ်မိုးအိမ်၊ မြေမှုန်လွင်၊ WLO

နိုင်ငံပြုအရေးအသား

နိုင်ငံပြုအရေးအသား

ပြည့်ဝစစ်မှန်တဲ့ ပြည်သူ့ဆန္ဒနဲ့ ထပ်တူကျသော
ဖွဲ့စည်းပုံအခြေခံဥပဒေဖြစ်တည်ရှိရပါမယ်။
လွတ်လပ်မျှတတဲ့ ပါတီစုံဒီမိုကရေစီစနစ်
ဖြစ်ထွန်းပေါ်ပေါက်ရေးဟာ ပဓာနကျသလို
တိုင်းရင်းသားပေါင်းစုံ ညီညွတ်ငြိမ်းချမ်းရေးဟာလည်း အဓိကကျပါတယ်။
လယ်ယာကိုင်းကျွန်းများ စိမ်းစိုဝင်းမှဲ့ပြီး ပညာရှိစပါးနှံတွေ
အမျိုးမှန် အပင်သန် ခေါင်းငိုက်စိုက်ရွှေရောင်သန်းစေဘို့
သိမ်းဆည်းလယ်ယာအရေး မြန်မြန်မနှေး အဖြေရှာပေးရန်လိုပါတယ်။
လျှပ်စစ်ဓာတ်အားတွေ တသွင်သွင် ရေလို စီးဆင်းလင်းဖြာလို့
အဖွဲ့အစည်းပေါင်းစုံအားအင်နဲ့
မြစ်ချောင်းအင်းအိုင်တွေကို
သဘာဝကျကျ ထိန်းသိမ်းစောင့်ရှောက်သင့်ပါတယ်။
အစိုးရပိုင်းမှာ ရုံးအဆောက်အဦးကြီးတွေ
လိုအပ်လျော်ညီစွာ စည်းကမ်းတကျ တည်ဆောက်သကဲ့သို့
ရုံးပြင်ကန္နားတွေမှာ အာဂတိကင်းရှင်းစွာ ဆက်သွယ်သွားလာရပါမယ်။
ကုန်သည်ပိုင်းဟာ ကုန်သည်ပိုင်းအလျောက်
အမြတ်ကြီးမစားဘဲ ကူးသန်းရောင်းဝယ်ဖောက်ကား
မင်းဘဏ္ဍာအခွန်အတုတ်မှန်စွာ ပေးဆောင်ရပါမယ်။
ပညာရေးဘက်မှာ ဖြောင့်မတ်မြင့်မားစနစ်ကျတဲ့ သင်ရိုးတွေပြုစုလျက်
မျက်နှာသာပေး ဘက်လိုက်ခြင်းကင်းအောင်
အကျင့်ပျက်ဆရာ/ဆရာမတွေ မမွေးထုတ်ဘို့ လိုပါတယ်။
စက်မှုဘက်ပိုင်းမှာလည်း အလုပ်ရုံစက်ရုံတွေဟာ မီးခိုးတလူလူဝေ
ဇုံအလိုက် ကုန်ထုတ်လုပ်မှုတွေ ထာဝရ စက်ယန္တရားသံတညံညံရှိစေပါမယ်။
လူအချင်းချင်းလှည့်ပတ်ခြင်းကင်းဝေးစေချင်သလို
အာဏာပိုင်နဲ့ ပြည်သူကြား ယုံကြည်မှုလည်း တိုးပွားစေချင်ပါတယ်။
ဆန္ဒပြ ရဟန်းသံဃာပြည်သူလူထုကိုဖြစ်စေ
တစ်ဝမ်းတစ်ခါးအခြေအနေကြောင့်
ကျူးကျော်နေထိုင်ဆိုင်ဖွင့်ရောင်းချသူတွေကိုဖြစ်စေ
ညတွင်းချင်း အင်အားသုံးဖြိုခွင်းဖြေရှင်းခြင်း ကင်းရှင်းကြစေချင်ပါတယ်။
မြို့တော်များအတွင်း သွားလာနေထိုင်သူတွေကို
နေ့စဉ် လစဉ် နှစ်စဉ်ကြုံတွေ့မြဲ ကားပိတ် ကားမှောက် လမ်းပျက် ရေလျှံမှုများအတွက်
ယာဉ်စည်းကမ်း လမ်းစည်းကမ်းလိုက်နာစေရုံနဲ့တင် မလုံလောက်
မြောင်းများ လမ်းများ တံတားများကိုလည်း စံချိန်မှီအောင် တည်ဆောက်စေချင်ပါတယ်။
အကျင့်ပျက်ခြစားခြင်း၊ စာရိတ္တပျက်ပြားခြင်း၊ ဆင်းရဲမွဲတေခြင်း၊
ဘာသာနဲ့ လူမျိုး ပဋိပက္ခဖြစ်အောင် ဆူပူလှုံ့ဆော်ခြင်းတို့ကို
မီးမောင်းထိုး ပညာပေး အမှန်တရားအတိုင်း မျှတစေဘို့
ဗဟိုချုပ်ကိုင်မှုမဟုတ်ဘဲ လူထုသဘောထားအတိုင်း
ပွင့်လင်းလွတ်လပ်တဲ့ မီဒီယာမဏ္ဍိုင် လူကြီးလူကောင်းဆန်ဆန်
လှည့်ဖျားပရိယာယ်ကင်းစွာ ဖော်ဆောင်ခွင့်ပြုရန် သင့်ပါတယ်။
ခွေး၊ တောက်တဲ့နဲ့ ဆံပင်ကအစ လူ၊ ဘိန်းနဲ့ စစ်လက်နက်ကုန်ကူးခြင်းအဆုံး
ဘနဖူးသိုက်တူး ငတ်ကြီးကျအရောင်းအ၀ယ်သမားတွေနိဂုံးချုပ်ပြီး
သမာဓိရှိတဲ့ အရောင်းအ၀ယ်ဈေးကွက်တွေ ဖန်တီးဖော်ဆောင်ရပါမယ်။
နိုင်ငံတကာစံချိန်မှီ ဘဏ်တိုက်ကြီးများမှ အစပြုလို့
မြေပေါ်မြေအောက်အစုန်အဆန် လျှပ်စစ်ကျည်ဆံအမြန်ရထားများ၊
ဝေဟင်တစ်ခွင် အဆင့်အတန်းမြင့်နိုင်ငံတကာလေယာဉ်ပျံကြီးများ၊
ရေပိုင်နက်ထဲ အတိုင်းတိုင်းအပြည်ပြည်မှ ဧရာမကုန်တင်သင်္ဘောကြီးများ။
ကမ္ဘာ့အဆင့်ဘူတာရုံများ၊ ကမ္ဘာ့အဆင့်လေယာဉ်ကွင်းများ၊ကမ္ဘာ့အဆင့်ရေနက်ဆိပ်ကမ်းများ။
မော်တော်ကားထုတ်လုပ်ရေးစက်ရုံကြီးများ၊ စက်မှုဇုံများ၊ ကုန်သွယ်ရေးကုမ္ပဏီကြီးများ၊
နည်းပညာဝန်ဆောင်မှုများ၊ ပြည်နယ်တိုင်းဒေသများမှ ကုန်ထုတ်လုပ်ငန်းများ၊
ရိုးရာယဉ်ကျေးမှုအနုသုခုမများ၊ ရွှေ၊ ငွေ၊ ကြေး၊ ခဲမဖြူ၊ အဖြိုက်နက်၊
ပတ္တမြား၊ နီလာ၊ ကျောက်စိမ်း အစရှိတဲ့ တွင်းထွက်ပစ္စည်းရတနာများ၊
မြေပေါ်မြေအောက် ရေပေါ်ရေအောက် ကျွန်းသစ်၊ ရေနံနဲ့
သဘာဝဓာတ်ငွေ့သယံဇာတများ
အစရှိတဲ့ နိုင်ငံ့ကြွယ်ဝမှုကဏ္ဍစုံအကျိုးစီးပွားအားလုံး
တိုင်းပြည်အတွက် ထင်သာမြင်သာ ရင်းနှီးပွားစည်းကူးလူးရပါမယ်။
ဂျုံ၊ ပဲ၊ ပြောင်း၊ ကုန်စည်သယ်ပိုးသူ၊
သစ်၊ ၀ါး၊ သံ ၀န်စည်စလယ်သယ်ပိုးသူ၊
လက်ပွေ့အရောင်းသမားများ၊ ခေါင်းရွက်ဗျပ်ထိုးဈေးသည်များ၊
မီးရထားဘက်လုပ်သားများ၊ ရေလုပ်ငန်းဘက်လုပ်သားများ၊
အများသုံးယာဉ်မောင်းလုပ်သားများ၊ အငှားလိုက်ယာဉ်မောင်းများ၊
သီကုံးပန်းသွင်အနုပညာရှင်များ၊ ရုံးမှုရေးရာစာရေးစာချီများ၊
ကာကွယ်ရေးစွမ်းရည်တပ်မတော်သားကြီးများ၊
ဥပဒေပြုလွှတ်တော်အမတ်မင်းများ
အစရှိတဲ့ နိုင်ငံသားတိုင်း တာဝန်ကိုယ်စီကျေပွန်ဘို့ လိုပါတယ်။
အနာဂတ်မှာ နယ်ပယ်ရပ်အသီးသီးဖွံဖြိုးတိုးတက်စေရန်
ထွားလှ ကြိုင်းလှ သန်မာလှ ခန့်ညားလှတဲ့ မောင်တို့ မယ်တို့ရဲ့
လူ့စွမ်းအားအရင်းအမြစ်တွေ ခေတ်မှီဥာဏ်ပွင့်ဘို့
ကမ္ဘာကို အစဉ်တစိုက် မျက်စိဖွင့် နားစွင့်စောင့်ကြည့်ရပါမယ်။
အိမ်ပြတင်းတိုင်းမှာ နိုင်ငံတော်အလံလွင့်ဝဲ
မျက်နှာစာတန်းတစ်လျှောက် အလှတန်ဆာပန်းမလ်မျိုးစုံချိတ်ဆွဲလို့
တေးသံစုံတူရိယာများညံစီနေအောင် တီးမှုတ်ကြ ကခုန်ကြ သီဆိုကြ
ပြည်ထောင်စုအ၀ှမ်း ပျော်ပွဲရွှင်ပွဲများ ဆင်ယင်နွှဲပြီး မြူးတူးလန်းရွှင်သော
ဒီမိုကရေစီနိုင်ငံတော်တစ်ခုဆီ အရောက်လှမ်းနိုင်ရမည်ဆိုတဲ့
အခြခံစိတ်ဓာတ် ပန္နက်ရိုက်ရန် ယခုကဲ့သို့ နိုင်ငံပြုခွန်အားဖြည့်
အရေးအသားများလည်း အထူးတလည် လိုအပ်ပါတယ်။

လွန်းဆက်နိုးမြတ်
၁၂.၈.၁၃
မနက် ၀၂း၁၈နာရီ

အလီရွှေ့ကွက် = Ali Shuffel

အလီရွှေ့ကွက် = Ali Shuffel

ဆိုကြပါစို့။
ကမ္ဘာ့ဟဲဗီးဝိတ်ချန်ပီယံဟောင်း ဂျိမ်း(စ)ဂျေကော်ဘတ်လို
အလီဟာ လက်ဝှေ့ပညာအရာ ပါရမီမရှိခဲ့ဘူးပဲထားဦး။
ကမ္ဘာ့ဟဲဗီးဝိတ်ချန်ပီယံဟောင်း ရော့ကီးမာရှီယားနိုးလောက်
ကြမ်းကြမ်းရမ်းရမ်းလက်ဝှေ့အသတ်မှာ မထွန်းပေါက်ခဲ့ဘူးပဲထားဦး။
ကမ္ဘာ့ဟဲဗီးဝိတ်ချန်ပီယံဟောင်း ဂျိုးလူဝီကဲ့သို့
လက်ဝှေ့ပညာနဲ့ အကြမ်းအရမ်းအသတ်ပညာ မပေါင်းစပ်နိုင်ခဲ့ဘူးပဲထားဦး။
အမေရိကန်ရဲ့ မတရားသော ဗီယက်နမ်စစ်မြေပြင်ပေါ်
ကမ္ဘာ့ဟဲဗီးဝိတ်ချန်ပီယံဘွဲ့အသိမ်းခံပြီး စစ်မှုထမ်းဖို့ ငြင်းဆန်ခဲ့တဲ့ အလီ။
လူဖြူလူမဲခွဲခြားမှုကို ရဲရင့်ပြောင်မြောက်စွာ တော်လှန်ခဲ့တဲ့ အလီ။
အလီဟာ အလီဖြစ်ခဲ့တဲ့အတွက်
အခြားကမ္ဘာကျော် ဘယ်လက်ဝှေ့သမားမျိုးနဲ့
အရေးတကြီး ထပ်တူကျဖို့ လိုအပ်သေးလို့လဲ။

ပထမဆုံးရရှိတဲ့ အိုလံပစ်ချန်ပီယံရွှေတံဆိပ်ကို
အိုဟိုင်းအိုမြစ်ထဲ စက်ဆုပ်ရွံရှာစွာ ပစ်ချခဲ့တာ မပစ်ချခဲ့တာ အသာထား
အိုလံပစ်လက်ဝှေ့ချန်ပီယံတစ်ယောက်ဖြစ်လျက်နဲ့
လူဖြူများသာစားသုံးတဲ့ စားသောက်ဆိုင်ထဲကနေ
ခွေးတစ်ကောင်လို မောင်းထုတ်ခံခဲ့ရတာကတော့
ကြိုးဝိုင်းထဲ လက်သီးနဲ့ အလဲထိုးခံလိုက်ရတာထက်
ပိုပိုပြီးတော့ အလီနာကျင်။

၃နှစ်ကျော်ကြာပြီးမှ
လက်ဝှေ့လောကကို ခက်ရာခက်ဆစ် ပြန်ဝင်လာတဲ့
အလီရဲ့ ရည်မှန်းချက်က တစ်ကျော့ပြန်ချန်ပီယံ။
အဲလ်ဗစ်ပရက်စလေလက်ဆောင်ပေးတဲ့ ခြုံထည်ဝတ်ရုံနောက်ကျောမှာ
ကျောက်မျက်ရတနာနဲ့ စီခြယ်ရေးထိုးထားတာက
ပြည်သူကပေးတဲ့ ချန်ပီယံ
The People’s Champion.

အစ္စလမ်ဘာသာဝင်ဇနီးသည် မပီသလို့
ပထမမိန်းမ ဆွန်ဂျီကလေးကို
တရားနည်းလမ်းတကျ ၁၀နှစ်တိုင်အောင်
လျော်ကြေးငွေမြောက်များစွာ ပေးဆပ်ကွာရှင်းခဲ့တဲ့
လက်ဝှေ့သမားအလီဟာ
ကနေ့ခေတ် အာရပ်ကမ္ဘာက အစ္စလမ်ဘာသာဝင်အမျိုးသမီးတွေ
လူ့အခွင့်အရေးဆုံးရှုံးနေရတာကြည့်ပြီး ပျော်ရွှင်နေမယ်ထင်လား။
ကနေ့ခေတ် အထင်ကရအားကစားပွဲတော်တွေကို အထူးခြိမ်းခြောက်နေတဲ့
အစ္စလမ်ဘာသာရေးအစွန်းရောက်အကြမ်းဖက်လုပ်ရပ်တွေအပေါ်
အိုလံပစ်အားကစားပွဲတော်ကနေ စတင်ကျော်ကြားလာခဲ့တဲ့
အစ္စလမ်ဘာသာသက်ဝင်ယုံကြည်သူ အလီကြားသိပြီး
သဘောကျနှစ်သက် လက်ခံနေမယ်ထင်လား။
ကနေ့ခေတ် နိုင်ငံအချင်းချင်းကြား ဘာသာရေးနဲ့ လူမျိုးရေး အကြောင်းပြချက်နဲ့
ကြီးနိုင်ငယ်ညှင်းအုပ်စုဖွဲ့သတ်ဖြတ်ခုတ်ထစ်နေကြတာကို နားထောင်ပြီး
အလီ ပီတိဖြစ်ဝမ်းမြောက်နေမယ်ထင်လား။

ကျေးခေတ် ကျွန်ခေတ်ကတည်းက
အရှင်သခင်နာမည်ကို အမျိုးအနွယ်အမည်နာမတော်အဖြစ်
အစဉ်အဆက်သွပ်သွင်းခံခဲ့ရတဲ့ အမေရိကန်ပိုင် နီဂရိုးအမှတ်တံဆိပ်နဲ့
“ကပ်စီးယပ်(စ)ကလေး”။
ပထမအကြိမ်ကမ္ဘာ့ဟဲဗီးဝိတ်ချန်ပီယံဖြစ်တဲ့ညမှာ
“ကပ်စီးယပ်(စ)ကလေး”အမည်နာမဟာ ကျွန်စော်နံလို့
“မိုဟမ္မဒ်အလီ”အဖြစ် ပြောင်းလဲကြောင်း ကြေငြာ။
မိရိုးဖလာခရစ်ယာန်ဘာသာဝင်အဖြစ်ကနေ
အစ္စလာမ်ဘာသာဝင်အဖြစ်
ကူးပြောင်းကြောင်းကြေငြာ။

ချဲ့ကားလေကျယ်ရုံသက်သက်မဟုတ်ဘူး။
ပြိုင်ဖက်ကို အလီပြောလေ့ရှိတာက
“ဘယ်နှစ်ချီနဲ့ အလဲထိုးပြမယ်”
ကြိုးဝိုင်းတွင်းယှဉ်ပြိုင်နေစဉ်မှာကို
ပြိုင်ဖက်ထိုးသမျှလက်သီးတွေ ပျော့ပါသေးရဲ့ဆိုပြီး
ပရိသတ်ဖက်လှည့် မထီတရီလုပ်ပြ။
အလီ့ခနာကိုယ်ထဲ ရဲ့ပ်( Rap )ကဗျာသွေးတွေက လူမဲပီပီ စီးဆင်းနေ။
ပြိုင်ဖက်တွေနဲ့ စကားစစ်ထိုးရာမှာ ရိသဲ့သဲ့လေနဲ့ ကာရန် နဘေမရိုးနိုင်အောင်
အလီဟာ ကဗျာ ဇ ရှိသူ။
လန်ဒန်အောက်(စ်)ဖို့တက္ကသိုလ်အဖွဲ့ဝင်
ဒေါက်တာဒန်ကင်းမက်ကလီးရော့တ်ဆိုသူက
ကဗျာပါမောက္ခခန့်အပ်ဖို့ထိတောင်
အလီ့ကို အဆိုပြုခဲ့။

အသက် (၁ရ)နှစ်၊ ၁၉၆၀ ရောမအိုလံပစ်ပွဲတော်
လိုက်ဟဲဗီးဝိတ်တန်းမှာ ရွှေတံဆိပ်ဆုဆွတ်ခူးတော့
ရွှေတံဆိပ်ကို လည်ပင်းပေါ်ကမချွတ်ဘဲ
အလီအိပ်ယာဝင်ခဲ့တယ်။
နောက် ၁၁နှစ်အကြာ ၁၉၇၁၊
တစ်ကျော့ပြန်ဟဲဗီးဝိတ်ချန်ပီယံဗိုလ်လုပွဲမှာ
ချန်ပီယံဂျိုးဖရေဇီယာရဲ့ ထိုးသတ်မှုကြောင့် ကြမ်းပြင်ပေါ် လဲကျ။
ရှုံးနိမ့်မှုအရသာ ပထမဆုံးမြည်းစမ်းခွင့်ရလိုက်တဲ့ အလီကို
ရုပ်မြင်သံကြားကတဆင့် မြင်လိုက်ရပြီး
မလေးရှားက အလီ့ပရိသတ်တစ်ဦး နှလုံးရပ်သေဆုံး။
အဲဒီ့ညက နယူးယောက်မြို့တော် ၁၂၅လမ်း ဘူတာရုံနံရံမျက်နှာစာထက်
အလီ့ကိုချစ်တဲ့ နီဂရိုးလူငယ်တွေရဲ့
တိုတောင်းပေမယ့် အဓိပ္ပါယ်အပြည့်ရှိတဲ့ ဧရာမ ဂရပ်ဖတီလက်ရာစာသား
ရှင်သန်ဆဲ အလီ
Ali Lives.

ကနေဒီမိသားစု၊ ဒုသမ္မတဟောင်း ဟူးဘတ်ဟန်ဖရေ၊
မာတင်လူသာကင်းရဲ့ ဇနီးကော်ရီတာကင်း၊
အမျိုးသမီးတေးသံရှင် ဒိုင်ယာနာရောစ်နဲ့
အဲလ်ဗစ်ပရက်စလေလို အကျော်ဒေးယျအဆိုတော်များ၊
ကမ္ဘာကျော်ဟောလီးဝုဒ်ဒါရိုက်တာများ၊ မင်းသားများ၊
မင်းသမီးများ၊ ပါလီမန်အမတ်၊ အာကာသယာဉ်မှူး၊ ကျွဲရိုင်းသတ်သမား
အစရှိတဲ့ အထက်တန်းအလွှာအလွှာက ပရိသတ်တွေအနေနဲ့
ကမ္ဘာ့ဟဲဗီးဝိတ်လက်ဝှေ့ပွဲမို့ လာကြည့်ကြတာလား။
အလီထိုးသတ်တဲ့ လက်ဝှေ့ပွဲမို့ လာကြည့်ကြတာလား။
အလီ Vs ဂျိုးဖရေဇီယာ
လူမဲလက်ဝှေ့သမားချင်းထိုးသတ်တာတောင်
လူဖြူလူမဲခွဲခြားမှုကို ပြောင်ပြောင်တင်းတင်း တော်လှန်တဲ့
အလီဖက်မှာ လူမဲ ၂၂ သန်း ရှိပြီး
အမေရိကန်လူဖြူအစိုးရအကြိုက်နေထိုင်တဲ့
ဂျိုးဖရေဇီယာဖက်မှာ သာမန်ပရိသတ်ပဲရှိတယ်။

အလီ့မေးရိုးကို ၃ ပိုင်းတိတိ ဖွာလန်ကျိုးကြေသွားအောင်
ထူးထူးခြားခြားကြီးအစွမ်းထက်ခဲ့တဲ့  ကင်(န)နော်တင်ရဲ့
ပွဲမ၀င်ခင်ကြိုတင်ပြင်ဆင်မှု အိပ်မွေ့ချစိတ်ပညာကုထုံးတွေလောက်တော့
အလီက မဖြုံရေးချမဖြုံ။
ကမ္ဘာမှာ ပထမဦးဆုံးနဲ့ တစ်ဦးတည်းသော
ကမ္ဘာ့ ဟဲဝီးဝိတ် ချန်ပီယံ ၃ ကြိမ်တိုင်တိုင်
ကိုင်မြှောက်နိုင်အောင် ကျော်ကြားဆဲ
ကြိုးဝိုင်းပေါ်က အလီရဲ့ ဆောင်ပုဒ်။
“လိပ်ပြာလေးလိုလည်း ပျံဝဲနိုင်၊
ပျားပိတုန်းလိုလည်း တုပ်ခဲနိုင်။”
“float like a butterfly
And sting like a bee.”

ယနေ့ယခု တင်းနစ်ကြယ်ပွင့် ဘောရစ်ဘက်ကာ၊
ဖော်မြူလာဝမ်းကားမောင်းချန်ပီယံ လူးဝစ်စ်ဟာမီတန်၊
ဗြိတိန်အဆိုတော် ဘော့ဂဲဒေါ့ဖ်၊ လက်ဝှေ့ကျော် ၀လာဒီမာကလက်ခ်ျကိုနဲ့
ဘောလုံးကြယ်ပွင့် ဒေးဗစ်ဘက်ခမ်းတို့လို ထင်ရှားကျော်ကြားသူများရဲ့
ဂုဏ်ပြုခံအလီဟာ
သူ့ခေတ်သူ့အခါသူ့ပရိသတ်တွေ ကြည့်ရှုဖို့
ဂြိုလ်တုမှတဆင့် နိုင်ငံပေါင်း ၄၆ နိုင်ငံကို
လက်ဝှေ့ပွဲစဉ်တွေ ရုပ်မြင်သံကြားထုတ်လွှင့်ပြသပေးခဲ့တယ်။
လန်ဒန်နဲ့ ရောမမြို့များမှာ ပရိသတ်ထောင်ပေါင်းများစွာ
နားနေအိပ်စက်ခြင်းမရှိဘဲ တယ်လီဗေးရှင်းရှေ့ ထိုင်စောင့်ကြ။
ဖိလစ်ပိုင်ကျွန်း မနီလာမြို့တော်မှာ အလီ့ပွဲစဉ်စောင့်ကြည့်ဖို့
ကျောင်းတွေတောင် ပိတ်ပေးခဲ့ရ။

ဆရာဝန်ရဲ့ အထူးအကြံပြုချက်အရ
ဦးနှောက်အာရုံကြောဝေဒနာ (Parkinson) စတင်ခံစားရပြီဆိုတာနဲ့
လက်ဝှေ့ကစားခြင်းက အနားယူဖို့ ကြေညာပြီးကာမှ
ရှုံးမယ်မှန်းသိသိချည်းနဲ့ နောက်ဆုံးလက်ဝှေ့ပွဲစဉ်များ
စိတ်ဓာတ်သပ်သပ် အလီထိုးသတ်။
ကမ္ဘာနဲ့အ၀ှမ်း ချစ်ခင်နှစ်သက်သူတွေ
အလီ့ကို ခေါ်လေ့ခေါ်ထရှိတာက
The Greatest.

အီရတ်မြေပေါ်ထိတိုင် အမေရိကန်ဓားစာခံအရေး
ဆက်ဒမ်ဟူစိန်နဲ့ အလီသွားရောက်ဆွေးနွေးခဲ့တာဟာ
အတင်းအကြပ်ခိုင်းစေခံရလို့လား။ အလီ့စိတ်ရင်းသဘောပါဝင်လား။
ဂျော်ဂျီယာပြည်နယ်၊ အက်တလန်တာမှာ ကျင်းပတဲ့
နွေရာသီအိုလံပစ်ပွဲတော်မီးရှူးတိုင် အလီကိုင်ဆောင်ထွန်းညှိခွင့်ရခဲ့တာဟာ
သာမန်အပ်နှင်းမှုတစ်ခုလား၊ ကြီးကျယ်တဲ့ နောက်ခံအကြောင်းရှိသေးလား။
The First Flight of the Gizzelda Dragon လို
တေးအယ်လ်ဘမ်မျိုးရဲ့ ဇာစ်မြစ်က ဘာလို့ အလီဖြစ်နေရသလဲ။
Freedom Road၊The Greatest၊ Ali အစရှိတဲ့ ရုပ်ရှင်ကားတွေရဲ့ စီးဆင်းရာကရော
အလီပဲလား။ သေချာရဲ့လား။
စိတ်ဝင်စားစရာကောင်းတာတစ်ခုက
အထင်ကရပေါ့ပ်အနုပညာရှင် အန်ဒီဝါလ်းဟိုးရေးဆွဲခဲ့တဲ့ အလီ့ပုံတူပန်းချီကားဟာ
ခုဆိုရင် ဒေါ်လာသန်းဘယ်လောက်တန်နေမလဲ။
နောက်ဆုံးတစ်ခုပဲမေးမယ်။
ဘာကြောင့်အလီ့ရုပ်ရည်ကို အနုပညာပစ္စည်းအဖြစ်
ဖန်တီးရေးဆွဲခဲ့တယ်လို့ ထင်လဲ။        ။

လွန်းဆက်နိုးမြတ်
၃.၆.၁၃
မနက် ၀၁း၃၀နာရီ

ရည်ညွှန်း-ကျားဘညိမ်း-မိုဟာမ္မဒ်အလီ သို့မဟုတ် မဟူရာဧကရာဇ်
ကျားဘညိမ်း- အလီ.ဖရေဇီယာ ပွဲစဉ်အမှတ် ၃
Internet-    http://en.wikipedia.org/wiki/Muhammad_Ali

“မိုဟာမက်အလီ” တက်ရောက်တဲ့ လန်ဒန်အိုလံပစ် ရန်ပုံငွေပွဲ

http://www.putet.com.mm/muhammad-ali/

GHOST RIDERS(တစ္ဆေမောင်းနှင်စီးနင်းသူများ)

GHOST RIDERS
(တစ္ဆေမောင်းနှင်စီးနင်းသူများ)

သုံးယောက်ဆိုတာ ပုံမှန်ပါပဲ။ စီးသူတစ်ယောက် ထိုင်သူနှစ်ယောက်။
လေးယောက် ငါးယောက် တင်စီးတော့ရော ဘာဖြစ်သေးလဲ။
(ဆပ်ကပ်ထဲမှာဆို အယောက် အစိပ်(၂၅ယောက်)ကို
ဆိုင်ကယ်တစ်စင်းတည်းနဲ့ တင်မောင်းပြတယ် )
ဒီမှာက ဆပ်ကပ်မဟုတ်ဘူး။ အယောက်အစိပ်မတင်နိုင်ရင်သာရှိမယ်
ရသလောက်တော့ ရသလို တင်နိုင်ရမယ်။
ကားတစ်စင်းမောင်းဝင်လိုက်တာနဲ့ လမ်းပြည့်သွားတဲ့ ကတ္တရာခပ်ပါးပါးပေါ်မှာ
အရှိန်မပျက် ကပ်ပြီးကျော်တက်/ထွက် နိုင်ရမယ်။
အိမ်ကမိန်းမမျက်နှာပေါ်က သနပ်ခါးပါးကွက် မေ့ရင်မေ့ပလေ့စေ
လမ်းပေါ်က ချိုင့်ခိုးချိုင့်ခွက်မှန်သမျှ အလွတ်ရအောင် ကျက်ထားပြီးသားပဲ။
လမ်းကြိုလမ်းကြားထဲက လှစ်ခနဲ ခုန်ထွက်လာတတ်တဲ့ စည်းမဲ့ကမ်းမဲ့
ဘ၀တူဆိုင်ကယ်တွေ သတိထားတော်မူ။
နောက်ကနေ တိတ်တိတ်ကလေးလိုက်လာပြီး နီးလာမှ မိမိဆိုင်ကယ်လက်ကိုင် အလန့်တကြားဖြစ်သွားစေလောက်အောင် မဟားဒယားကျော်တက်တတ်တဲ့ ကြောင်သူတော်ကြွက်သူခိုးဆိုင်ကယ်တွေကြောင့်
မိမိနှလုံး ဟပ်အတက်ဖြစ်သွားစေနိုင်။
အုပ်စုလိုက် ဟေးလားဝါးလား လမ်းလုံးပြည့်ကွေ့ဝိုက်ဆူညံ စီးလာတာ
မိမဆုံးမ ဖမဆုံးမ ကာလသားလေးတွေပဲ ဖြစ်ပါတယ်။
ဆိုင်ကယ်ဘီးအောက်တည့်တည့် အသေခံစစ်သွေးကြွတွေလို ဆင်ခြင်မှုမရှိ ပြေးဝင်လာတတ်တဲ့ နှုတ်သီးမည်းမည်းနဲ့
ခွေးပေါက်စနလေးတွေရှောင်ရတာ အခက်ခဲဆုံးနဲ့ အန္တရာယ်အများဆုံးဒုက္ခပဲ။
ကမ္ဘာလုံးထဲ ပတ်မောင်းပြရတာလွယ်ပါတယ်။ လက်နှစ်ဖက်လွှတ်စီးပြရတာ ပိုလွယ်ပါတယ်။
နေပူမရှောင် မိုးရွာမရှောင် နေ့မရွေး ညမရွေး ခေါက်ရေကိုက်အောင် မောင်းရတာ မလွယ်ဘူး။
ရှစ်ရက်သားသမီးတို့ရဲ့ ဝေယျာဝစ္စ၀န်စည်စလွယ်မျိုးစုံတင်ပြီး
အရပ်ဆယ့်ခြောက်မျက်နှာ ခရီးတို/ရှည်မရွေး လိုက်လံမောင်းနှင်ပို့ဆောင်ပေးရတာ ပိုမလွယ်ဘူး။
မိုးကာကုတ်အကျီင်္ကိုယ်စီနဲ့ မျက်မှန်ကိုယ်စီနဲ့ တချို့ဆို မျက်နှာသနပ်ခါးကိုယ်စီနဲ့
နိုင်ငံရေးအေးဆေး၊ သားရေးသမီးရေးအေးဆေး၊ သာရေးနာရေးအေးဆေး၊ အားလုံး အေးဆေး။
ဘာမှ ရေးကြီးခွင်ကျယ်ပြောဆိုတွေးခေါ်နေဖို့ အချိန်အားမရှိတော့
အားလုံး အားလုံး အေးဆေးပေါ့။
ရှေ့နားမှာ ထိုးဆိုက်လာမယ့် ကားပေါ်က မိမိအတွက် ခွဲတမ်းဘယ်နှယောက်ဆင်းလာမလဲ။
ရုံး၊ ကျောင်း၊ ကဏ္ဍား၊ နေ့စဉ်သွားလာနေကျ ငါ သူတစ်ပါး ယောကျာ်း မိန်းမ ကလေး လူကြီး
အများပြည်သူဖောက်သည်မှန်ဖို့ အခေါ်အပြောလေးလည်း ညက်ရတယ်။
ကိုယ်လိုသူလို တစ္ဆေမောင်းနှင်စီးနင်းသူချင်းကြားမှာ
လူ့စည်း ဘီးလူးစည်းလေးထားပြီး ခရီးသည်ဆွယ်ရတယ်။
ကိုယ်လိုသူလို တစ္ဆေစီးနင်းသူချင်းကြားမှာ ခပ်ကြွားကြွားလေး လေးစားနေထိုင်နိုင်ဖို့
အရေးအကြီးဆုံးဟာ မိမိအလုပ်မိမိကျွမ်းကျင်မှုပဲ။ နိုင်ငံရေးကျွမ်းကျင်ဖို့ မလိုပါဘူး။
သားရေး သမီးရေးမပူပါဘူး။ သာရေးနာရေးမပြောပါဘူး။ အလွန်ဆုံးပြောလှ
အင်္ဂလန်ပရီးမိးယားလိဂ်နဲ့ ချန်ပီယံလိဂ်လောက်ပဲ ဖြစ်မယ်။
မိမိ မိသားစုပါးစပ်ပေါက်လေး လှုပ်နိုင်ဖို့အတွက်
မိမိလက်လီဗာလှုပ်မှ မိမိခြေထောက်ဂီယာချိန်းမှ မိမိသတိဘရိတ်လေးလည်း မှေးထိန်းနိုင်ဦးပါမှ။
KANBO၊ LUOJIA၊ JLM၊ WAVE၊ FEILING၊ YINXIANG၊ DAYUN ၊ DREAM ဘယ်အမျိုးအစားပဲလာလာ ကျွမ်းကျင်ရာ လိမ္မာကြရတယ်။
အင်ဂျင်မှာ KANBO ဘော်ဒီမှာ LUOJIA စသဖြင့်
တစ်ကွက်ကောင်း တရုတ်ဆိုင်ကယ်တွေပါပဲ။
ကယ်ရီဆိုင်ကယ်ဆိုတော့ များသောအားဖြင့် အင်ဂျင်ပါဝါ 125 ထက် 110 ပဲ သုံးကြတယ်။ ဆယ်ရက်တစ်ခါ အင်ဂျင်ဝိုင်လဲတယ်။
အနီနဲ့ အဖြူ လောင်စာဆီနှစ်မျိုးဈေးကွက်မှာ ၀ယ်ရတယ်။ တစ်ပုလင်း ၁၀၀၀ ပေးရတာချင်းတူတူ
အနီက တစ်ခါတစ်ခါ တစ်ရာနှစ်ရာ စွန်းချင်တယ်။ တချို့ဆိုင်ကယ်တွေက
သံသေးသံကြောင်ဟွန်းသံနဲ့၊ တချို့ဆိုင်ကယ်တွေက မီးရောင်စုံခြယ်သမှုနဲ့၊
တချို့ဆိုင်ကယ်တွေက အူကြောင်ကြားမောင်းသူနဲ့၊တချို့ဆိုင်ကယ်တွေဟာ အသစ်စက်စက်။  (ဘယ်လောက်သစ်လဲဆိုရင် ရုံးက သံနံပါတ်ပြားအစစ်မရသေးလို့ ယာယီနံပါတ်ကို စက္ကူကတ်ထူပြားပေါ်လက်နဲ့ရေးပြီး ပလတ်စတစ်လောင်းထားတယ်။
ရှေ့ဆုံးအက္ခရာအစား အတိုကောက်စာလုံး “ဘောင်”နောက်မှာ ၁၂၃၄၅ စတဲ့နံပါတ်တွေ
ဘောင်ဆိုတာ ဘောင်ဝင်တယ်လို့ ပြောချင်ဟန်တူပါရဲ့။)
တတ်မြောက်ထားတဲ့ အလုပ်နဲ့ မိမိရထားတဲ့ ဘွဲ့နဲ့ တခြားစီမှာ
မိမိလက်ရှိအလုပ်အကိုင်ဟာ ယိုင်နဲ့နဲ့ဆိုတော့ ငါးပွက်ရာ ငါးစာချလိုက်ရတယ်လို့ မထောက်မညှာ ပြောရမလား။
အီကိုနောမစ်အသိအတိုင်း Demand ဒီမန်းနဲ့ Supply ဆပ်ပလိုင်းလို့ ပညာရပ်ဆန်ဆန် သုံးနှုန်းပြောဆိုရမလား။ ကြာပါတယ် အရပ်ပြောအတိုင်းပဲ ဒါလာမှ ဒါလာမှာလို့
အရင်ဆုံး လက်ကို လီဗာဆွဲတဲ့ ပုံလုပ်ပြ နောက်မှ လက်ကို ပါးစပ်နားကပ် ထမင်းစားတဲ့ပုံ လုပ်ပြ။
ဘယ်သူမဆို တစ္ဆေမောင်းနှင်စီးနင်းသူဖြစ်နိုင်တယ်။ ဘယ်သူမဆိုတစ္ဆေမောင်းနှင်စီးနင်းသူဖြစ်ခွင့်ရှိတယ်။
သံဂဟေဆက်တဲ့အလုပ်က သိပ်မကောင်းတော့ ကယ်ရီမောင်းရတာပေါ့။လူပျိုဘ၀တုန်းက ဘီယာဆိုင်မှာ
တရုတ်စာအကြော်ဆရာ။ အိမ်ထောင်ကျတော့ ငွေပိုရတဲ့ ဆိုင်ကယ်ကယ်ရီဆရာ။ ဟိုအရင်က ကုန်စိမ်းရောင်းသမား။ ခုတော့ ပထမတန်းစားကယ်ရီသမား။ အရင်က ခြံပွဲစားလည်း ခြံဈေးကွက်ငြိမ်သွားတော့ ကယ်ရီဆွဲစားရတယ်။
ဗွီဒီယိုရိုက်ကွင်းဓာတ်ပုံဆရာဟာ ရိုက်ကွင်းနားတဲ့ရက် ကယ်ရီမောင်းသမားဖြစ်လာတယ်။
ကျွန်တော့်အသက် ၁၅နှစ်ရှိပြီ။ ကျောင်းမနေဘူး။ ရွာမှာ လုပ်စရာမရှိလို့ ဒီရောက်လာတာ။
ဒီက ကယ်ရီမောင်းတဲ့ ဆွေမျိုးက လှမ်းခေါ်လို့ ကယ်ရီမောင်းသမားဖြစ်လာတာ။
အကြောင်းအမျိုးမျိုးကြောင့် လူတွေဟာ တစ္ဆေမောင်းသူတွေ ဖြစ်လာကြတယ်။
တစ္ဆေမောင်းနှင်သူတွေဟာ ပုံစံအမျိုးအမျိုးပဲ။ အစုံအစုံပဲ။ အသက်အရွယ် မရွေးမရွေးပါပဲ။
ဂျင်းဘောင်းဘီဝတ်ကာ လက်တိုအကျီဝတ်ကာ အောက်မှာ
တက်တူးရုပ်အသားကပ်လက်ရှည်ဝတ်ထားကာ
လက်ချောင်းတွေကို လက်အိတ်နက်စွပ်ကာ လုံခြုံရေးဦးထုပ်ဆောင်းကာ
မျက်နှာပါးကွက်ကြားပေါ်နေတဲ့ ၀တ်စုံပြည့် အချိန်ပြည့် အိုးဆားဗစ်တစ္ဆေစီးနင်းသူတွေ။
ပုဆိုးနဲ့ ရှပ်လက်ရှည်အဖြူညစ်ညစ်နဲ့ လျှာထိုးဦးထုပ်နောက်ပြန်နဲ့
ရွာသားဟန်ပန် တောဂေါ်လီတစ္ဆေစီးနင်းသူတွေ။
ကွာတားဘောင်းဘီဝတ်လျက် အကျီင်္သန့်သန့်ဝတ်လျက် မျက်မှန်အနက်တပ်လျက်
ဟမ်းဖုန်းခါးချိတ်ထားလျက် ဟန်ကြီးတစ်ခွဲသား ဂိုဏ်းစတားဂိုက်တစ္ဆေစီးနင်းသူတွေ။
ပုဆိုးတိုတို စွပ်ကျယ်အောက်မှာ ဗိုက်ရွှဲရွှဲနဲ့ လုံခြုံရေးဦးထုပ်ကြိုးအမြဲမတပ်ဘဲ
ဆောင်းထားတဲ့ ကွမ်းတဗျစ်ဗျစ် ဘီးကျဲကြီးတစ္ဆေစီးနင်းသူတွေ။
ကယ်ရီသမားလို့ ထင်ရက်စရာမရှိအောင် အရွယ်ကောင်းချောမောပြီး အရောင်ထွက်အ၀တ်အစားနဲ့
ခရီးသည် မိန်းမပျိုလေးတွေကို တင်ဆောင်ရဖို့ ဦးတည်ကာ အများသူငှာအထင်မှားလည်း
မနည်းဘူးအကြံနဲ့ တဏှာ(နှာ)အသားပေးတစ္ဆေစီးနင်းသူတွေ။
ပုဆိုးကို တီရှပ်အပေါက်အပြဲ ဖြစ်သလိုတွဲဝတ်လို့ ဆိုင်ကယ်ဦးထုပ်ကို
မှန်အပြည့်ကာထားလို့ ထသွားထလာ အချိန်ပိုင်းတစ္ဆေစီးနင်းသူတွေ။
တစ္ဆေမောင်းနှင်စီးနင်းသူတွေ ဘယ်လိုပဲ ရှိနေ ရှိနေ ကိုယ်ပိုင်သင်္ကေတတွေနဲ့ ခွဲခြားနိုင်တယ်။
ကားပေါ်ကဆင်းတာနဲ့ မြေကြီးပေါ် ခြေမချခင် သင့်ရှေ့ကို ၀ူးခနဲ လာရပ်ပြီး “သွားမလား”မေးမယ်။
အဝေးမှာ သင်ရောက်နေရင် လက်ကလေးတစ်ချောင်း လှမ်းထောင်ပြမယ်။
တစ်ခါတစ်လေ သင့်နောက်ကနေ တတီတီနဲ့ ဟွန်းသံပေးမယ်။
ဒီမှာတော့ ဟိုနား ဒီနား ၀န်ဆောင်ခ တစ်ယောက် ၂၀၀၊ ခရီးနီးရင် နီးသလို ခရီးဝေးရင် ဝေးသလို။
ခရီးဝေးငှားရမ်းသူနှစ်ယောက်က မောင်းသူကို လမ်းခုလတ်လူပြတ်ရာမှာ
ရိုက်နှက်တဲ့ ဆိုင်ကယ်လုယက်သတင်းတွေလည်း မကြာခဏကြားရတတ်ပါတယ်။
ခရီးမဝေးပေမယ့် ညမှောင်မှောင် လေးယောက်တစ်ဖွဲ့မှာ နှစ်ယောက်တစ်စီးနှုန်းနဲ့ ငှားသွားပြီး
ကျောလာထောက်မှ ဓားပြအဖွဲ့မှန်းသိလိုက်ချိန် ကယ်ရီမောင်းသမားနှစ်ယောက် မသေရုံတမယ်
ခေါင်းကွဲ စုတ်ပြတ် နေရာမှာတင်မေ့လဲ ဆိုင်ကယ်နှစ်စီး ပျောက်ဆုံး လုယက် ယူဆောင်ခံရ။
ဒါကြောင့်ပဲ တစ္ဆေစီးနင်းသူတွေဟာ ဗလပဲရှိရှိ ဇပဲရှိရှိ အကြောက်တရားလေးတော့ မရှိမဖြစ် ရှိရတယ်။
ဂမ္ဘီရဆန်းကြယ်စွန့်စားခန်းစိတ္တဇအက်ရှင်နီကိုလပ်ကေ့ခ်ျရဲ့
ပိတ်သားထက်က GHOST RIDER နဲ့ ကွာခြားတာက
ဘ၀သရုပ်မှန်အောက်ခြေလူတန်းစားအခြေခံ မြန်မာပြည်သူပြည်သားတွေရဲ့ နေ့စဉ်ဘ၀အမြင်
အသေးစားခရီးသွားဝန်ဆောင်မှုလမ်းမထက်က GHOST RIDER(S) ဖြစ်ပါတယ်။
ဆိုင်ကယ်တစ်စင်းကို အုံနာခ တစ်နေ့ ၃၀၀၀ သွင်းရတယ်။ ရှစ်လဆိုရင် ပိုင်ပြီ။
ဒီကြားထဲ ဆိုင်ကယ်ပျက်ရင် မိမိပဲခံ။
နောက်တစ်နည်းက တစ်နေ့ကို အုံနာခ ၂၀၀၀ သွင်း။ ဒါပေမယ့် အုံနာကပဲ ဆိုင်ကယ်အမြဲပိုင်တယ်။
ဒီနည်းလမ်းမှာ ၃၀၀၀ ဖိုးအထက် ဆိုင်ကယ်ပျက်ရင် အုံနာနဲ့ မိမိနဲ့ တစ်ယောက်တစ်ဝက်။ ၃၀၀၀ အောက်ဆိုရင် မိမိပဲခံ။
မြို့နယ်ဈေးနယ်နမိတ်ကလွဲရင် ဘယ်နေရာမှာမှ အခွန်ဆောင်စရာမလိုပါဘူး။
ယာဉ်စည်းကမ်းလိုက်နာတာက လိုက်နာတာပေါ့။ မောင်းသူရော လိုက်သူရော ဦးထုပ်ကိုယ်စီဆောင်းရတယ်။ ဆိုင်ကယ်တစ်စင်း လူနှစ်ယောက်အပြင် ပိုမစီးရ။ ၀န်စည်စလွယ်မဆန့်အင်္ဂါအမြင်မတော်အောင် မတင်ဆောင်ရ။
ဆိုင်ကယ်တစ်စင်းမှာ ရှိသင့်ရှိထိုက်တဲ့ အင်္ဂါရပ်တွေ စုံလင်အောင်
လိုင်စင်ကအစ နောက်ကြည့်မှန်အဆုံးတပ်ဆင်ထားရ (မည်ဟုဆိုပေမယ့်လည်းပေါ့။)
တကယ်တော့ ဒါကလည်း စစ်ဆေးရေးရှိတဲ့အခါမှသာပါပဲ။
ဆိုင်ကယ်တစ်စင်း မိသားစုတစ်စု၊ ဖေကြီးကမောင်း မေကြီးကနောက်ဆုံးမှာထိုင်
ဖေကြီးနဲ့ မေကြီးကြားမှ သားလေးနှစ်ယောက်  ဖေကြီးရှေ့ခွကြားမှာ သမီးလေးကထိုင်
ကြပ်တော့ ကြပ်တာပေါ့ ဒါပေမယ့် မကြပ်ဘူး။ ဆိုင်ကယ်တစ်စင်းမှာ
ဆန်အိတ် ၃ အိတ်တင်လို့ ရတယ်။ ဘိလပ်မြေ ၃ အိတ် တင်မောင်းနိုင်တယ်။
မီးသွေး ၆ အိတ်တင်သယ်ကြတယ်။
ကယ်ရီဆိုင်ကယ်အများစုဟာ မနက်လင်းတာနဲ့ သန့်ရှင်းသပ်ရပ်တောက်ပြောင်စွာ
လမ်းဆုံတွေမှာ ရပ်စောင့်နေကြတယ်။
ရှားရှားပါးပါး ဆိုင်ကယ်တချို့ကတော့ ရှေ့ကာဗာမားကတ်တွေပြုတ်ပျက်ထွက်ပြီး
ရှုပ်ထွေးခွေလိမ်နေတဲ့ ၀ါယာကြိုးတွေ ပေါ်နေမယ်။ အောက်ကာဗာမရှိတော့ဘဲ အင်ဂျင်ကိုယ်ထည်ကိုမြင်ရမယ်။ မဲတုံးသံချေးကိုက်နေတဲ့ ချိန်းကြိုးကို မြင်ရမယ်။ ကာဗာမားကတ်တွေ ပြန်မတပ်ဘဲ ဖြစ်သလို မောင်းနေတဲ့ ဆိုင်ကယ်တွေကို ဆိုင်ကယ်ကတုံးတွေလို့ ခေါ်ရမလား။ ယာဉ်စည်းကမ်းက ယာဉ်စည်းကမ်းပဲ။ ဒီလိုပဲ တင်နေ သယ်နေ မောင်းနှင်နေတာက မောင်းနှင်နေတာပဲ။
ကုန်စိမ်းလား၊ ကုန်ခြောက်လား၊ အသားလား၊ ငါးလား၊ အလားတူ ရေသန့်ဗူး၊ ရေပိုက်၊
သစ်တိုသစ်စ၊ သံသေတ္တာ၊ရေစည်ပိုင်း၊ ခရမ်းချည်သီးထည့် ထင်းရှူးသေတ္တာ၊ ကြက်သွန်အိတ်၊ အာလူးအိတ်၊ ကြက်မွေးကြိမ်ခြင်း၊မုန့်မျိုးစုံထည့်ကြိမ်ခြင်း၊ ၀က်အရှင်လတ်လတ်၊ ကြက်ဘဲအရှင်လတ်လတ်(စုချည်လျက်)၊ရေခဲအထပ်လိုက်၊
သားကျွေးမှုမယားကျွေးမှုအထပ်လိုက် အကုသိုလ်အထပ်လိုက်
လောဘဒေါသမောဟအထပ်လိုက် အထပ်လိုက် အထပ်လိုက်က်က်က်က်။
ဆိုင်ကယ်ရှေ့ခြင်းထဲမှာ၊ ဆိုင်ကယ်ရှေ့ခွကြားမှာ၊ ဆိုင်ကယ်မောင်းသူလိုက်သူနှစ်ဦးဖင်အောက်မှာ၊ ဆိုင်ကယ်နောက်ခုံမှာ၊တချို့ဆို ဆိုင်ကယ်ဘေးမှာကို ပစ္စည်းတင်ဖို့သက်သက် သံဂဟေအပိုဆက်ထားလိုက်သေးတယ်။ ဘယ်ချိန်ကြည့်ကြည့် သတ်မှတ် ၀န်စည်ထက်
ပိုတင်နေကြတာ အလွယ်တကူတွေ့နိုင်တယ်။ သမုဒ္ဒရာ ၀မ်းတစ်ထွာမှာ ကူးရင်းခတ်ရင်း တစ္ဆေမောင်းနှင်သူတွေ အမြဲတမ်းမေ့လျော့နေတဲ့ အချက်ကတော့
သူတို့မောင်းနှင်စီးနင်းထားတာဟာ ဆိုင်ကယ်ဖြစ်သလို တစ္ဆေလည်း ဖြစ်တယ်ဆိုတဲ့ ကိစ္စပဲ။
ဝန်ပိုတွေနဲ့ အဆင်မသင့်တဲ့အခါ တစ္ဆေဟာ မောင်းနှင်သူကို ကုန်တင်ကားကြီးအောက် ဆွဲခေါ်သွားတတ်တယ်။ လူပိုတွေနဲ့ အနေမတတ်တဲ့အခါ တစ္ဆေဟာ မောင်းနှင်သူကိုရော
လိုက်ပါသူကိုရော ကတ္တရာလမ်းပေါ် ဒလိမ့်ကောက်ကွေးဖြစ်အောင် ခါရမ်းပစ်တတ်တယ်။
၂၀၀ရ ခုနှစ် ရန်ကုန်ဆိုင်ကယ်တိုက်မှု ၂၉မှု သေဆုံး ၅ဦး ၂၀၀၈မှာ ၂၄မှု သေဆုံး ၅ဦး
၂၀၀၉ ဧပြီထိ ၂၅မှု သေဆုံး ၈ဦး  ၂၀၁၂ ဇန်န၀ါရီမှ အောက်တိုဘာထိ
မန္တလေးခရိုင် ဆိုင်ကယ်တိုက်မှုများကြောင့် သေဆုံး ၉၄ ဦး ဒဏ်ရာရ ၃၃၈ ဦး
လမ်းဘေးမှာ မှောက်လဲနေတဲ့ သွေးစွန်းဆိုင်ကယ်တစ်စင်း၊ ဥဒဟိုလိမ့်နေတဲ့ သစ်သီးများ၊
မလှုပ်မယှက်ခန္ဓာကိုယ်များ၊ ယိုစီးသွေးကွက်များ၊ ဟိုမှ သည်မှ
ထိတ်လန့်တကြားပြေးလာသော လူများ။
လဲလျောင်းဆိုင်ကယ်ရဲ့ ဘီးဟာ မရပ်သေးဘဲ တစ်ဝီ၀ီလည်နေဆဲ…။
မောင်းသူရဲ့ မူလလက်ဟောင်းအရင်းစစ်အလုပ်အကိုင်ဟာ ဘာပဲဖြစ်နေဖြစ်နေ
လိုက်ပါသူပုဂ္ဂိုလ်ကြီးဟာ ဘယ်သူဘယ်ဝါကြီးပဲဖြစ်နေဖြစ်နေ
ဘယ်သူ့အတွက်ပဲဖြစ်ဖြစ် ဘယ်လိုပုဂ္ဂိုလ်အတွက်ပဲဖြစ်ဖြစ်
မောင်းနှင်စီးနင်းသူရဲ့ သတိတစ်ချက်အမှားမှာ
ဆိုင်ကယ်ဟာ တစ္ဆေပဲ။ တစ္ဆေဟာ ဆိုင်ကယ်ပဲ။    ။

လွန်းဆက်နိုးမြတ်
၂၃.၁၁.၁၂
ည ၀၇း၄၇နာရီ

ဂြိုဟ်သားမှတ်စု

ဂြိုဟ်သားမှတ်စု

လူ
စီးကရက်သောက်တယ်။
သောက်ပြီး ဖြစ်သလို လွှင့်ပစ်တယ်။
ကွမ်းယာစားတယ်။
စားပြီး နေရာတကာ တပျစ်ပျစ်ထွေးတယ်။
အရက်သောက်တယ်။
မူးလာရင် ကြုံတဲ့နေရာ လက်ထိုးအန်တယ်။
တာဝန်ယူချင်စိတ်နည်းပြီး အချောင်ရလိုစိတ်များတယ်။
ငြိမ်းချမ်းရေးအတွက် ဥပဒေအမျိုးမျိုး ပြဒါန်းတယ။် ငြိမ်းချမ်းရေးအတွက်ပဲ
ဥပဒေအမျိုးမျိုး ပြောင်းလဲကျင့်သုံးတယ်။
နက္ခတ်တာရာတွေ ကြည့်ပြီး ပြက္ခဒိန်ထုတ် သက္ကရာဇ်တွေ လုပ်တယ်။
ပြီးတော့လည်း အဲဒီ့ သက္ကရာဇ်တွေ ပြန်ဖြိုတယ်။
“တစ်ရွာမပြောင်း သူကောင်းမဖြစ်”
“သေချင်တဲ့ကျား တောပြောင်း”
အဲသလို ရှေ့နောက်မညီတဲ့ စကားပုံတွေနဲ့ အပင်ပန်းခံတယ်။
မြင်တဲ့အရာထက် မမြင်ရတဲ့ အရာကို ပိုစိတ်ဝင်စားတယ်။
လက်နှစ်ဖက်တည်းရှိလည်း အမြဲတမ်း လက်နှစ်ဖက်မက ပိုင်ဆိုင်ချင်တယ်။
မွေးဖွားတာနဲ့ သေဆုံးတာကြားမှာ ရသလောက် အပါးဝတယ်။
ကိစ္စတော်တော်များများပြုလုပ်နိုင်တော့
ဘာမဆို လူလုပ်ရင် ဖြစ်တယ်လို့ ထင်ကြတယ်။
ပုခုံးနှစ်ဖက်ကြား ခေါင်းပေါက်တယ်။
တားမြစ်ထားတာ အကုန်လုပ်တယ်။

ဘာသာတရား
အမျိုးမျိုးအစားစားရှိကြပေမယ့်
အကြမ်းဖျဉ်းတူတယ်။
ကုသိုလ်နဲ့ အကုသိုလ်ရှိတယ်။
ငရဲနဲ့ ကောင်းကင်ဘုံရှိတယ်။
အစွန်းရောက်ဝါဒီတွေ ရှိသလို ဘာသာမဲ့ဝါဒီတွေလည်း ရှိတယ်။
အကောင်းမြင်စိတ်ဓာတ်နဲ့ ငြိမ်းချမ်းရေးကို ရှေးရှုတယ်။
ဘယ်သူမှ မရောက်ဖူးတဲ့ အကြွင်းမဲ့ ချုပ်ငြိမ်းရာနဲ့ မျှားတယ်။

နည်းပညာ
ကမ္ဘာကို ရွာဖြစ်အောင်လုပ်တယ်။
ဘာပစ္စည်းပဲဖြစ်ဖြစ် ပိုသေးသထက်သေးအောင်
ပိုမြန်သထက်မြန်အောင် ပိုစွမ်းသထက်စွမ်းအောင်
အပြိုင်အဆိုင်ထုတ်လုပ်တယ်။
ဂြိုဟ်သားပေါက်စလေးတွေ လက်ရေးလှလေ့ကျင့်သလောက်
ဥာဏ်ထုတ်တယ်။

ငွေ
လိုအပ်သမျှကို
ပေးချေလဲလှယ်နိုင်တဲ့ ပစ္စည်း။
စိတ်ဝကမြန်စေသလို စိတ်ကျလည်းမြန်စေတယ်။
အသုံးလွယ်သလောက် ရှာရခက်တယ်။
ငွေကို ရေ၊မန်းနီး၊အာရကေ၊ပိုက်ဆံ
အဿပြာ၊ဖွတ်ကလိဒင်္ဂါး
စသဖြင့် အမျိုးမျိုးသုံးနှုန်းတယ်။
မမြင်ရတဲ့ ခြေထောက်သုံးချောင်းရှိတယ်။
လူပြိန်းတွေအတွက်
ဒုတိယမြောက်ဘုရားသခင်။

ယဉ်ကျေးမှု
ဂူနံရံမှာ ပုံတွေ လျှောက်ခြစ်တယ်။
အသားကို မီးနဲ့ အပူပေးပြီး စားတယ်။
ဘာသာစကားတီထွင်တယ်။
ပိရမစ်ဆောက်တယ်။
လက်ညှိုးထိုးမလွဲ ဘုရားစေတီတွေတည်တယ်။
ကျိန်စာကို ကျောက်စာမှာ ထွင်းတယ်။
သစ်ရွက်ကနေ ဂျင်းထိအောင် အရှက်ဖုံးတယ်။
ဂူထဲက ထွက်ပြီး မိုးပျံတိုက်တွေပေါ်
ဓာတ်လှေကားနဲ့ တက်တယ်။
ပြတိုက်ဆောက်တယ်။
ရုပ်တုလုပ်တယ်။
ပစ္စည်းဟောင်းကို ဈေးကောင်းကောင်းနဲ့
ရောင်းဝယ်တယ်။

အနုပညာ
ဂြိုဟ်သားတွေ နားမလည်တဲ့အရာ။
လက်ခံသည်ဖြစ်စေ လက်မခံသည်ဖြစ်စေ အန္တရာယ်များတယ်။
ထိန်းချုပ်ရခက်တယ်။

ချစ်ခြင်းမေတ္တာ
၁၅၀၀နဲ့ ၅၂၈
အရေအတွက်နှစ်မျိုးပဲရှိတဲ့ သင်္ချာ။
အလကားနေရင်း ခံစားတယ်။
ဆန့်ကျင်ဘက်လိင်အတွက် စစ်ဖြစ်တယ်။
ပူလောင်တယ် ပူလောင်တယ်ပြောပြီး
မကြာခဏ ပျော်ပျော်ကြီး ခုန်ချတယ်။

သဘာဝ
ဖြစ်တယ်။
ပျက်တယ။်

ကမ္ဘာ
မိမိဝင်ရိုးပေါ်မှာ
၂၃-၁/၂ ဒီဂရီတိမ်းစောင်းလည်ပတ်တယ်။
လွင့်မျောဆဲ ဆပ်ပြာပူဖောင်းကြီးနဲ့
တူတယ်။
လူ၊ဘာသာတရား၊နည်းပညာ၊ငွေ၊ယဉ်ကျေးမှု
အနုပညာ၊သဘာဝနဲ့ ချစ်ခြင်းမေတ္တာ
စတာတွေအပြင် တခြားသက်ရှိသက်မဲ့
အရာဝတ္ထုအမျိုးမျိုးရှိတယ်။
ဂြိုဟ်သားတွေ ခရီးတထောက်ရပ်နားရာ နယ်မြေ
စွန့်ပစ်ပစ္စည်းနဲ့ ကြွပ်ကြွပ်အိတ်ပေါတယ်။
ကွန်ဒုံးတွေ လိုသလောက် ရတယ်။ ။

လွန်းဆက်နိုးမြတ်
၃၁.၈.၀၉
နေ့လည် ၀၉း၄၆နာရီ